1 Timoteo 1 - Le Nouveau Testament in Kele (Lokele) 1958

¹ Imi Paulo Botomomu wa Masiya Yesu ko l’eoka ya lioi lia isosha sha Mungu Bouwesi wasu la eoka ya Masiya Yesu oyale iɛli shasu,

² ende Timoteo wana wami wa wewe nda lilendelu; booto la shota la lilatemi lia Mungu Sango la Masiya Yesu Ngɛnɛ wasu biyaleke laɛ!

Loasɔ loa bato bamɔi ebatoekesa Bikela ko efinole

³ Kwa alɔmbɔkɔlɔkɔ’mi aɛ ani aɛkɛ’mi okakɛ nda Makedonia, ongoma tikalaka kɔni nda Efeso mbo oteke eb’asisa ndola mbo bataekekesa liekesi lia bɔfɔnɔ wasi,

⁴ la mbo batasilesa mbile yau nda bembila ya njasɔ ya fɛtɔ ya oso ebitofɔɔlɔ tofenya etoitokɔkɔmɛsɛ likɔmɔnyi lia Mungu elile nda lilendelu.

⁵ Nde litina lia liekesi lile ngo ko losamɔ elotokuswa nda botema botanu la eluwelo elau yolembeela njasɔ la lilendelu eliti la bolimbake.

⁶ Bamɔi basotwanelo la basolota nda mboka ya njasɔ-bi la basokwa nda beongaonga;

⁷ bale la yɛmɛ yoyala baekesi ba Bikela ya Mose, nde batiluwe baoi ebasoong’iyo ango ko litina imɔ lia njasɔ ebitoekes’iyo bato.

⁸ Nde tosoluwa mbo Bikela bile bilau, eya to mbo boto kolitesa yao la wɛlï,

⁹ ani toluwi nde mbo Bikela bitiatelomoko eba liengani, kangä ebatiengane la eba totefola, bato babe l’ebale la batwanelo, ebati balau, ebatokwaka baiti, batefwesi ba sango, batefwesi ba nyango la baoli ba bato,

¹⁰ la bato ba nyongo, l’ebatotombolana bindo la tosumbe, l’ebatoungesa bato angɛnɛ, l’eba nanga, l’ebatotombola ekanɔ yau, l’ebatokelaka ko njasɔ yasi ebitwani la liekesi lilau,

¹¹ eliengani nde la Mboli Ilau ya tala ya Mungu wa lokemo, biko Mboli Ilau ebifomu’mi mbo inangoleke yao.

Kelekele ya Paulo ende Mungu eoka ya linangoli lia Mboli Ilau

¹² Imi nd’asofaef’Inde kelekele oyasɔɔlɛsɛ’mi bofoka wokela ongoma, Inde ako Masiya Yesu Ngɛnɛ wasu, mbo atangi nde mbo yende yolendelomo ndotomomo nda likuwa liande,

¹³ ani oso yayalaka bɔsɛɔli la bokongokoli oyabebesak’Inde finɛ; kongo ko yafomoko shota eoka yakelaka ongoma ani ikoyali ko botutuku l’angwɛnɛ liimeli,

¹⁴ nde bootaota wa Ngɛnɛ wasu bosoelwela’mi la bosotumesa’mi fuu, bu ko la lilendelu la losamɔ loa Masiya Yesu.

¹⁵ Liölo-li liende wewe la liondu ndolendelomo la batotina liko mbo— Masiya Yesu ayaka ono nda wenda-bo mbo uweseke bato abe. La imi angɛnɛ yende ewa obe wetela;

¹⁶ kongo ko yawɛlɔmɔkɔ shota ko la litina-li liko mbo nda loasɔ loami, kwa ewa oso, Yesu Masiya ɛnɛsɛkɛ iso bato liombakeli liande eliti liowa esole, kwa ekweelo end’iyo ana ebakalendeloko Inde loasɔ loa loiko loa layalaya.

¹⁷ Lilitesi la tala bifomoko ende Bɔkɔta Oyatilawek’imɔ ko layalaya, oyaitɔɛnɛlɛ, oyayali ko Inde angɛnɛ ngo ko Mungu wa lokato loa layalaya, ongoma!

¹⁸ Timoteo wana wami, isotel’aɛ ndola-ye kwa aongelomoko aɛ k’oso mbo ko la isosha sha baoi ana onaneke bita bilau,

¹⁹ ani okɔkɔmɛli la lilendelu la eluwelo elau yolembeela njasɔ, nde bamɔi basofekela eluwelo, limɔ lilendelu liau lisolinda mbii kwa watɔ nda liande.

²⁰ Humanayo la Alesandelo bende bato ba bɔfɔnɔ-bo, la isofa iyo ende Satana mbo baekesomoko ndomacha lisɛɔli lia Mungu.