1 Bakolinto 3 - Le Nouveau Testament in Kele (Lokele) 1958

Liekesi lia Etanda ya Masiya

¹ Nde, Bitungani yami, itikɔkɔlɛkɛ ndoonga lanu kwa atoonga’mi la bato ebasoluwana la Bolimo, kangä kwa mbo wende balomboki kongo, ango ko kwa mbo bana baoli ba Masiya;

² yamwesak’ino ko baɛlɛ kongo, itilesek’ino yinjo ya nyama eoka otitakɔkɔlɔkɔ ndola yao.

³ Eingo ko kwanikwani imɔ okakɔkɔli ndola yao, eoka okoyali nde balomboki, inga eba Bolimo. Kwa ayali ino la liya la liwesani sisi yanu, ¿loti to la litina mbo wende ko bato angɛnɛ ebati la Bolimo, ani otokelaka kwa atokela balomboki?

⁴ ¿Atoonga ɔmɔi mbo— Imi nd’ale to wa Paulo, la wasi mbo— Imi yende wa Apolo, eti to mbo wende ko balomboki kongo?

⁵ ¿Apolo ale to ndai? ¿Paulo ende ndai? Tole ngo ko basungi ba Ngɛnɛ ebatosung’ino nda liimeli kwa asofa Ngɛnɛ ofaefa oto la oto.

⁶ Imi isolɔɔ koto; Apolo asowɛlɛ yao balia, kongo ko Mungu nd’atokondesa yao.

⁷ Ongoma la bɔlɔi la bɔwɛli wa balia bati yeka, kangä Oyatokondesa yao ako Mungu.

⁸ Nde bɔlɔi la bɔwɛli wa balia bende ko ɔmwito, batitwane, nde oto la oto atofomo ewande bondanda eoka ya eliande likuwa.

⁹ Twende to bakuwani amamwito la Mungu; ino wende elanga ya Mungu, wende imɔ ndakɔ eyetoswomo la Mungu.

¹⁰ Kwa bonyafala wa elalaka oyasoakola ndoswa lionda lia ndakɔ, imi imɔ isoswa lionda lia ndakɔ ya Etanda ko la isosha esifomu’mi la Mungu, la wasi nd’atoswa likolo lia liao. Oto la oto asweke likolo lia liao la wɛlï la wɛlï to!

¹¹ Eoka lionda elisoswomo nda nyɛlɛ, oto wasi atikɔkɔlɛ ndoswa liasi, sakolo ko elisoswomo oso liko Yesu Masiya.

¹² Nde boto eswa ndakɔ likolo lia lionda, ango bieto ya loketi, kwa pata kwa batalɛ ba bɔfɛkɔ, kwa baonga, kwa bangala, kwa kasa kongo, nde

¹³ likuwa lia oto la oto litɔɛnɛlɛ fololo; Lise lina lifi litotombola liao eoka litoisolomo ngo ko la bösä la bösä botokɔtɔlɔ bɔfɔnɔ wa likuwa lia oto la oto.

¹⁴ Eyambo likuwa elisoswa oto nda lionda likɔkɔmɔ, ani oto-yo kɔɔlɔ bondanda;

¹⁵ nde eyambo likuwa lia oto lifechomo, likuwa angɛnɛ lisowa, kongo ko inde angɛnɛ atouwesomo, ambo kwa oto oyasɔɔnɔkɔlɔmɔ nda wambe wa bösä.

¹⁶ ¿Otiluweke mbo wende eyaelo ya Mungu la mbo Bolimo wa Mungu akoyali atiteni yanu?

¹⁷ Boto ebebesa eyaelo ya Mungu, Mungu kobebesa oto ona, eoka eyaelo ya Mungu esüchomo ko eoka yande la ino wende eyaelo ena.

¹⁸ Boto atalimba botema wande angɛnɛ; ɔmɔi wanu eenyela mbo ende la wɛlï finɛ nda njasɔ ya wenda-bo, akinjweke ko ebebe mbo ayaleke la wɛlï wa Mungu.

¹⁹ Eoka wɛlï wa e-wenda-bo bole ko bibebe nda baiso ba Mungu, eoka kwa asɔnɔmɔkɔ loao nda Lokasa, mbo— Atokusamela eba wɛlï nda shɔngɔlɔ shau angɛnɛ; la liasi mbo—

²⁰ Mungu nd’aluwi tofenya twa eba wɛlï, mbo tole ngo ko wawa kongo.

²¹ Ongoma to, oomalëke loasɔ loa bato, eoka bitotina yende eyanu,

²² angoko Paulo, kwa Apolo, kwa Kefa, kwa wenda-bo, kwa liwawi, kwa liwa, kwa njasɔ ya mbile-ye, kwa ebikayeke mbisa, ambo bitotina fɛɛ yende yanu;

²³ kongo ino wende eba Masiya, la Masiya ale wa Mungu.