1 Bakolinto 14 - Le Nouveau Testament in Kele (Lokele) 1958

Litɔndɔli la linangoli la liekesi

¹ Fumbaka ndoosha losamɔ-lo la lolaka imɔ bafaefi ba Bolimo, nde simbi to mbo boyaleke Batɔndɔli;

² eoka oyatonangola nda baoi ebatiluwane, ationge la bato kangä la Mungu; angwɛnɛ to boto boluwa litina lia lioi liande eoka ko la Bolimo asoonga njasɔ ebisoisomo ende bato.

³ Kongo ko oyatotɔndɔlɔ, asoonga la balomboki baoi bokɔkɔmɛsɛ la bofumbesa la bolatemesa betema yau.

⁴ Oyatoonga la baoi ebatiluwane atokɔkɔmɛsɛ botema wande angɛnɛ, nde oyatotɔndɔlɔ atokɔkɔmɛsɛ Etanda.

⁵ Ilɛmbi nde ino yaatotina ndoonga la baoi ebatiluwane, kongo ko elosolongela finɛ lole mbo boyaleke Batɔndɔli. Oyatotɔndɔlɔ alongeli nde oyatoonga la baoi ebatiluwane, sakolo ngo ko boto kokikola baoi-ba mbo Etanda baɔlɛkɛ bokɔkɔmu ongoma.

⁶ ¿Kongo ko, Bitungani yami, ango yeya end’ino ndoyaonga baoi bana, imi kɔɔlɛs’ino boni bolau ani itionge lanu baoi boisokola litina, kwa boluwes’ino loasɔ, kwa litɔndɔli, kwa liekesi?

⁷ ¿Ongoma imɔ bofilingi la likwengu ebile ko yeka ebiti la liwawi, eyambo bitikusole limiki la limiki lia eliande kanda, ndai koluwa bɔɛlɛ kwa ewa bofiling kwa ewa likwengu?

⁸ ¿Eya to mbo ifonge sha bita siyowana limiki, ndai kotonja biɛla yonana?

⁹ End’ino ko ongoma; ¿Eyambo boonga baoi ebatiluwane litina, bato koluwa ebiongomu la moni? Ani otoonga ngo ko la lofofo kongo.

¹⁰ Baoi ba kanda la kanda bayali nda wenda-bo, angwɛnɛ fee, angwɛnɛ eliti la eliande litina,

¹¹ nde ani itiluwe litina lia baoi-ba, yende ko boto boyowayowa nda baoi, la oyatoonga imɔ ale ko bɔɛnda ende’mi.

¹² End’ino ko ongoma; bolola bafaefi ba Bolimo, fumbaka ndolongela ko ndokɔkɔmɛsɛ Etanda kɔkɛ.

¹³ Eokao oyatoonga la baoi ebatiluwane, atasombolaka mbo afomoko imɔ ko bofoka wokikola baoi-ao;

¹⁴ eoka yesombola la baoi ebatiluwane, bolimo wami nd’atosombola, nde botema wami botiluwe litina.

¹⁵ ¿Loasɔ lole to moni? Itosombola la bolimo, itosombola imɔ ko la botema wami; itochwa bɔɛlɛ la bolimo, itochwa ko la botema imɔ.

¹⁶ Ango bofaefa Mungu kelekele ko la bolimo, limɔ boto wasi oyati la fofe yoluwa litina, inde koaola Ongoma mbisa ya lisomboli liaɛ lia kelekele? Eoka boto ona atiluwe elitoonga aɛ.

¹⁷ Ambo osoonga kelekele la olau finɛ, nde boto wasi ona atikɔkɔmɛsɔmɔ ongoma.

¹⁸ Isofaefa Mungu kelekele eoka mbo imi nd’asoonga la baoi bana, bolongel’ino yaatotina;

¹⁹ kongo ko ende’mi, isotalɛmbɛ ndoonga baoi bɔɔmwi boluwana litina nda Etanda, mbo bato basi imɔ baekesomoko, inga ndoonga baoi bilɛfu liu ebatiluwane litina la wɛlï.

²⁰ Bitungani yami, oyalëke kwa bana’oli nda baenyeli banu; kongo ko nda njasɔ ibe yalaka bana’oli, nde nda baenyeli banu yalaka ko batowange baoku.

