1 Bakolinto 5 - Le Nouveau Testament in Kele (Lokele) 1958

Loasɔ loa nyongo elotikomyomo nda Etanda

¹ Mboli ya nyongo ya ɔmɔi wanu bisomelana finɛ, ende nyongo ibe eyetiluwane ango ende basenji, mbo ɔmɔi wanu asosɔngɔ wali wa sango wande,

² la osoënda la esaela! ¿Lotiete olau mbo oweke sɔni la mbo oyasokela loasɔ-lo asokolomoko sisi yanu?

³ Imi moni? Bindo yami yende esika lanu, nde bolimo wami bole tina lanu, la kwa asoyala to’mi tina lanu, isosila ndotena loasɔ loa boto oyasokela ongoma,

⁴ atosɔngɔmɔ’ino nda lina lia Ngɛnɛ Yesu la akayaleke ino amamwito la bolimo wami ko la bofoka wa Ngɛnɛ wasu ako Yesu,

⁵ kokɛsɛ botoyo obe ende Satana mbo bindo yande esɛɛsɛlɛkɛ mbo bolimo wande angɛnɛ buwesomoko nda Lise lifi lia Ngɛnɛ wasu.

⁶ Baoi banu ba esaela bati balau. ¿Otiluwe mbo sinyo sha bänä ba lilaka sitokɔkɔlɔ ndokakesa lituma litotina elisobiomu la shao?

⁷ Tasokolaka to lilaka elisokaka mbo oyaleke kwa lituma lina litanu liesi; Masiya asoolomo to loasɔ loasu kwa aolomoko nyama ya Elambɔ ya Lieti.

⁸ Ongoma, toleke to Elambɔ, inga la lituma elisoɔlɔ, elile la lilaka lia yɛmɛ ibe, kangä la lituma elitisobiomo la yeka, nde lile elia momongo angɛnɛ.

⁹ Yasɔnɔkɔ nda lokasa loami mbo— Oyalanëke l’ebatotwa nyongo;

¹⁰ nde inga to loasɔ loa eba wenda angɛnɛ ebati b’Etanda, kwa eba bolole, l’eba booni, kwa ebatosemola bɛfɔnɔ ya mungu, eoka ongoma engani nde ko ndosokwa nda wenda-bo.

¹¹ Nde isɔni nde kwani mbo— Oyalëke la etungani w’Etanda oyale oto wa nyongo, wa bolole, wa lisemoli lia befɔnɔ ya mungu, oyatomɔlɔkɔ bato, oyatowaka bänä, la booni, oyalanëke la bɔfɔnɔ-bo wa boto, angola ango lande bieka!

¹² ¿Ikomyeke bato ebati ba Etanda litina moni? ¿Loisoyala loanu ndokomya bato angɛnɛ b’Etanda?

¹³ Mungu nd’atokomya ebale lousa loa Etanda. Kusolaka boto ona obe lousa loa Etanda.