Yoane 8 - Le Nouveau Testament en Kikwango 1950

Yesu yuvulwa sambu na nkento ya salaka bizumba

¹ Yesu kwendaka ku mongo ya Olive.

² Na suka suka yonso yandi kwizaka diaka ku tempelo, bantu yonso kwizaka kwa yandi, ye yandi vandaka, ye longaka bau.

³ Bansoniki ye bafalisi twalaka kwa yandi nkento ya simbwa mu bizumba, bu bau imene kutala yandi nakati,

⁴ bau tubaka kwa yandi: Nlongi, nkento yai beto simbaka yandi bu yandi vandaka kusala bizumba.

⁵ Mose mu nsiku sikidikisaka beto kufwa bantu ya mpilayai na matadi. Buna nge tuba nki sambu na yandi ?

⁶ Bau tubaka mpilayai kuyunsa yandi, na bau lenda kubaka mambu ya kufunda yandi. Kansi Yesu, yandi yinamaka ye sonikaka na musabi ya yandi va ntoto.

⁷ Bu bau bikaka ve kuyuvula, yandi dongamaka yandi tuba kwa bau: Nakati na beno konsomuntu konda masumu bika yandi losa yandi ditadi ntete.

⁸ Yandi yinamaka diaka, ye sonikaka na musabi ya yandi va ntoto.

⁹ Bau ya kuwaka ndinga yai, basikaka mosi mosi, yantika na mbuta, ti ya landa, ye Yesu bikaka yandi mosi ye nkento telemaka sika yina.

¹⁰ Yesu bu yandi dongama ye monaka muntu ve, kansi nkento kaka, yandi tubaka: Nkento, bafundi ya nge ikele wapi ? Muntu bedisa nge ve ?

¹¹ Yandi tubaka: Mfumu, muntu ve. Yesu tubaka kwa yandi: Mono mpe bedisa nge ve. Kwenda kusala masumu diaka ve. Yesu mwini ya nsi

¹² Buna Yesu tubaka kwa bau diaka, kutuba: Mono ikele mwini ya nsi, yandi ya landa mono, yandi tatambula ve mu tombe, kansi tavanda na mwini ya moyo. Yoa. 1:4; 9:5; 12:25, 46

¹³ Buna bafalisi tubaka kwa yandi: Nge tuba kitemo sambu na nge mosi, kitemo ya nge ikele kieleka ve.

¹⁴ Yesu vutulaka tubaka kwa bau: Kana mono ikele kutuba kitemo ya mono mosi, kansi kitemo ya mono ikele kieleka, kadi mono zaba sika ya mono katuka ye sika ya mono takwenda, kansi beno zaba ve sika ya mono katuka keti ya mono kwenda.

¹⁵ Beno fundisa bonso nsuni, mono fundisa muntu ve.

¹⁶ Kansi kana mono fundisa, mfundusu ya mono ikele kieleka, kadi mono ikele mono mosi kaka ve, kansi mono ye Tata ya fidisaka mono. Yoa. 16:32

¹⁷ Yo imene kusonama mu nsiku ya beno, kitemo ya bantu zole ikele kieleka. 5 Mose 17:6; 19:15; Mat. 18:16; 2 Kol. 13:1; Eb. 10:28

¹⁸ Mono tuba kitemo ya mono mosi, ye Tata ya fidisaka mono tuba kitemo sambu na mono mpe. Yoa. 14:7, 9

¹⁹ Buna bau tubaka kwa yandi: Wapi Tata ya nge ? Yesu vutulaka: Beno zaba mono ve keti Tata ya mono. Kana beno zabaka mono, beno imene kuzaba Tata ya mono mpe. Yoa. 14:7, 9

²⁰ Mambu yai Yesu tubaka mu lundulu ya mbongo bu yandi longaka mu tempelo kansi muntu mosi simbaka yandi ve, sambu na lokula ya yandi imene kwiza ve. Yoa. 7:30

Yesu tuba sambu lufwa ya yandi

²¹ Mpilayai Yesu tubaka kwa bau diaka: Mono kwenda, ye beno tasosa mono, kansi beno takufwa mu masumu ya beno. Sika ya mono kwenda, beno lenda ve kwiza. Yoa. 7:33; 13:33

²² Buna baYuda tubaka: Yandi tadikufwa ? Sambu na yandi tuba:

Sika ya mono kwenda beno lenda ve kwiza.

