1 Petelo 2 - Le Nouveau Testament in Kele (Lokele) 1958

¹ Eokao sɛnyanaka la bobe wa bɛfɔnɔ bitoti la belimbakeli bitoti, la nanga, la funo la basɛɔli batoti;

² kwa atofumbaka banaoli, ino fumbaka ko ongoma ndɔɔlɔ baɛlɛ ba njasɔ ya bolimo, mbo okondeke ko la bao nda liuwesi,

³ ani osotalɛtɛ mbo Ngɛnɛ wasu ale la booto.

Boyaeli wa Bofindi wa Mungu boko Etanda

⁴ Yauku to end’Inde, ako litalɛ elile la liwawi, elisofekomo la bato, nde nda baiso ba Mungu lisoaomo la lisolitesomo;

⁵ ino angɛnɛ imɔ yalaka batalɛ ebale la liwawi, ebatoswomo la ndakɔ ya bolimo, mbo ino boyaleke botükä wa Kanga ebiüehomu ndotambaka bafaefi ba betema ebengani ndoaelomo la Mungu ko l’eoka ya Yesu Masiya.

⁶ Losotomo to nda lokasa mbo— Tɛnɛ ngo, nda Siona isoswa litalɛ lia ikululu, Elisoaomo la elisolitesomo la boto oyatolendelo Inde aitokesomo sɔni!

⁷ Eokao, end’ino ebasolendelo Inde ale lɔkɛmɔ, nde ende ebaitolendelo, ale Litalɛ elisofekelomo la baswi, Nde liao lisoswomo nda botö wa ndakɔ.

⁸ La mbo— Litalɛ liokwes’ato tolango la litalɛ liowaka bakulya; ebaitolitesa wɛndi eoka batokwa tolango, kwa akomyomoko ko oso.

⁹ Nde ino wende balomboki ebasoaomo, botükä wa Kanga ya Bɔkɔta, tukela ya bato ebüchomu, la bato ebasoomana la Mungu kongo, mbo oteke boekï wa tolombo etwakelak’Inde oyatak’ino lioi liosekwa nda lilima oyaɔtɔkɔ nda eloande löwa lomwaalomo.

¹⁰ Oso otiaaka bofindi wa bato, nde kwani wende bofindi wa Mungu; oso otiaɔlɔkɔ shota, nde kwani osɔɔlɔ shota.

Boyaeli wa bato ba Mungu nda baiso ba bato

¹¹ Basamomu, isoombak’ino ebayali kwa bato ebasolimela la bɛɛnda nda wenda-bo, mbo ofekeke yɛmɛ ya bindo ebitonana bita la belimo yanu.

¹² Yalakaka la boyaeli bolau sisi ya bato ba wenda, litina mbo, atosɛɔlɔ iyo osɛɔl’ino, mbo wende ebatokelaka obe, bɛnɛkɛ ko bekeeli ilau la beineleke ko Mungu nda lise elikayek’Inde end’iyo.

¹³ Litesaka baiti batotina bau ebale l’isosha ende bato, eoka ya Ngɛnɛ wasu; ango ende Bɔkɔta oyalongeli,

¹⁴ ango ende Bekumi ebasotomomo lande ndokucha ebatokelaka obe, la ndoomalesa ebatokelaka olau.

¹⁵ Eoka ongoma lisangi lia Mungu lile mbo bekeeli yanu bilau biyaleseke bato ba bibebe ko tau ani atoongak’iyo baoi ba botutuku.

¹⁶ Kwa ayal’ino toote, otangëke mbo iote shanu sile ko fofe yokelaka bobe, kongo ko yalaka bɛkɔwa ya Mungu.

¹⁷ Litesaka bato batotina, samaka beoto ya Etanda, wangaka Mungu angɛnɛ, litesaka Bɔkɔta oyalongeli!

Bakuwi

¹⁸ Bakuwi, litesaka bangɛnɛ banu la bɔwa finɛ, inga ko ebale la olau la bɔfɔu kongo, kangä imɔ ko ebakokelak’ino efinole.

¹⁹ Eoka eya to mbo boto oyaenyeli nde Mungu, etendela ndoka wale ko l’angwɛnɛ litina, ongoma inde koomalesa Mungu;

²⁰ ¿Nde bokela obe, l’aɛ koomakomo mbaka, botendela la bɔfɔu, otɔɔlɔ loni to lokuku? Kongo ko, bokelaka bolau, l’aɛ kookesomoko wale, botendela wao la olau, ani otoomalesa nde Mungu.

²¹ Eoka otomu nde lioi ko la litina-li, mbo Masiya looka wale ko l’eoka yanu, ongoma Inde lotikel’ino etichelo mbo otuteleke banyata bande.

²² Atiakelaka loasɔ lobe, la limutoli lia bolimbake litiaokomoko nda bɔnɔkɔ wande;

²³ amɔlɔkɔmɔkɔ Inde, atiamutolaka la limɔli, okekesomoko Inde biale, atiatak’iyo nganyä, nde Inde lomacha loasɔ ko ende Mungu oyatoataka loao ko la liengani.

²⁴ Inde angɛnɛ atolaka batwanelo nda bindo yande nda isandu sha lieka, mbo toweleke batwanelo basu la mbo toikeke ko la liengani.

²⁵ Ko la bakambile bande, ino nd’asosäsesomo säsosäso. Eoka ino nd’alotalotaka kwa bɛkɔkɔ, nde kwani osoinwaka ende Botingani la Bokuki wa belimo yanu.