1 Bakolinto 10 - Le Nouveau Testament in Kele (Lokele) 1958

Beimo eoka ya bieka la bolëfë la lisemoli lia bɛfɔnɔ

¹ Bitungani yami, itilɛmb’ino ndoosala mbo basango basu baaka kwala iyo batotina ebalinjomoko la lifita nda liɔmbɛlɛ la iyo batotina loeta Balia batelu,

² la batotina fɛɛ lolufiomo la nda balia la nda lifita ko la isosha sha Mɔsɛ.

³ Iyo yaatotina lolaka bieka ya bolimo la

⁴ iyo lomwaka limwi eliafomoko iyo yaatotina la Bolimo, eingo eoka batoti bamwaka balia ba litalɛ lia Bolimo eliatutak’iyo, Litalɛ lina liaaka ko Masiya angɛnɛ.

⁵ Kongo ko Mungu atiaomalaka loasɔ loa wike wa bato ana la iyo lokwakwa se belyo wike nda liɔmbɛlɛ.

⁶ Njasɔ-bi yende to beimo end’iso, ndoim’iso mbo totafɛ̈fɛ̈ la yɛmɛ ya bobe kwa akelaka iyo.

⁷ Eingo, oyalëke basemoli ba bɛfɔnɔ ya mungu kwa ayalaka bamɔi bau; ongoma lososɔnɔmɔ nda Lokasa mbo— Bato loyalaka se ko ndola la ndomwa, limɔ aemalak’iyo ko ndoinaka bisha.

⁸ Tokelëke bolëfë kwa akelaka bamɔi bau limɔ iyo lowaka ko bilɛfu kama imbale la bilɛfu isatɔ ko la lise-ao.

⁹ Tokotëke ndososhela Ngɛnɛ Mungu kwa akelaka bamɔi bau limɔ basɛɛsɛlɛsɔmɔkɔ la njɔ;

¹⁰ totaimaima ndofekela Mungu kwa akelaka bamɔi bau limɔ basɛɛsɛlɛsɔmɔkɔ ko la Boombesi.

¹¹ Beimo bitotina-bi yawɛlɛmɛkɛ end’iyo nde yasɔnɔmɔkɔ nda lokasa ndoekekes’iso ebasooshomo kwani ko la tuu ya mbile-ye.

¹² Eokao oyasoenyela mbo asokɔkɔmɔ kɔkɛ, atawɛlɛkɛ baiso mbo atakwa se.

¹³ Lisoshela liitoyak’end’ino sakolo ko liao elitoundana la balomboki. Mungu ale wolendelomo to, la aitomachel’aɛ ndososhelomo la lisoshelomu liolonga bofoka waɛ nde amamwito la liao atoeshel’aɛ imɔ ko esokwelo mbo okɔkɔlɛkɛ ndotendela liao.

¹⁴ Eokao, basamomu lami, kwelaka lisemoli lia bɛfɔnɔ botili.

¹⁵ Isoonga lanu kwa ende bato ebatolaila la wɛlï; ino angɛnɛ kweelaka litina lia baoi ebatoonga’mi.

¹⁶ ¿Kɔpɔ eyetosomboel’iso lifoti nda Elambɔ eti to mbo tosokaana liuwesi lia bakila ba Masiya? ¿Lituma elitounak’iso liti to likao lia biale ya bindo ya Masiya?

¹⁷ Kwa ayali lituma ko limɔi, ko ongoma iso ebale ko wike, twende kwa bindo imwito, eoka iso yatotina totokaa ko lituma limɔi.

¹⁸ Tichaka to BaIsalaele la beyaeli yau; ¿Ebatolaka nyama ebisotambomo lifaefi, baisokaana imɔ ko eya etambelo?

¹⁹ ¿Iongi to nd’iye? ¿Mbo lifaefi elitambomu bɛfɔnɔ liende yeka? ¿Kwa mbo bɔfɔnɔ wa mungu wende to la litina?

²⁰ Mbayɔ. Nde isoonga mbo lifaefi elisotamba balomboki nda lisemoli lititambomo Mungu, kangä balimo. Itilɛmbɛ to ino ndoyala basaɔ ba balimo.

²¹ Otikɔkɔlɛ ndomwa kɔpɔ ya Ngɛnɛ la kɔpɔ ya balimo lisanga; otikɔkɔlɛ ndoyala se nda bieka ya Elambɔ ya Ngɛnɛ la nda eya balimo lisanga.

²² ¿Kwa mbo tosofɔɔlɔ bokelë wa Ngɛnɛ? ¿Mbo tosolongel’Inde la bofoka?

²³ Mbo bitotina biengani nde lami ndokela? Kongo ko bitotina biitosung’iso. Mbo bitotina biengani nde lami ndokela, kongo ko bitotina biitokɔkɔmɛsɛ Etanda;

²⁴ boto alukëke ko bolau wande angɛnɛ, kangä ewa bato basi.

²⁵ Laka to bieka ya kanda bitotina ya liongo, angotafelaka litina loasɔ loa botema waɛ,

²⁶ eoka mbo— Bitotina ebile nda wenda-bo bile ngo ko eya Ngɛnɛ wasu.

²⁷ Eyambo ɔmɔi w’ebatiimele et’ino lioi nda bieka, bɔlɛmbɛ, aɛ kɔkɛ okala bitotina ebisofomo aɛ, angotafelaka litina nda botema waɛ.

²⁸ Kongo ko eya to mbo boto eonga laɛ mbo— Bieka-bi biüchomu nde loasɔ loa bɛfɔnɔ ya mungu, olëk’imɔ eoka yande oyasoluwes’aɛ la eoka ya botema.

²⁹ Itionge loasɔ loa botema waɛ angɛnɛ kangä eoka ya elembeelo ya botema wa wina laɛ. ¿Mbo losokolomo loa bokili wami lotolendelo likomyi lia botema wa boto wasi?

³⁰ ¿Ango imi yela bieka ko la bootaota wa Mungu, monito batosɛɔlɔ’mi ko l’eoka ya bieka ina ebisoongomo kelekëlë?

³¹ Eokao, bola yeka, bomwaka, bokela loasɔ angolɔmɔi, kelaka bitotina ngo ko ndoomalesa Mungu.

³² Oyalëke to ebatokwesaka basi tolango, kwa BaYuda, kwa BaHela, kwa eba Etanda ya Mungu;

³³ la imi ko ongoma itokota ndosunga bato basi batotina ko la njasɔ bitotina, itiluke bondanda wami angɛnɛ kangä ewa basi wike mbo buwesomoko! Yalaka to batutaki ba boyaeli wami kwa atotutaka’mi ewa Masiya.