1 Timoteo 4 - Le Nouveau Testament in Kele (Lokele) 1958

Boimo eoka ya Liekesi lia batwanelo

¹ Bolimo atoonga to lasu fololo mbo nda bacho ba liili bamɔi basu batosɛnyana la Lilendelu ko ndolaikila balimo ba bolimbakeli la liekesi lia balimo babe,

² ko la shɔngɔlɔ sha bɛnɔkɔ ya eba nanga. Biluwelo ya baekesi-ba bisobeba la bösä wa bobe,

³ batofekela bato ndosɔngɔnɔ la batofumbesa bokili wa yeka yola ebiakelaka Mungu mbo eba liimeli la liluwani lia wewe baaeleke yao ko la kelekëlë.

⁴ Eoka bitotina ebikelomu la Mungu bile bilau, angwɛnɛ ango ɛmɔi yokilomo ani esoaelomo ko la kelekëlë;

⁵ eoka ani esüchomo ko la lioi lia Mungu la lisomboli.

Beimo la bakakanelo-ba bekesomoko ende Etanda

⁶ Bosanokoela eba Etanda bakakanelo-ba, ani otoyala bokuwani olau wa Masiya Yesu oyasokɔsɔlɔmɔ la baoi ba lilendelu la liekesi lilau elisotut’aɛ otutaka liao.

⁷ Fekaka ndoka bishä la bembila ya batata ebiti la lisungi; fumbesaka aɛ angɛnɛ ndoeka bosemoeli wa Mungu.

⁸ Lifumbesi lia bindo lile la lisungi sumbu nde lifumbesi lia lilitesi lia Mungu litosungak’iso nda njasɔ bitotina eoka lisɔɔlɛs’iso lisakä lia loiko loa kwanikwani la eloa mbisa imɔ lisanga.

⁹ Liolo-li liende wewe la liondu ndolendelomo la batotina;

¹⁰ ko l’eokao tosofumba la bonui kwa eba liangɔ, eoka mbo iɛli shau sile ngo ko ende Mungu Ngɛnɛ wa liwawi, Oyayali Bouwesi wa bato batotina, nde simbi to wa eba lilendelu.

¹¹ Taka ndola la ekesaka Etanda njasɔ-bi.

¹² Boto angɔmɔi ataolya aɛ eoka ya isɛngɛ shaɛ, kongo ko yalaka etichelo ende eba lilendelu, la nda baoi baɛ, la boyaeli, la losamɔ, la lilendelu, la botema botanu waɛ.

¹³ Kond’akayeke’mi, tinganaka la litangi nda ɛsɔngɔmɛlɔ la linangoli la liekesi lia lioi lia Mungu.

¹⁴ Olenjëke isosha esile laɛ la eshafomoko aɛ ko la litɔndɔli la lotalio loa besamba ya biange ya Etanda.

¹⁵ Enyaka njasɔ-bi ndotimbakana la yao la bofiili mbo batotina bɛnɛkɛ mbo osɔkɛ la oso.

¹⁶ Tinganaka la botema waɛ angɛnɛ la liekesi imɔ, kɔkɔmɔkɔ nda yao; bokelaka ongoma, otouwesa l’aɛ angɛnɛ la ebatokak’aɛ lisanga.