Yuda 1 - Le Nouveau Testament en Kikwango 1950

¹ Yuda, sielo ya Yesu Klisto ye mpangi ya Yakobi, fidisa mbote kwa bau ya bingwa bazolwa mu Nzambi, ikele Tata ye ya kebwa kwa Yesu Klisto.

² Nkenda ye yenge ye zola bika yau kwiza mingi kwa beno.

³ Bazolwa, bu mono tulaka ngolo yonso kusonika kwa beno sambu na mpulusu ya beto ya kintuadi, mono monaka na mono fwiti kusonika kwa beno kubombidila beno kunwana ngolo sambu na lukwikilu ya peswaka kwa banlongo kimakulu.

⁴ Kadi bantu yankaka kotaka mu kinsweki, bantu yai sonamaka ntete ku mbedoso yai. Bau kondaka vumi ya Nzambi, ye kitulaka nlemvo ya Nzambi bonso mambu ya nsoni, ye buyaka Nyadi ya beto mosi kaka, ikele Mfumu Yesu Klisto.

⁵ Mono zola kubambukisa beno bu beno zaba mambu yonso kismakulu, na Mfumu vulusaka bantu tuka nsi ya Ngipiti, nanimo yandi kufwaka bau ya konda lukwikilu. 4 Mose 14:35; Nk. 106:26; 1 Kol. 10:1; Eb. 3:17

⁶ Ye banjo ya kebaka ve kikuluntu ya bau kansi bikaka sika ya bau kibeni, yandi keba bau mu tuvambu ya mvu ya mvu nansi ya tombe ti kilumbu ya nene ya mfundusu.

⁷ Bonso Sodoma ye Ngomola ye bambanza ya zungaka bau dipesaka mu bizumba ye kulanda nsuni ya nzenza, bau tulwa bonso kifwani, kumona mpasi ya ndola ya tiya ya mvu ya mvu. 1 Mose 19:1; 2 Pet. 2:6

⁸ Mpilayai mpe bayai mu bandozi ya bau ikele kusumuna nsuni ye kitula kimfumu mpamba ye finga bankwa nkembo mu zulu. 2 Pet. 2:10

⁹ Kansi bu Mikaeli, nkuluntu ya banjo tulaka ntembe na diable, ye tubanaka sambu na nitu ya Mose, buna yandi lendaka ve kufundisa yandi na makasi, kansi yandi tubaka: Mfumu semba nge. 2 Pet. 2:11

¹⁰ Kansi bayai ikele kutuba mbi sambu na mambu ya bau konda kuzaba ye mu mambu yonso ya bau zaba mu kimuntu, bonso bambizi ya konda ngangu, mu mambu yai bau ikele mu mbungulu. 2 Pet. 2:12

¹¹ Ndola kwa bau, kadi bau kwenda mu nzila ya Kaini, ye kubwaka nswalu mu kuvila ya Balami kubaka ndandu, ye bau vilaka mu nkolomono ya Kola. 1 Mose 4:8; 2 Mose 22:1, 16; 2 Pet. 2:15

¹² Bau ikele matona ya mvindu mu fete ya beno ya zola, bu bau kudia na beno, bamvungi ya didikolo ya konda nsoni, matuti ya konda masa, ya natwa na mupepe, banti ya kisivu ya konda mabundu ya kufwa mbala zole, ya vuzuka na mianzi, 1 Pet. 2:13, 17

¹³ mayo ya makasi ya mbu ya ikele kubasisa mafulufulu ya bau ya nsoni, bambwetete ya tambula, kwa bau ndombe ya tombe ikele kulundwa mvu ya mvu. Yes. 57:20; 2 Pet. 2:17

¹⁴ Hanoki ya nsambwadi tuka Adami bikulaka kwa bau mpe, kutuba: Tala, Mfumu kwizaka na banlongo ya yandi mafunda kumi,

¹⁵ kufundisa bantu yonso ye kupesa ntantu kwa bantu yonso ya konda vumi ya Nzambi na bisalu yonso ya bau ya konda vumi ya Nzambi, na bau salaka mu konda ya vumi ya Nzambi ye mambu yonso ya mbi ya bankwa masumu ya konda vumi ya Nzambi imene kutuba sambu na yandi.

¹⁶ Bayai ikele babamini ya dila mpamba ya tambula mu luzolo ya bau ya nsuni, munoko ya bau ikele kutuba mambu ya lulendo, ye ikele kutala luse ya bantu kubaka ndandu.

¹⁷ Kansi beno, bazolwa, bambuka mambu ya tubwaka ntete mu bantumwa ya Mfumu ya beto Yesu Klisto; 2 Pet. 3:2

¹⁸ na bau tubaka kwa beno: Mu ntangu ya nsuka basaudi tavanda ya tambula mu luzolo ya bau ya nsuni ya konda vumi ya Nzambi. Bis. 20:29; 1 Tim. 4:1; 2 Tim. 3:1; 2 Pet. 2:10; 3:3

¹⁹ Bayai ikele kubasisa kabana ya ikele ya kinsuni, ye ikele na Mpeve ve.

²⁰ Kansi beno, bazolwa, ditunga va lukwikilu ya beno ya nlongo, kulomba mu Mpeve Yanlongo,

²¹ beno dikeba mu zola ya Nzambi ye vingila nkenda ya Mfumu ya beto Yesu Klisto, ku moyo ya mvu ya mvu.

²² Kuwila nkenda kwa bankaka ya ikele na ntembe,

²³ ye vulusa bankaka, katula bau na tiya, ye kuwila bankaka nkenda mu boma, ye vanda na makasi na mvwatu ya sumunwa na nsuni. Yes. 64:6; Amosi. 4:11; Zak. 3:2

²⁴ Kansi kwa yandi ya lenda kukeba beno na beno takuta sakuba ve, ye kutula beno nantwala na luse ya nkembo ya yandi, na konda kieta mu kiese mingi, Lom. 16:25

²⁵ kwa Nzambi kaka Mvulusi ya beto mu Yesu Klisto Mfumu ya beto, vanda nkembo, nene, luyalu ye ngolo, ntete ya ntangu yantikaka ye ntangu yai ye mvu ya mvu. Amen. 1 Tim. 1:17; 1 Pet. 4:11; 2 Pet. 3:18