1 Bakolinto 2 - Le Nouveau Testament in Kele (Lokele) 1958

Wɛlï wa bato la ewa Mungu bitisangane

¹ Nde ayaka’mi end’ino, bitungani, itiayaka la baoi b’isosha sifi angoko ba wɛli bonangoel’ino inango sha wewe sha Mungu,

² eoka yasangaka mbo imi angoluwa loasɔ loasi lonangoel’ino sakolo ngo ko eloa Yesu Masiya la liwa liande nda lieka.

³ Nde imi nd’ayaka end’ino la bɔlɛmbu wa bindo, la bɔwa la liwangi finɛ;

⁴ ongoma lioi liami la inango shami sitiayalaka la baoi boimelomo wimelaimela, kangä baoi bɔɛnɛsɛ ino Bolimo la bofoka wa Mungu,

⁵ mbo lilendelu lianu litalendelo wɛlï wa bato kangä bofoka wa Mungu.

⁶ Totoonga ndoonga to njasɔ ya wɛlï ende batowange nda liimeli, nde boti wɛlï wa wenda-bo ango ewa bakakalesi ba wenda-bo ebelasɛɛsɛlɛkɛ;

⁷ kongo ko totoonga loasɔ loa wɛlï wa Mungu angɛnɛ ebotiaaka woongomo oso, ewaisomökö kwala, ewasangak’Inde likomyi osooso, ko oso wa wenda, mbo aiyesek’iso nda tala yande.

⁸ Angwɛnɛ angɔmɔi wa bakakalesi ba wenda-bo nd’aluwaka wao, eoka eyambo baluwa ani batiaolaka Ngɛnɛ wa Tala nda lieka;

⁹ kongo ko kwa asɔnɔmɔkɔ nda Lokasa mbo— Liso likɛni, litoi likoki, botema wa bolomboki bokaenyeli Njasɔ ebisokomya Mungu eoka ya ebatosamaka Inde,

¹⁰ nde Mungu asoisoel’iso yao ko la Bolimo eoka Bolimo atɔɛlɛlɛ mbo aluweke bitotina, imɔ ko eya Mungu ebiisomu mbii.

¹¹ ¿Boni oto nd’aluwi baenyeli ba oto sakolo ko bolimo wa boto nd’atiteni yande angɛnɛ? Ko ongoma angwɛnɛ nd’aluwi baenyeli ba Mungu, sakolo ko Bolimo wa Mungu.

¹² Iso totiaɔlɔkɔ̈ to bolimo wa wenda-bo, kangä Bolimo wa Mungu mbo toluweke yao ina ebiafaefomoko iso ko la Mungu,

¹³ yao ina ebitonangol’iso, inga to ko nda baoi boekesomo ko la wɛlï wa bato angɛnɛ, kangä eboekesomoko la Bolimo wa Mungu, la nda liekesi ndokweela eya Bolimo ende ebasɛɛli Bolimo.

¹⁴ Bolomboki angɛnɛ angolembeela to njasɔ eyafaefomoko ko la Bolimo wa Mungu eoka end’inde bende ko bibebe, la atikɔkɔlɛ ndoluwa yao eoka bitolembeelomo ko la lisungi lia Bolimo kongo.

¹⁵ Nde boto oyasosungomo la Bolimo atolembeela boyaeli wa bitotina, nde inde angɛnɛ atikɔtɔlɔmɔ la boto angɔmɔi.

¹⁶ ¿Ndai to aluwi baenyeli ba Ngɛnɛ, ndai kotwa lande kuko? (Yesaya 40, 13) Iso nd’aluwi to baenyeli ba Masiya.