1 Timoteo 5 - Le Nouveau Testament in Kele (Lokele) 1958

Boyaeli wa Bokumi la bato b’Etanda

¹ Ofëke botowange liɛngɔ, kangä koim’inde la wɛlï kwa mbo sango waɛ; imaka tosenge kwa mbo bitungani yaɛ;

² biange ya batomali kwa mbo banyango, besängä la baseka kwambo baelo baɛ la botema botanu nda njasɔ bitotina.

Loasɔ loa ebawelu balome

³ Litesaka la kukyaka ebawelu balome la bato bau wewe,

⁴ nde eya to mbo lotika eyala la bana, ango ko bana babana bande, bataekaka mbo lole end’iyo ndokeela bofindi wau angɛnɛ booto la ndoinoela ebaot’iyo ko losamɔ eoka ongoma yengani nde nda baiso ba Mungu.

⁵ Nde botomali oyawelu olome la oyale lotika wewe, asokokomɛsɛ iɛli shande la atotumbanela liömbi la lisomboli ko la ocho la löwa.

⁶ Nde lotika oyaokanelu nde bamɛngo bande, inde asowa ani akowawa kɔni.

⁷ Komyak’imo ko loasɔ-lo mbo batatwanelo ango sinyo.

⁸ Nde boto elenjaka ndokukya eba bofindi, simbi to ebaot’inde angɛnɛ, ambo asoanganya Liimeli, l’ani ale la obe wolongela oyatiimele.

⁹ Otëke lina lia lotika nda lokasa ani akaiyeli miaka kama liambɛ, la sakolo ko ayalaka wali wa boto ko ɔmɔi,

¹⁰ la mbo ayali nde la lokuku lolau eoka ya bekeeli bilau, ambo oyasokosolo bana, oyasonyangela bɛɛnda nda lɔkɛndɔ loau, oyasosoola batindi b’eba Etanda, oyasosungaka eba touwe, oyasotimbana la bakuwa balau ba kanda bitotina.

¹¹ Nde otëke lina lia lotika oyati wange, eoka atatɛkwa ndolitesa Masiya, ko ndolɛmbe ndɔkɛ liäla liasi,

¹² limɔ atofomo se eoka mbo asotombola lisakä lia oso.

¹³ La imɔ ko batokwelo bato ba bewandu oketete la ndakɔ la ndakɔ, tinga ko bewandu kongo, kangä imɔ fomboli la betendele la tolailai ebatotaka mboli ebitiengane lau.

¹⁴ Eokao ilɛmbi finɛ mbo ebawelu balome ebakayi biange baɛkɛ baäla basi baoteke bana la bakomanyeke bofindi wau angɛnɛ mbo batafa Wiyani fofe yotombola Etanda.

¹⁵ Nde bamɔi basosila oko okatute Satana.

¹⁶ Eya to mbo oto w’Etanda eyala la tika ya olome olo eyande, asungek’iyo la wɛlï, la Etanda etafomo bolito ona, la mbo Etanda esungeke tika yasi ebati l’ato bosungak’iyo.

Loasɔ loa biange la bekumi ya Etanda

¹⁷ Biange y’Etanda ebitokomya likuwa liau la wɛlï, bengani nde ndɔɔlɔ loliteso lofi, simbi to ebasokelaka likuwa lifi lia linangoli la liekesi;

¹⁸ eoka Lokasa loa Mungu mbo— Okandëke bolomba wa mbolo oyatomatekela befonga nda etwangelo, la imɔ mbo— Bosali engani nde ndofomo liɔli liande.

¹⁹ Okuliëke liwanjeli liowanjela wange w’Etanda sakolo ngo ko la bɛnɔkɔ ya bato bambale kwa asatɔ ebɛnɛkɛ loasɔ.

²⁰ Nde ebasofomo se nda njasɔ, fak’iyo liɛngɔ oso wa baiso ba batotina mbo ebamɔi imɔ bawaeke.

²¹ Itoimak’aɛ la wɛlï oso wa Mungu la oso wa Masiya Yesu la bakitomo ebaaomu lande, mbo okɔchɛkɛ bakakanelo-ba, angwɛnɛ ikwelakwela la angokɛlɛ ɔngɔ ɔmɔi.

²² Otalielëke boto bosamba waɛ la mangu, angosangana la batwanelo ba bato basi; yalesaka ewaɛ botema la botanu.

²³ Omwëk’imɔ ko baliä ko balia kongo, nde taka sinyo sha liamɔ eoka ya sɔlɔ yaɛ la biale ebisokak’aɛ mbile la mbile.

²⁴ Batwanelo ba bato bamɔi bisɔɛnɛlɛ sandelele ndokakɛs’iyo ko nda lofomo se, nde eba bato basi batokatutel’iyo liili.

²⁵ Ko ongoma imɔ bekeeli bilau bisɔɛnɛlɛ swa, la ango bitiɛnɛlɛ ongoma, yao bitikɔkɔlɛ ndoisakama.