1 Bakolinto 9 - Le Nouveau Testament in Kele (Lokele) 1958

Boyaeli wa Paulo angɛnɛ

¹ ¿Boyaeli wami angɛnɛ moni? ¿Iisofaikolomo bokili wa bikela ya Mɔsɛ? ¿Iti to Botomomu? ¿Itiɛnɛkɛ Yesu Ngɛnɛ wasu? ¿Oisowatekema la Ngɛnɛ Yesu ko l’eoka ya likuwa liami?

² Ambo bamɔi basi beenyela mbo imi iti Botomomu nde yende ewanu Botomomu; ino wende ndembe ya chapa ya lotomomo loami la Ngɛnɛ end’ino.

³ Isomutoela to ebatokɔtɔlɔ’mi ko la baoi-ba.

⁴ ¿Mbo iso Batomomu toti l’isosha shɔɔlɔ yeka yola la yomwa?

⁵ ¿Mbo toti l’isosha shokɛsɛnɛ la wali oyale l’Etanda, kwa atokelaka batomomu ebamɔi la bitungani ya Ngɛnɛ la Kefa imɔ?

⁶ ¿Mbo iso lami la Balanaba kongo toti l’isosha shomacha likuwa lia besamba yasu angɛnɛ?

⁷ ¿Boni to bosilikani atolaka bieka ebisomb’inde angɛnɛ? ¿Oyatokuwa elanga aitolaka yeka ya eula? ¿Botingani wa liasa lia mbuli angotamwa baɛlɛ ba liasa?

⁸ ¿Mbo isoonga ongoma ko l’isosha sha bato kongo? ¿Kwa mbo bikela ya Mɔsɛ biisoonga ko ongoma?

⁹ Nda Lokasa loa bikela ya Mɔsɛ loasɔnɔmɔkɔ mbo— Okandëke bolomba wa mbolo oyatomatekela befonga nda etwangelo.

¹⁰ ¿Mbo Mungu asokɛsɛ ko mbolo iyɛli kongo? ¿Mbo aisoonga ongoma ko l’eoka yasu? Lioi-li losɔnɔmɔ nde eoka yasu mbo bokuwaki w’elanga la oyatotwaka eula bakeleke likuwa ko l’iyɛli sholaka bieka ya eula.

¹¹ ¿Iso tolɔɔ koto ya Bolimo nda eyanu betema, lole to loasɔ lofi mbo iso kɔɔlɔ likaɔ lia eyanu bieka ya bindo?

¹² ¿Ango basi befomo to likaɔ ko l’isosha shanu, simbi to iso kofomo i? Kongo ko totifote ko l’eoka ya Isosha shɔ̈ɔlɔ likaɔ nde tosotendela boeno mbo totakufesa likɛndɛsi lia Mboli Ilau ya Masiya.

¹³ ¿Botiluweke mbo ba kanga ebatokuwela esemoelo ya Mungu nd’atɔɔlɔ likaɔ lia bieka omao la mbo ebatotambaka bafaefi nda etambelo nd’atɔɔlɔ likaɔ lia bafaefi?

¹⁴ Ko ongoma imɔ Ngɛnɛ wasu ataka ekela mbo ebatonangokola Mboli Ilau bɛnɛkɛ yeka yoengana beeno yau ko nda yao.

¹⁵ Kongo ko im’itiɔ̈lɛ ango shaya eoka ya isosha-si la itisɔnɛ baoi-ba mbo yɔlɛkɛ bieka ongoma; losoeta la olau mbo itawaka, inga to mbo boto kotombola liomali liami lionangola wawa;

¹⁶ eoka ango yenangolaka Mboli Ilau, iti to la litina lioyala la bɔmɛtɔ eoka lwende ngo lotimbana loami kongo la liömä liwɛlɛmɛkɛ ende’mi ani itinangole Mboli Ilau.

¹⁷ Yenangola to la lisangi liami, ani imi kɔɔlɔ bondanda olau, nde la wuno likuwa lile kwa elia bɔkɔwa.

¹⁸ ¿Boni to bondanda ebokɔɔlɛkɛ’mi? Ebo kongo, mbo itonangola Mboli Ilau lifaefela angofota l’isosha nda linangoli lia yao.

¹⁹ Eoka kwa asoyala’mi iyote sha boto, isoyala bɔkɔwa wa batotina ko la lisangi liami angɛnɛ mbo yɔlɛkɛ ambɔlɛ wa bato botuta Ngɛnɛ.

²⁰ Yakɛkɛ ende BaYuda kwa WaYuda mbo yɔlɛkɛ BaYuda, yakɛkɛ ende ebatolitesa Bikela ya Mɔsɛ kwa ɔmɔi wau angɛnɛ-ani iti wau wewembo yɔlɛkɛ balitesi ba Bikela;

²¹ yakɛkɛ ende ebatilitese Bikela kwa ɔmɔi oyatilitese Bikela inga mbo itilitese Mungu, eoka itolitesa Bikela ya Masiya angɛnɛ— mbo yɔlɛkɛ ebatilitese Bikela.

²² Ende eba ɛlɛli, yayalaka l’ɛlɛli mbo yɔlɛkɛ eba ɛlɛli. Isotayala kwa bɛfɔnɔ ya batotina mbo yuweseke bamɔi bau batotina.

²³ Itokelaka ongoma ko l’eoka ya Mboli Ilau mbo yɔlɛkɛ likaɔ lia Mboli Ilau la liuwesi lia yao amamwito lau.

²⁴ ¿Botiluweke mbo nda fɔmbi yokɛsɛnɛ mangu batotina nd’atokwaka mangu, ko ɔmɔi kongo nd’atɔɔlɔ bondanda wa bolongi; kwaka to ongoma mbo ɔsɛkɛ wao!

²⁵ Oso wa lise lia fɔmbi batotina ebatofumba ndolonga batokakalesa yɛmɛ ya bindo; iyo batofumba mbo baɔlɛkɛ bondanda ebotobɛɛkɛlɛ nde iso ko wao ebotilasɛɛsɛlɛ imɔ.

²⁶ Imi nd’atokwaka mangu ko ongoma, fii nda mboka; asonana’mi liangɔ, iitofaliana ko besamba wawa,

²⁷ nde itonana la bindo yami angɛnɛ ndokakalesa yao kwa bɔkɔwa wami, litina mbo imi ako ikomya sha linangoli, itafekomoko.