1 Batesalonika 1 - Le Nouveau Testament in Kele (Lokele) 1958

¹ Paulo la Silwano la Timoteo, iso tosotoma lokasa-lo ende eb’Etanda ya Tesalonika eyomani la Mungu Sango la Ngɛnɛ wasu ako Yesu Masiya. Booto la lilatemi biyaleke lanu!

² Totofaekefa Mungu kelekele eoka yanu mbile la mbile ani totosingwaka baina banu nda basomboli basu;

³ toitomacha ndoenyakela likuwa lia liimeli lianu la bonui wa losamɔ loanu la bokokomu wa iɛli shanu loasɔ loa Ngɛnɛ wasu ako Yesu Masiya, nda baiso ba Mungu Sango wasu.

⁴ Eoka, Bitungani ebasamomu ba Mungu, tosoluwa mbo bosoaomo lande;

⁵ eoka Mboli Ilau ebitonangol’iso, bitiayak’end’ino ko la lioi lia bɔnɔkɔ kongo, kangä imɔ la bofoka la isosha sha Bolimo Botanu la yao lokuliomo lanu finɛ, ongoma to oluwi nde bɔfɔnɔ wa bato ewayalak’iso sisi yanu ko l’eoka yanu;

⁶ la ino lokweekel’iso la Ngɛnɛ wasu ani aimelak’ino wɛndi ko la bifembi wike, amamwito La bootaota wa Bolimo Botanu;

⁷ ko ongoma ino bosoɛnɛlɛ kwa etichelo ende ebimeli batotina nda yese ya Makedonia l’eya Akaiya lisanga.

⁸ Eoka wɛndi wa Ngɛnɛ bosokuswa end’ino okokana kwa ifonge, inga to nda Makedonia la Akaiya kongo, kangä imɔ nda biese bitotina, lilendelu lianu liolendelo Mungu lisomelana, la ongoma iso totieno imɔ ndoonga lioi ango limɔi.

⁹ Eoka bato ana angɛnɛ batomelekesa mboli ya fɛtɛti yasu olo eyanu la mbo wamachaka bɛfɔnɔ ya mungu ndokikwa ende Mungu wa wewe oyale la liwawi, ndoyala bɛkɔwa ya Mungu angɛnɛ,

¹⁰ la ndoumbakela Wana wande ani akasulweke Inde se nda Use, Mungu atɛmolɔk’ïnde nda liwa, ako Yesu oyasɔɔnɔkɔlɔk’iso nda efango eyekayeke.