୧ ପିତର୍ 5 - ପୁନାଦ୍ ଆର୍ର୍ ପୁନାଦ୍ ନିୟମ୍ଇଶ୍ୱର୍ତେ ମାନ୍ଦ୍ମେଣ୍ଡା 1 ନାନେ ୱେରନ୍ ବୟସ୍ତେ ନାରୁଣ୍ଡ୍ ଇସାବ୍ତେ ମିୟାଦ୍ ମଣ୍ଡଲିତେ ବାଡ଼୍ୟେ ନେତାଲଡ଼୍କ୍ ବିନତି ମାଡ଼ି କେତୁତାନ୍ । କ୍ରିଷ୍ଟନ୍ ଦୁଃକାମ୍ କଷ୍ଟତାଗ୍ ନାନେ ୱେରନ୍ ସାକ୍ଷି ନୁ ଅନାଦ୍ ଗୌରବ୍ ପ୍ରକାଶ୍ ଆଦାନ୍ ସମୟତେ ନାନେ ଆଗେ ପାଲ୍କ୍ ଆଦ୍ତାନ୍ । 2 ଇଶ୍ୱର୍ ମୀଇ କାୟ୍ଦାଗ୍ ବେନ୍ ମାନ୍ଦ୍ ମେଣ୍ଢାନ୍ ଦ୍ୱାୟିତ୍ୱ ଇତ୍ତନ୍, ନାନ୍ ଅନୁରଦ୍ ମାଡ଼ୁତାନ୍, ମିଡ଼୍ ଇଚ୍ଛା ଇଲ୍ୱେ ଆଦ୍ ମାଡ଼କଟ୍ ସାର୍ଦେତେ ଅଡ଼୍କିଂଙ୍କ୍ ପଡ଼୍ପାଟ୍ । ଦନ୍ ଆଶାତେ ଆଦ୍ ମାଡ଼କଟ୍, ସାରେଦାମ୍ ସେବା ମନ୍ ତଡ଼୍ ମିୟାଦ୍ ଆଦ୍ ଦ୍ୱାୟିତ ମାଡ଼ାଟ୍ । 3 ମିଡ଼୍ ବେନଡ଼ାଦ୍ ଦ୍ୱାୟିତ ଆତ୍ତିଡ଼୍, ଅଡ଼୍ ପରୁ ଶାସନ୍ ମାଡ଼କଟ୍ ଅଡ଼୍ ସେଙ୍ଗେ ନିଜର୍ ଜିୱୁଣ୍ଡ୍ତାଗ୍ ଆଦର୍ଶ ତଅମୁଟ୍ । 4 ବେସୁଙ୍କ୍ “ଲେକେତ୍ ମେକାଗଲାଲ୍,” ୱାଦ୍ତନ୍, ମିଡ଼୍ ଗୌରବ୍ତେ ମୁକୁଟ୍ ପାଏମ୍ ଆଦ୍ତିଡ଼୍ । ଆଦିନାଦ୍ ୱେସ୍ ବେସୁଙ୍କ୍ ମୁର୍କ୍ ଆୟ । 5 ଆ ଲେୟଡ଼ି, ମିଡ଼୍ ବୟସ୍ତେ ନାରୁଡ଼୍କ୍ ମାନେମ୍ ଆୟ୍ମୁଟ୍ । ମିଡ଼୍ ସାରେତଡ଼୍ ନିଜେ ନିଜେ ସେବାମାଡ଼ାନ୍ ସେଙ୍ଗେ ନମ୍ରତାଉ ଚକା କେର୍ମୁଟ୍ । ଶାସ୍ତ୍ରତାଗ୍ ଲେକାମିନ୍ଦେ, “ଇଶ୍ୱର୍ ଆଂକାର୍ ନାରୁଡ଼୍କ୍ ବିରୁଦ୍ ମାଡ଼ିତନ୍, ଇତ୍କେ ନମ୍ର ନାରୁଡ଼୍କ୍ ଅନୁଗ୍ରହ ମାଡ଼ିତନ୍ ।” 6 ଆଲେକେ, ଇଶ୍ୱର୍ତେ ଶକ୍ତିତେ କାୟ୍ଦେ ମଦଲ୍ ମଦଲ୍ ଆଡ଼୍କାଟ୍; ଅଣ୍ଡ୍ ତାନ୍ ଟିକ୍ ମାଡ଼୍ତେ ସମୟ୍ତେୱେଲେ ମିକିଙ୍କ୍ ଉନ୍ନତ ମାଡ଼ିତନ୍ । 7 ମିୟାଦ୍ ସାରେ ଚିନ୍ତାତିଙ୍କ୍ ଇଶ୍ୱର୍ ଗାରେ ସମର୍ପଣ ମାଡ଼ାଟ୍, ବାତେଙ୍କଇତ୍କେ ଅଣ୍ଡ୍ ମିୟାଦ୍ ଯତ୍ନ ଆଦ୍ତନ୍ । 