1 Bakolinto 6 - Le Nouveau Testament in Kele (Lokele) 1958

Bato b’Etanda bakomyeke njasɔ yau nda Ikumbɛ sha Etanda

¹ ¿Ndai wanu eyala la loasɔ ende wasi w’Etanda kotendela ndɔkɛ okakomya loao nda likita, inga nda ikumbɛ sh’Etanda?

² ¿La otiluwe mbo eb’Etanda nd’atokomya njasɔ ya bato ba wenda? ¿Eya to mbo wenda bototi bokomyiomoko ko lanu, otiengane ndokomya tonja njasɔ angɛnɛ?

³ ¿Otiluwe mbo totokomyia njasɔ ya bakitomo, asa kɔni eya liwawi-li?

⁴ ¿Boyala to la njasɔ ya bɔfɔnɔ-bo, monito otokɛ la yao ende ebatilitesomo lanu nda Etanda?

⁵ Isoonga ongoma mbo okeke sɔni. ¿Mbo boti la boto angɔmɔi wa wɛlï oyatokɔkɔlɔ ndokomyel’ino bitungani ya Etanda njasɔ;

⁶ kangä mbo oto w’Etanda kɔkɛsɛ loasɔ loa wina nda likomyi ko oso wa bato ebatiimele?

⁷ Ongoma wende to la litwanelo eoka mbo otokɛsɛnɛ nda likita la njasɔ yanu. ¿Loisoeta olau ndokelomo obe, lotiengane ndolimbomo la ndomɛsɛlɛ loao?

⁸ Kongo ko ino angɛnɛ nd’atokela obe la otolimbaka ango baina ba Etanda angɛnɛ.

Beimo eoka ya njasɔ ya bɔwɛwɛ

⁹ ¿Otiluwe mbo ebati la liengani batisangole elela nda Bɔkɔta wa Mungu? Olimbomöko nda betema yanu; eba belëfë, ebatosemola bɛfɔnɔ, eba nyongo, l’ebatotombolana bindo la tosumbe,

¹⁰ l’eba biya, eba bolole, ebatowaka bänä, ebatomɔlɔkɔ bato, eba booni, ambo batotina-ba batisangole Bɔkɔta wa Mungu.

¹¹ Wayalaka nde bamɔi banu, ko l’ebɔfɔnɔ-bo, kongo ko ososoolomo batwanelo, osüchomo nda Etanda, osoenganesomo eoka ya lina lia Ngɛnɛ Yesu Masiya la eoka ya Bolimo wa Mungu wasu.

¹² Boto eonga mbo— Bitotina biengani nde lami ndokela; nde bitotina bitisangele la bolau. Beonga mbo— Bitotina biengani lami ndokela; kongo ko imi itiyokakalesomoko la yɛmɛ ango ɛmɔi.

¹³ Bieka yola biyali loasɔ loa sɔlɔ la sɔlɔ ko loasɔ loa bieka, la Mungu atosɛɛsɛlɛsɛ yao imbale. Bindo etikelomo ko eoka ya bolëfë, kangä eoka ya Ngɛnɛ la Ngɛnɛ wasu imɔ ko l’eoka ya bindo.

¹⁴ Mungu nd’atɛmwɛsɛkɛ Ngɛnɛ wasu nda liwa, limɔ ɛtɛmwɛsɛkɛ imɔ ko iso ko la bofoka wande.

¹⁵ ¿Otiluwe mbo bindo yanu bende bilengo ya Masiya? ¿Yɔsɛkɛ to bilengo ya Masiya ndowachaka yao l’ewa bolëfë? Mbayo, ango sinyo!

¹⁶ ¿Oisoluwa mbo boto oyatowatema la botomali wa bolëfë, ambo iyo yaambale bende ko bindo emwito? Eoka Lokasa loa Mungu mbo— Iyo yaambale beyalaka nde ko bindo emwito.

¹⁷ Nde oyatowatema la Ngɛnɛ ale lande ko bolimo ɔmwito.

¹⁸ Kwelaka bolëfë botili fwaa! Njasɔ ibe yasi bitotina ebitokela boto bitikelakomo nda bindo angɛnɛ, nde botwaki wa bolëfë bosobebesa bindo yande angɛnɛ.

¹⁹ Otiluwe imɔ mbo bindo yaɛ ende eyaelo ya Bolimo Botanu oyale atiteni laɛ Oyasokwaka ende Mungu?

²⁰ Otiomane lanu angɛnɛ, wasombomoko la bolïli. Eokao omalesaka Mungu ko la bindo yanu.