1 Bakolinto 13 - Le Nouveau Testament in Kele (Lokele) 1958

Litina lia losamɔ

¹ Ango yelonga ndoonga la baoi batotina ba bato, angoko eba Bakitomo, nde angwɛnɛ losamɔ, ambo yende kwa elundi ya liuti, kwa tonjinjei kongo.

² Ango yefomo isosha shota loka, yeluwa njasɔ bitotina ebiisami la wɛlï bototina, yeyala la liimeli lioeta elioumbola föngo angɛnɛ, nde angwɛnɛ losamɔ, ongoma yende ko wawa.

³ Ango yefaefaka bato likaɔ lia yeka bitotina ebisoomana lami, yefaka ango bindo yami mbo bifechomoko, nde angwɛnɛ losamɔ, ongoma itiafote ango shaya.

⁴ Losamɔ lole la liumbakeli, lole la booto; loti la bɔmɛtɔ, losamɔ loti la ifaala;

⁵ losamɔ loitotaka nganyä, lotifɔlɛ njasɔ ya sɔni, loitokota ndolongesa ko ebisolɛmb’inde angɛnɛ, loitosoma sasa, loti la bofëla eoka ya bɔfi.

⁶ Losamɔ loitoomakala eoka ya yao ebitiengane, nde lotoomala la eya momongo.

⁷ Losamɔ lototendela bobe, lotolendelo bitotina, lotokɛsɛkɛlɛ bitotina iyɛli silau, lotokɔkɔmɛlɛ ebiwau bitotina.

⁸ Losamɔ lotilasɛɛsɛlɛkɛ; kongo ko linangoli nd’atomachomo, liongi lia baoi ebatiluwane litina nd’atosila, liluwani nd’atomachomo.

⁹ Eoka liluwani liasu bato likaɔlwɛ la linangoli liasu litiiyele wewe;

¹⁰ nde akayeke yao ebisɔɔlwa, limɔ ebitiiyele chaa, yao kosilasila fɛɛ.

¹¹ Ayalaka’mi wainɛngɛ yaongaka kwa wainɛngɛ, yaenyelaka kwa atoenyela wainɛngɛ, yakomyaka batina ba njasɔ kwa atokomya wainɛngɛ nda botema wande, kwani asoya’mi otolome oku, isotamacha biyaelo ya wainɛngɛ.

¹² Kwani to tosɔɛnɛ wenda kwa atɔɛnɛ boto wɛnɛ elimi nda wɛ̈li wa talatala la botufele, nde mbisa tolɛnɛkɛ sandelele la ɔmbɔ la ɔmbɔ. Kwani liluwani liami litiɔlwɛ, nde mbisa yeluwaka hɔlɔɔ imɔ kwa imi angɛnɛ isoluwomo hɔlɔɔ.

¹³ Tɛnɛ ebitikali ngo ko ebisatɔ, biko liimeli la iyɛli la losamɔ, nde elosolongela lole ngo ko losamɔ.