1 Petelo 4 - Le Nouveau Testament in Kele (Lokele) 1958

¹ Eoka mbo Yesu okaka biale nda bindo, wangemesaka betema yanu ko la lienyeli-li mbo oyasokaka biale nda bindo asomacha batwanelo,

² litina mbo, ko la mbile ebisotikala, boyaeli boitofɔɔlɔmɔ ko la yɛmɛ ya boto, kangä la lisangi lia Mungu.

³ Mbile eyesoeta yaɔlɛsɛk’ino fofe yokelaka kwa ebilɛmbi bato ba wenda, biko ndokwa nda mboka ya bolëfë la yɛmɛ ya obe, liwa lia bänä, bisha ibe, limwi lia bänä la lisemoli lia bɛfɔnɔ ya mungu elisofekomo la bikela.

⁴ Basomwaala kɔni eoka oitowatemana lau nda toongo twa sheteseli, limɔ basomɔlɔk’ino;

⁵ nde batoaolela loasɔ-lo end’Inde oyakoengani ndoatel’iyo, l’ebakoyali la liwawi l’ebasowa imɔ.

⁶ Ko la litina-li, Mboli Ilau yanangolomoko ango ende ebawakä, mbo kwa asoatelomo iyo njasɔ kwa balomboki, belimo yau biyaleke la loiko kwa Mungu.

Bakoteli la Bifembi ya liko bisamboya

⁷ Nde tuu ya bitotina bisoya tina; eokao taka betema yanu se la sombokolaka la baenyeli ebatani la wɛlï.

⁸ Loasɔ elosolongela, lole ngo ko ndokɔkɔmɔ nda lisamakani, eoka losamɔ lotoliaka ambɔlɛ wa batwanelo.

⁹ Nyangelaka bɛɛnda angokimakima;

¹⁰ bafi ebasofaefomo ino, boto la boto, kaelanaka bao kwa basungi balau bokaela bɔfɔnɔ la bɔfɔnɔ wa booto wa Mungu.

¹¹ Boto enangola, ambo ko baölo ba Mungu; boto eyala bosungi nda likuwa, ambo ko la bofoka ebotɔɔlɛsɛ Mungu end’inde, litina mbo nda bitoti-bi Mungu ataliomoko tala ko la Yesu Masiya. Tala la isosha shokakalesa bile yande ko layalaya. Ongoma.

¹² Basamomu, omwaalëke loasɔ loa likoteli elile kwa bösä elisoyakotel’ino kwa mbo loasɔ elotiluwane losoyel’ino,

¹³ nde okaka ko limɛngɔ eoka anyo ososangana nda lioki lia biale ya Masiya, mbo nda lɔɛnɛsɔ loa tala yande, ino bokaka imɔ ko limɛngɔ la linɛngina.

¹⁴ Bomɔlɔkɔmɔ eoka ya lina lia Masiya, wende la limɛngɔ, eoka tala la bolimo wa Mungu bisoelama end’ino.

¹⁵ Nde boto angɔmɔi wanu ataoka wale mbo ale booli wa boto, ango ko wiya, ango oyatokelaka obe, ango italaila.

¹⁶ Kongo ko boto eoka wale ko l’eoka mbo ale wa Masiya, okëke sɔni, nde aineleke tala ya Mungu ko nda e-lina-li.

¹⁷ Eoka mbile esoya elikakoleke liataki lia njasɔ ya bofindi wa Mungu; la eya mbo liakola end’iso, tuu ya loasɔ loa ebatotefokola Mboli Ilau ya Mungu koyala to moni?

¹⁸ ¿Ango ewa liengani euwa ko la tale, ambo oyatiluwe Mungu la ewa batwanelo kotɛmwa anima to?

¹⁹ Eokao ebatokaka wale ko l’eoka ya lisangi lia Mungu, bateke belimo yau ko la bekeeli bilau, ko nda besamba ya Bokeli Wolendelomo.