8 ସତର୍କ ଆୟ୍ମୁଟ୍, ତିଆର୍ ଆସ୍ ମାନୁଟ୍ । ମୀଇ ଶତ୍ରୁ ଶୟତାନ୍ କେୟାନ୍ ଗଣ୍ଡ୍ରାସ୍ ଲେକାମ୍ ବେନଙ୍କ୍ କାସାନ୍ ସେଙ୍ଗେ ମେଃଏକ ଉଡୁତେ । 9 ମିଡ଼୍ ବିଶ୍ୱାସ୍ତେ ଡୁଟାଙ୍କ୍ ମାଞ୍ଜ୍, ଆଦିଙ୍କ୍ ଅଟ୍କା ମାଡ଼ାଟ୍ । ମିଡ଼୍ ପୁତ୍ତିଡ଼୍, ଇଦ୍ ଜଗତ୍ତାଗ୍ ମୀଇ ବିଶ୍ୱାସି ଏଲାଡ଼୍ତାମୁଡ଼୍କ୍ ଇଦ୍ ଲେକାମ୍ ଦୁଃକାମ୍କଷ୍ଟ ତାଲାନ୍ ଅଦୁତଡ଼୍ । 10 କ୍ରିଷ୍ଟନ୍ ତଡ଼୍ କାଇଲି ମିକା ଅନାଦ୍ ସାରେଦିନାତାଦ୍ ଗୌରବ୍ତେ ବାଗିଦାର୍ ଆଦାନଙ୍କ୍, ଦୟାତଣ୍ଡ୍ ଇଶ୍ୱର୍ ମିକିଙ୍କ୍ ଆହ୍ୱାନ୍ ମାଡ଼୍ତଣ୍ଡ୍ । ମିୟାଦ୍ ଇସୁର୍ ଦୁଃକାମ୍ ଆତ୍ତେ ପେର୍କେ ଅଣ୍ଡ୍ ନିଜେ ମିକିଙ୍କ୍ ସାକ୍ସାକା, ଗାଡ଼୍ସ୍, ଡୁଟାଙ୍ଗ୍ ନୁ ମଜ୍ବୁତ୍ ମାଡ଼ିତନ୍ । 11 ଅନ୍ୱାଦ୍ ଶାସନ୍ ଯୁଗ୍ଯୁଗ୍ ଆୟି । ଆମେନ୍ । ମାଡ଼େଙ୍କ୍ତାଦ୍ ନମସ୍କାର୍ 12 ଶୀଲାଙ୍କ୍ ବିଶ୍ୱାସ୍ତେ କ୍ରିଷ୍ଟିୟାନ୍ ଦାଦାଲ୍ ଲେକାମ୍ ନାନେ ସମ୍ମାନ୍ ମାଡ଼ିତାନ୍ । ଅନ୍ ତଡ଼୍ ନାନେ ଇଦ୍ ସୁଦୁରାଦ୍ ଚିଟି ଲେକ୍ତାନ୍ । ଇଶ୍ୱର୍ତେ ନିଜାତାଦ୍ ଅନୁଗ୍ରହ ମୁନେ ସାକ୍ଷ୍ୟ ଇସ୍ ମିକିଙ୍କ୍ ସାର୍ଦେ ମାଡ଼ାନଙ୍କ୍ ନାୟାଦ୍ ଇଚ୍ଛା । ଆଦ୍ ଅନୁଗ୍ରହତାଗ୍ ମିଡ଼୍ ଗାଡ଼୍ସ୍ ଆସ୍ ମାନୁଟ୍ । 13 ଇଶ୍ୱର୍ତଡ଼୍ ଏଞ୍ଚିମାନ୍ଦାନ୍ ବାବିଲୋନ୍ତାଗ୍ ମାନ୍ଦାନ୍ ମଣ୍ଡଲି ନୁ ନା ଦାର୍ମାମ୍ ମାର୍ ମାର୍କ ମିକା ମିକିଙ୍କ୍ ନମସ୍କାର୍ ମାଡ଼ୁତନ୍ । 14 କ୍ରିଷ୍ଟିୟ ପବିତ୍ର ପ୍ରେମ୍ ତଡ଼୍ ନିଜର୍ ନିଜର୍ ଲୋପେ ନମସ୍କାର୍ ମାଡ଼ାଟ୍ । ଜିସୁ କ୍ରିଷ୍ଟନ୍ ତଡ଼୍ ମିଡ଼୍ ସାରେତଡ଼୍କିଙ୍କ୍ ଶାନ୍ତି ଆୟି । |
The New Testament in Koya Language © The Word for the World International and Koya Translation Samithi, Malkangiri, Odisha 2020