1 Batesalonika 4 - Le Nouveau Testament in Kele (Lokele) 1958

Beimo la Bakakanelo ende eb’Etanda

¹ TUU ya loasɔ, Bitungani, tosoomba la tosolɔmbɔkɔl’ino nda lina lia Ngɛnɛ wasu ako Yesu, mbo kwa okak’ino end’iso loasɔ loa boyaeli wanu wa bɔkɛndɛli wanu, la boomaleseli woomalesa Mungu, la kwa atokelaka ino ko kwani, mbo takɛndɛlɛkɛ to oso nda wao.

² Eoka oluwi nde bakakanelo ebatelak’iso etel’ino la isosha sha Ngɛnɛ wasu ako Yesu.

³ Eoka eli liende lisangi lia Mungu, liko liüchomu litanu lianu, mbo bokileke ndotwa nyongo;

⁴ la mbo boto la boto wanu aluweke ndɔɔlɔ wali wande angɛnɛ ewüchomu la lolitesomo,

⁵ inga to la ifoifoi sha yɛmɛ ya bolëfë kwa esha tukela yasi ya wenda ebatiluwe Mungu,

⁶ mbo boto atalimba etungani yande ndokeel’inde litwanelo nda loasɔ-lo. Eoka Ngɛnɛ wasu nd’ayali Bosakanesi wa njasɔ bitotina-bi, kwa asotaonga’mi lanu oso ndoaesel’ino litina se la wɛlï.

⁷ Eoka Mungu atit’iso lioi mbo toyaleke la bɔlɛlɔ kangä mbo tüchomoko la botanu.

⁸ Eokao, oyatotefola ekela-ye, atitefole bolomboki, kangä to Mungu oyasofaekef’ino Bolimo Botanu.

⁹ Nde nda loasɔ loa lisamani lia bitungani, oti ango la boeno wɔsɔnɛlɔmɔ lokasa, eoka ino angɛnɛ osoekesomo la Mungu ndosamakana;

¹⁰ eingo ino nd’asami bitungani bitotina nda yese etotina ya Makedonia. Kongo ko tosolɔmbɔkɔl’ino Bitungani ndokelak’imɔ ongoma la ndoetela eloa oso,

¹¹ la fɔɔlɔkɔ ko ndɔɔngɛsɛ njasɔ la lilatemi la ndotimbakana, boto la boto ko loasɔ loande angɛnɛ la ndokelaka likuwa la besamba yanu angɛnɛ, kwa asokambes’iso ekambes’ino oso,

¹² litina mbo boyaeli wanu boenganeke nda baiso ba bato ebati b’Etanda la mbo botaeno boto angɔmɔi wosung’ino.

Loasɔ loa eb’Etanda ebasoingala tɔlɔ twa liwa

¹³ Bitungani, totilɛmbɛ mbo oyaleke la botutuku nda loasɔ loa ebasoingala tɔlɔ twa liwa, mbo ino otawa ikɛnɛnɛ imɔ kwa bato basi ebati l’iɛli.

¹⁴ Eoka ango toimela mbo Yesu awaka la atɛmwaka liasi, ko ongoma ko la Yesu, Mungu atotolanesa ebasoingala tɔlɔ amamwito lande.

¹⁵ Eoka tosokambes’ino e-loasɔ-lo ko la lioi lia Ngɛnɛ, liko mbo iso ebakayaleke la liwawi la ebakatikaleke ko nda bayelo ba Ngɛnɛ, totiaetelek’iyo oso ebaingalaka tɔlɔ;

¹⁶ eoka Ngɛnɛ ko Inde angɛnɛ nd’atoya se la liamami lia isosha, la limiki lia bokitomo wa taïa, la ifonge sha Mungu oyatosokwa nda Use, limɔ ebawaka ko ende Yesu, belatɛmwaka oso;

¹⁷ lamao iso ebakatikaleke la liwawi, tolailakomoko amamwito lau ko nda bafita ndokatowana la Ngɛnɛ k’olo likolo, ko ongoma tolayalaka nde layalaya amamwito la Ngɛnɛ.

¹⁸ Eokao latemesaka betema ko la e baoi-ba.