1 Petelo 3 - Le Nouveau Testament in Kele (Lokele) 1958

Lilitesani lia batomali la batolome

¹ Ongoma ino bali, litesaka balome banu angɛnɛ, litina mbo, eya mbo bamɔi batiimele Lioi lia Ngɛnɛ, limɔ iyo kɔɔsɔmɔ, inga la baoi, kangä ko la boyaeli wa bali bau,

² ani atɔɛnɛkɛ batolome limama la boyaeli wanu botanu.

³ Bɔfɛkɔ wanu boyalëke to ko wao ebole lousa, boko swee ya belowa, la lilɛngɔ lia mbela, la liwati lia bisinda ya bɔfɛkɔ kongo;

⁴ kangä bɔfɛkɔ eboisami nda botema wa boto, lilɛngɔ elitilasɛɛsɛlɛkɛ liko botema sambo la bɔfɔu, ebole la loketi lofi fafo nda baiso ba Mungu.

⁵ Eoka batomali ba kwaala lokɛsɛkɛlɛ iɛli shau ko ende Mungu, bawataka bɔfɛkɔ ongoma la balitesaka batolome bau,

⁶ kwa Sala alitesaka Abalayama, inde lotang’inde mbo— Ngɛnɛ wami; l’ani atokelak’ino ko bolau, wende bana bande nde owangeke iwaesa ango simɔi.

⁷ Ino batolome ko ongoma, yalanaka la bali banu la wɛlï ani otoenyela mbo botomali atiengane otolome la bofoka, eoka ino lau osowachana ndosangola bootaota wa loiko mbo basomboli banu batakufesomo.

⁸ Lioi lia tuu ko mbo, yalanaka la botema ɔmwito, okelanaka ngandi, samanaka la beoto ya Etanda, la shota la liikami se.

⁹ Otakundanëke bobe ko la bosakane, angoko limɔli eoka ya limɔli, kangä la lifotesi lia lɔkɛmɔ, eoka watomoko lioi ko la litina-li mbo osangoleke lioi lia lɔkɛmɔ.

¹⁰ Eoka, inde oyalɛmbi ko ndosama liwawi-li la ndɔɛnɛ bacho balau, Akufeseke lolamɛ loande lotaonga bobe, la bɔnɔkɔ nda bɔlɔwane;

¹¹ Aloteke mboka ya obe, akeleke ko olau, Alukeke lilatemi ko ndotutaka liao.

¹² Eoka baiso ba Mungu basowɛlɛ eba liengani bonono, Batoi bande batolaila basomboli bau Nde bɔmbɔ wa Ngɛnɛ bole la wuno ani atoticha ebatokelaka bobe.

Likongolomu loasɔ loa Liengani

¹³ ¿Ndai kokeel’ino obe eyambo bofumbaka ndokela olau?

¹⁴ Kongo ko bookaka wale loasɔ loa liengani, ambo wende la limɛngɔ fuu! Owangëke iyo, otatemëke;

¹⁵ Uchaka Masiya kwa Ngɛnɛ wa betema yanu. Yalakaka la baoi ba limutoli liomutoela boto oyatofelak’ino litina lia iɛli esile lanu, kongo ko mutolaka ko la liikami se la lilitesi;

¹⁶ elembeelo ya njasɔ eyaleke ko la botanu, litina mbo eyekamɔlɔmɔkɔ ino, ebatotɔngɔkɔ boyaeli wanu olau wa Masiya, kofakomo ngo ko sɔni.

¹⁷ Losolongela bolau mbo ino wokeke wale ko eoka yokelaka olau, eya to mbo Mungu esanga ongoma, inga to eoka yokelaka bobe.

¹⁸ Eoka Masiya awaka loasɔ loa batwanelo ba bato, ko liwa limɔi, ewa liengani awelaka ebati la liao, mbo aeshelek’iso ende Mungu; aolomoko nda boyaeli wa bolomboki, afaefomoko loiko la Bolimo.

¹⁹ Ko la Bolimo akɛkɛ okanangoela belimo nda ekandelo,

²⁰ bako ebatefolaka lioi lia Mungu kwaala nda mbile eyaumwaka Mungu ndoumbakela angowa esole nda bacho ba Noa eyakelomokö watɔ wa liuwesi, nda wao ko bamyɔ kongo, bako bato bonanɛi, bauwesomoko la balia.

²¹ Loende ikweelo sha lilufi elitouwes’ino kwani, inga lisooli lia lilo lia bindo, kangä tele ya elembeelo elau ende Mungu, ko l’eoka ya litɛmwi lia Yesu Masiya nda liwa,

²² oyakɛkɛ nda Use, oyayali kwani nda bosamba w’olome wa Mungu, omao ko bakitomo la tososha la befoka bitotina bisokakalesomo kakala ko lande.