²¹ Lososɔnɔmɔ nda Lokasa loa Bikela mbo— Itoonga la tukelaye ya bato ko la baoi ebatiluwane lau La ko la bɛnɔkɔ ya beenda, kongo ko baitokaka’mi, Mungu nd’aongaka ongoma.

²² Ongoma to, Bolimo asof’iso baoi ebatiluwane kwa ndembe end’iyo ebatiimele inga eoka ebasoimela kongo ko litɔndɔli liti eoka ya ebatiimele, kangä ebasoimela Lioi lia Ngɛnɛ.

²³ ¿Atosɔngɔmɔ to Etanda nda ɛsɔngɔmɛlɔ; eyambo batotina beongaka la baoi ebatiluwane, atɔɔtɔkɔ ebatiluwesomo njasɔ yanu l’ebatiimele, iyo baitoonga mbo bosowa loseka?

²⁴ Kongo ko eyambo batotina bɛtɔndɔlɔ, ɔmɔi l’ɔmɔi, limɔ oyatiimele angoko wembela wa oto ɛɔtɔ, atotombolomo njasɔ ibe yande ko lanu, atolembeela obe wande,

²⁵ la ebiisami nda botema wande bitoisolomo, limɔ atotulia bɔmbɔ se, atoinela Mungu la atoaola fololo mbo— Wewe, Mungu ale sisi yanu.

Likomyi lia bosemoeli wa Mungu

²⁶ ¿Bitungani yami, loasɔ lole to moni? Tɛnɛngo, atosɔngɔkɔmɔ ino, ɔmɔi ale la bɔɛlɛ, wasi ale la linangoli lia litina, wasi atoisola loasɔ lowau, wasi atoonga la baoi ebatiluwane litina, wasi atokikola lioi lina; nde bolau mbo bitotina bikelomoko ko mbo Etanda ekɔkɔmɛsɔmɔkɔ kɔkɛ.

²⁷ Eyambo boto eonga la baoi ebatiluwane, ambo ambale ango ko basatɔ kongo, angoetela; baongeke la lisho, limɔ wasi akikoleke baoi.

²⁸ Nde eya to mbo angwɛnɛ ikɔmi shokikola baoi, limɔ oyatoonga baoi ebatiluwane ayaleke ngo ko tau nda lisɔngɔmi lia Etanda, aongeke ko inde angɛnɛ la Mungu.

²⁹ Ebatotɔndɔlɔ baongeke kwa ambale, kwa asatɔ, limɔ ebamɔi balembeeleke litina kwa ayali liao.

³⁰ Nde eyambo Bolimo boisoela boto oyali se loasɔ lɔmɔi, limɔ oyasoonga oso koyala tau.

³¹ Ongoma to batotina batokɔkɔlɔ ndotɔndɔlɔ, ɔmɔi la ɔmɔi mbo batotina baekesomoko la mbo batotina bafumbesomoko;

³² la belimo ya ebatotɔndɔlɔ bitokɔkɔlɔ ndotonjomo ko la batɔndɔli.

³³ Eoka Mungu ati wa liyɛyɛ, kangä wa lilatemi, nda bitanda bitotina y’eba liimeli ko ongoma.

³⁴ Batomali batayalaka tau nda lisɔngɔmi lia Etanda, eoka batimachomo ndoonga nda ɛsɔngɔmɛlɔ, nde bakomiomoko kwa asoonga Bikela ya Mɔsɛ.

³⁵ Nde belɛmbɛ ndoluwesomo loasɔ lɔmɔi, bafeleke batolome bau angɛnɛ nda ndakɔ, eoka ende sɔni ende otomali ndoonga nda ɛsɔngɔmɛlɔ.

³⁶ ¿Mbo lioi lia Mungu lisoya ko lanu, kwa mbo lisoiyela ko ino kongo?

³⁷ Boto etanga nde mbo ale bɔtɔndɔli, ango ko mbo afomu nde Bolimo, aluweke ndolembeela baoi ebakosɔnɔ’mi end’ino mbo bende ekela ya Ngɛnɛ kongo.

³⁸ Nde ango boto atiluwe ndolembeela liao, ambo inde angɛnɛ atilembeelomo.

³⁹ Ongoma to, Bitungani yami, lolaka finɛ ndotɔndɔlɔ la okufesëke boto ndoonga baoi ebatiluwane;

⁴⁰ kongo ko bitotina bikelomoko la wɛlï la likɔmɔnyi.