୧ ତୀମତି 2 - ପୁନାଦ୍ ଆର୍ର୍ ପୁନାଦ୍ ନିୟମ୍ମଣ୍ଡଲିତେ ଉପାସନା ମାଡ଼ାନ୍ ନିୟମ୍ 1 ନାନ୍ ମୁନେନ୍ ଅନୁରଦ୍ ମାଡ଼ିତାନ୍, ଉପାସନା ମାଡ଼ାନ୍ ୱେଲେ ସାର୍ରେତଡ଼୍ ସେଙ୍ଗେ ଇଶ୍ୱର୍ତାଗ୍ ପ୍ରାର୍ତନା, ନିବେଦନ୍ ନୁ ଦନ୍ୟବାଦ୍ କେଲାଟ୍ । 2 ଇଦେଲେକାମ୍ ଅନ୍ୟାୟ୍ତେ ଶାସନ୍ ମାଡ଼ାନଡ଼୍ ନୁ ରାଜାଲଡ଼୍ ସେଙ୍ଗେ ପ୍ରାର୍ତନା ମାଡ଼ାଟ୍, ବେଲାକି ଇଶ୍ୱର୍ତେ ବକ୍ତିତେ ଶାନ୍ତିତେ ମାନ୍ତାଡ଼୍ ନୁ ଆନ୍ୱେ ନାରୁଡ଼୍ ପ୍ରତି ସାୟେତ୍ ବ୍ୟବହାର୍ ମାଡ଼ି ସୁକାମ୍ ଶାନ୍ତିତେ ଜିୱୁଣ୍ଡ୍ ବାଦ୍କେ ପାର୍ଦ୍ତାଡ଼୍ । 3 ଇଦ୍ ଲେକାମ୍ ପ୍ରାର୍ତନା ତ୍ରାଣକର୍ତ୍ତାଲ୍ ଇଶ୍ୱର୍ତେ କଣ୍ଡେତେ ଯଥାର୍ତ ନୁ ଗ୍ରହନ୍ ଯୋଗ୍ୟ । 4 ସାରେତଡ଼୍ ପାପତାଗାଙ୍କ୍ ଉଦ୍ଦାର୍ ଆସ୍ ସତ୍ତିଙ୍କ୍ ପୁନିଡ଼୍, ଇଦ୍ ଅନ୍ ଇଚ୍ଛା । 5 ୱେରନ୍ ମାତର୍ ଇଶ୍ୱର୍ ମିନ୍ତେନ୍, ମେଣ୍ଡେ ଇଶ୍ୱର୍ ନୁ ନାରିଡ଼ାଗ୍ ୱେରନ୍ ନାଡ଼୍ମେ ମିନ୍ଦେନ୍, ଅଣ୍ଡ୍ ଆଦୁତନ୍ କ୍ରିଷ୍ଟ ଜିସୁ, ୱେରନ୍ ନାରୁନ୍ । 6 ଅଣ୍ଡ୍ ନାରୁଡ଼ାଦ୍ ମୁକ୍ତି ସେଙ୍ଗେ ନିଜେତିଙ୍ଗ୍ ଉସର୍ଗ ମାଡ଼୍ତନ୍ ଆଦିନ୍ ସୁଦୁଟ୍ ସମୟତେ ପ୍ରମାନିତ ଆସ୍ମିନ୍ଦେ ଯେ, ଇଶ୍ୱର୍ ସାରେ ନାରୁଡ଼୍କିଙ୍କ୍ ପରିତ୍ରାନ୍ ମାଡ଼ାଙ୍କ୍ ଇଚ୍ଛା ମାଡ଼ୁତନ୍, ଇଦିନାଦ୍ ସାକ୍ଷ୍ୟ ଇସ୍ମିନ୍ଦେଣ୍ଡ୍ । 7 ଆଦ୍ ସତ୍ୟ ନୁ ବିଶ୍ୱାସ୍ ଗଟ୍ ଅଣଯିହୁଦୀଡ଼୍ ପାକେ ଗୋଷନା ମାଡ଼ାନ୍ ସେଙ୍ଗେ ନାନେ ୱେରନ୍ ପ୍ରେରିତଶିଷ୍ୟ ନୁ ଗୁରୁ ଲେକାମ୍ ୱାସ୍ମିନ୍ଦେନ୍, ନାନେ ମିତ୍ୟା କେଲନ୍ ବାତ୍ କେତୁତାନ୍, ଆଦ୍ ସାରେ ସତ୍ । 8 ନାନ୍ ଚାଏମ୍ ଅଦୁତାନ୍ ଉପାସନାତାଗ୍ ପବିତ୍ର କାୟ୍ ତେଇସ୍ ସାରେତଡ଼୍ ପ୍ରାର୍ତନା ମାଡ଼ିଡ଼୍ । ମନ୍ତାଦ୍ ସାରେ ପ୍ରକାର୍ କପାମ୍ ନୁ ଇର୍ଷା ୱିଡ଼୍ସିୱିଡ଼୍ । 9 ନାଟାକିଙ୍କ୍ ନାୟାଦ୍ ଅନୁରଦ୍, ଆୱୁ ନମ୍ର ନୁ ଯତ୍ନବାନ୍ ଆୟି । ମୂଲ୍ୟବାନ୍ ସିଲେ, କେଲ୍କିଙ୍କ୍ ସାୟେ ସଜାମାଡ଼ି ନୁ ସୁନା ରତ୍ନା ନେଡ଼େକ୍ କେର୍ୱକଟ, 10 ମୁତେକି ସାୟେ କାମ୍ ସେଙ୍ଗେ ନିଜେତ୍ ଦର୍ମପରାୟନ୍ତେ ପରିଚୟ ହିୱି । 11 ମୁତେକି ନିରବ୍ତେ ନମ୍ର ଲେକାମ୍ ମାଞ୍ଜ୍ ଶିକ୍ଷା ହିଦାନାଦ୍ ଉଚିତ୍ । 12 ଉପଦେଶ ହିଦାନାଦ୍ ବା ମାନେଇ ପୋର୍ ରାଜ୍ ମାଡ଼ାନ୍ ଅଦିକାର୍ ନାନେ ମୁତେକିଙ୍ଗ୍ ହିୱନ୍ । କିନ୍ତୁ ଆୱୁ କଟଆସ୍ କେଞ୍ଜି । 13 ବାତେଙ୍କ୍ଇତ୍କେ ଇଶ୍ୱର୍ ମୁନେନ୍ ଆଦମତିଙ୍କ୍ ସୃଷ୍ଟି ମାଡ଼୍ତନ୍; ତାନ୍ପେର୍କେ ଅବାଙ୍କ୍ ସୃଷ୍ଟି ମାଡ଼୍ତଣ୍ଡ୍ । 14 ଆଦମ୍ ମୁନେ ପ୍ରତାରିତ ଆୟନ୍, ମୁତେ କେ ପ୍ରତାରିତ ଆସ୍ ଇଶ୍ୱର୍ତେ ନିୟମ୍ ପାଲନ୍ ମାଡ଼ିମାତ୍ତେ । 15 କିନ୍ତୁ ନାଟା ବୁଦ୍ତଡ଼୍ ବିଶ୍ୱାସ୍, ପ୍ରେମ ନୁ ପବିତ୍ର ଜିୱା କଟ ମାତ୍କେ, ଆଦ୍ ପିଲା ଜନମ୍ ମାଡ଼୍କେନେ ପରିତ୍ରାନ ଦର୍କ୍ତେ । |
The New Testament in Koya Language © The Word for the World International and Koya Translation Samithi, Malkangiri, Odisha 2020