1 Bakolinto 12 - Le Nouveau Testament in Kele (Lokele) 1958

Bafi ebasofomo iso ko la Bolimo Botanu

¹ Bitungani yami, itilɛmbɛ mbo oyaleke la botutuku nda loasɔ loa bafi ebasofomo la Bolimo.

² Oluwi nde mbo ani ayalak’ino ko basenji walimbomoko, kwa alimbakomoko ino mbile la mbile, ko ndosemola bɛfɔɔnɔ ya mungu ya biuma.

³ Eokao kwani isoluwes’ino la wɛlï mbo boto oyasɔɔtɛlɔmɔ la Bolimo wa Mungu angokɔkɔlɔ ndoonga mbo— Yesu asendomoko bieo! Boto angokɔkɔlɔ ndoonga mbo— Ngɛnɛ wasu ko Yesu! sakolo ngo ko l’isosha sha Bolimo Botanu.

⁴ Bafaefi ebafomu la Bolimo bende la bɔfɔnɔ la bɔfɔnɔ, nde Bolimo angɛnɛ ale ko ɔmwito,

⁵ la bɛfɔnɔ ya bekuweli yokuwela Ngɛnɛ bile to wike, nde Ngɛnɛ ale ko ɔmɔi kongo.

⁶ Bofoka wa Mungu bɔle la bɛfɔnɔ wike, nde ale ko Mungu ɔmwito oyatokɔkɔlɛsɛ yao bitotina ende batotina ebasɛlɛ yao.

⁷ Bolimo bosɔɛnɛlɛ ende boto la boto wa Masiya litina mbo batotina bafotesomoko lande.

⁸ Ende boto ɔmɔi Bolimo asofa lioi lia wɛlï; ende wasi ko lioi lia liluwani ko la Bolimo-ao;

⁹ ende wasi ko liimeli lifi imɔ ko la Bolimo; ende wasi asofa bofoka wouwesaka ngwo imɔ ko la Bolimo-bo;

¹⁰ ende wasi asofa bofoka wokelaka bisisho yolongela eya bato; ende wasi ko isosha shonangola; ende wasi isosha sholuwa balimo ebalau l’ebati balau; ende wasi isosha shoonga la baoi ebatiluwane la batotina; ende wasi isosha shokikola baoi bana nda baoi ebaluwani.

¹¹ Nde Bolimo ko Ɔmwito nd’asokɔkɔlɛsɛ ebafaefi-ba batotina la Inde nd’asokaela bao ende boto la boto kwa asosang’Inde.

¹² Kwa ayali bindo ya oto ko imwito, ani bile la bilengo wike la kwa bilengo-bi ya bindo yende ya bindo imwito, ko ongoma Masiya la Etanda imɔ.

¹³ Eoka mbo iso imɔ yaatotina tosolufiomo ko la Bolimo Ɔmwito ko la lilufi limɔi— la BaYuda la BaHela la bɛkɔwa la tootekwa bindo imwito la batotina basɔɔlɔ ko Bolimo ko Ɔmɔi.

¹⁴ Bindo ya boto biti ko elengo ɛmɔi kongo, kanga wike.

¹⁵ Limɔ litindi lionga mbo— Iti bosamba, ongoma imi iti wa bindo; ko la lioi-li liitosɛnyana la bindo.

¹⁶ Litoi imɔ lionga mbo— Eoka imi iti liso, ongoma imi iti wa bindo; nde ko la lioi-li liitosɛnyana la bindo.

¹⁷ ¿Eya to mbo bindo bitotina biyala ngo ko liso, lioki lia litoi anima to? ¿Eya to mbo bindo bitotina biyala ngo ko lioki lia litoi, ani lümbo loa bowase anima to?

¹⁸ Kongo ko Mungu nd’asota bilengo nda bindo, ɛmɔi l’ɛmɔi kwa asangak’Inde;

¹⁹ ¿Eya to mbo bitotina biyala ko elengo ɛmwito, ani bindo angɛnɛ anima to?

²⁰ Nde tɛnɛngo, bilengo wike, nde bindo ko ɛmɔi.

²¹ Ongoma liso litikɔkɔlɛ ndoonga la bosamba mbo— Iti la boeno waɛ! La botö imɔ angoonga la batindi mbo— Iti la boeno wanu!

²² Ongoma efinole, nde bilengo ebisotangomo ko bilɛli, yao bitikɔkɔlɛ ndoomelo nda bindo,

²³ la bilengo ebititang’iso mbo ebilitesomu, yao totowatesa bisinda ya bɔfɛkɔ, nde yao ebitowaka lasu limama, yao bisofomo loliteso eloeta.

²⁴ Nde ebile la bɔfɛkɔ biti la boeno wa bɔfɛkɔ wasi. Eingo ko, Mungu asokomya bindo yasu la wɛlï la asofaefa ebisolengeela loliteso ko kotalia wa loliteso,

²⁵ mbo bindo bitaatakana ndowesabana, kangä mbo bilengo bisangeke ko ndokukiana la bolau.

²⁶ Ango elengo ɛmɔi eoka wäle, ambo bilengo eitotina imɔ kooka wäle amamwito la yao; elengo ɛmɔi blitesomo la bɔfɛkɔ, ambo bitotina imɔ kooka limɛngɔ amamwito la yao.

²⁷ Ino wende to bindo ya Masiya, ɔmɔi la ɔmɔi ko bilengo ya bindo yande.

²⁸ Nda Etanda Mungu asotaka bilengo biko, eba oso Batomomu, limɔ Batɔndɔli, limɔ Baekesi, limɔ ebatokela bisisho, limɔ ebasofomo bofoka wouwekesa eba ngwo, ebasofomo isosha shosungaka basi, isosha sha bekumi, la wɛlï woonga baoi ebatiluane la batotina.

²⁹ ¿Mbo batotina bende Batomomu, batotina Batɔndɔli, mbo batotina Baekesi, batotina batokelaka bisisho,

³⁰ batotina basofomo wɛlï wouwekesa eba ngwo, batotina batoonga baoi ebatiluwane, batotina batosanola batina ba baoi ana?

³¹ Talolaka nde bafi ba Bolimo ebalongeli. Nde itotamb’ino mboka yoiyela boyaeli ewetela.