1 Timoteo 3 - Le Nouveau Testament in Kele (Lokele) 1958

Boyaeli wa Betoli oso ya Etanda ya Mungu

¹ Liölo-li liende wewe mbo— Boto eluka ndoyala Bokumi wa Etanda, ambo ale la yɛmɛ ya likuwa lilau.

² Eokao loengani nde mbo Bokumi ayaleke boto oyati ango la litwanelo, bolome wa wali ɔmwito kongo, boto oyatiwe bänä, oyaluwi nde njasɔ la wɛlï, boto wa likɔmɔnyi, oyatonyangela bɛɛnda, boekesi bolau,

³ inga boto wa bosho nda bänä, kwa bosaesae, kangä bɔfɔɔmu oyatilɛmbɛ bosho, boto oyatisame ko bieto.

⁴ Ayaleke boto oyatokomya bofindi wande angɛnɛ la wɛlï, la oyatokakalesa bana bande la lilitesi lilau.

⁵ ¿Eoka eya mbo atiluwe ndokomya bofindi wande angɛnɛ, inde kokukya to Etanda ya Mungu la moni?

⁶ Ayaleke boto w’Etanda oyakumwi sumbu, mbo atafaala la bɔmɛtɔ wokwes’inde nda lifomu se lia Satana.

⁷ Nde ayaleke imɔ la lokuku lolau ende ebati b’Etanda mbo atatombolomo la mbo atakwa nda ilonga sha Satana.

⁸ Basungi b’Etanda imɔ ko ongoma, bayaleke la lilitesi lia liatemi, inga la bɛnɔkɔ imbale, inga bawi bänä la ebasolola lisɔnji lia bieto wike;

⁹ kangä ebatoundaka njasɔ ya lilendelu ebisoisolomo, ko la eluweelo elau yolembeela litina.

¹⁰ Iyo imɔ batakɔtɔlɔmɔkɔ, limɔ ango batiyale la loasɔ angɔlɔmɔi, bakeleke likuwa lia Basungi.

¹¹ Batomali ebale Basungi imɔ ko ongoma, bayaleke la lilitesi lia lilatemi, inga tomwatomwa, inga bawi bänä, kangä bolendelomo nda bitotina.

¹² Basungi batolome bayaleke nde batolome ba wali ɔmwito, l’ebatokomya bana bau la befindi yau angɛnɛ la wɛlï;

¹³ eoka ebatokelaka likuwa lia Bosungi la wɛlï batofomo loliteso lolau la batokwelo lotendela loa lilendelu liolendelo Masiya Yesu.

¹⁴ Isosɔnɛl’aɛ bakakanelo-ba ani isokɛsɛ iɛli shoyɛn’aɛ mbisa ya mbile ko sinyo,

¹⁵ nde yeumwa oya end’ino, ani isosɔnɛl’aɛ mbo oluweke boyaeli ewengani lasu nda bofindi wa Mungu, boko Etanda ya Mungu Ngɛnɛ wa liwawi eyele likole la esukameselo ya njasɔ ya wewe.

¹⁶ Toisoaola nde mbo njasɔ ya lisemoli lia Mungu ebisoisoelomo iso bile ngo ko likama fafo, mbo— Masiya ɛnɛsɔmɔkɔ̈ nda boyaeli wasu balomboki, enganesomokö ko la Bolimo, ɛnɔmɔkɔ̈ fololo la bakitomo. Anangoelomokö ende tukela ya wenda-bo, akuliomokö la bato ba wenda; ilomokö nda Use okataliomo tala omao.