²³ Yandi tubaka kwa bau: Beno katuka na nsi, mono katuka na zulu; beno ikele ya nsi yai, mono ikele ya nsi yai ve. Yoa. 3:31; 1 Yoa. 4:5

²⁴ Mpilayai mono tubaka kwa beno, na beno takufwa mu masumu ya beno, kadi kana beno kwikila ve, mono ikele yandi, buna beno takufwa mu masumu ya beno.

²⁵ Buna bau tubaka kwa yandi: Nge ikele nani ? Yesu tubaka kwa bau: Yina ya mono tubaka kwa beno mpe tuka luyantiku.

²⁶ Mono ikele na mambu mingi kutuba ye kufundisa mu beno, kansi yandi ya fidisaka mono ikele kieleka; mambu yonso ya mono kuwaka kwa yandi mono tuba yau ku nsi.

²⁷ Bau zabaka ve, yandi ikele kutuba kwa bau sambu na Tata.

²⁸ Mpilayai Yesu tubaka kwa bau: Bu beno imene kunangula Mwana ya muntu buna beno tazaba, mono ikele yandi, ye mono salaka ve mambu mono mosi, kansi bonso Tata longaka mono, mono tuba mambu yai.

²⁹ Yandi ya fidisaka mono ikele na mono; yandi imene kubika mono mosi ve, kadi ntangu yonso mono ikele kusala mambu ya yangidisa yandi.

Mingi kwikila

³⁰ Bu yandi tubaka mambu yai, bantu mingi kwikilaka yandi.

³¹ Buna Yesu tubaka kwa baYuda ya kwikilaka yandi: Kana beno vanda mu mambu ya mono, buna beno ikele banlonguki ya mono kieleka.

³² Beno tazaba kieleka, ye kieleka tavulusa beno. Lom. 6:18

³³ Bau vutulaka kwa yandi: Beto ikele nkuna ya Abalahami, beto vandaka ve ampika ya muntu ti ntangu yai. Buna mpila nki nge tubaka: Beno tavuluswa ?

³⁴ Yesu vutulaka kwa bau: Kieleka, kieleka, mono tuba kwa beno: Konsomuntu ikele kusala masumu yandi ikele mpika ya masumu. Lom. 6:16; 2 Pet. 2:19

³⁵ Mpika ikele kuvanda mu nzo mvu ya mvu ve, kansi Mwana ikele kuvanda mvu ya mvu.

³⁶ Mpilayai kana Mwana vulusa beno, buna beno tavuluswa mu kieleka.

³⁷ Mono zaba, na beno ikele nkuna ya Abalahami; kansi beno sosa kufwa mono, sambu na ndinga ya mono ikele na sika mu beno ve.

³⁸ Mono tuba mambu ya mono monaka kwa Tata, mpilayai beno mpe sala mambu ya beno kuwaka kwa tata ya beno.

³⁹ Bau vutulaka ye tubaka kwa yandi: Abalahami ikele tata ya beto. Yesu tubaka kwa bau: Kana beno ikele bana ya Abalahami, beno tasala bisalu ya Abalahami. Mat. 3:9

⁴⁰ Kansi ntangu yai beno sosaka kufwa mono, ikele muntu ya tubaka kwa beno kieleka, ya mono kuwaka kwa Nzambi; Abalahami salaka mpilayai ve.

⁴¹ Beno ikele kusala bisalu ya tata ya beno. Buna bau tubaka kwa yandi: Beto butukaka mu bizumba ve; beto ikele na Tata mosi, Nzambi.

⁴² Yesu tubaka kwa bau: Kana Nzambi ikele Tata ya beno, beno tazola mono, kadi mono basikaka ye katukaka na Nzambi, kadi mono kwizaka na luzolo ya mono mosi ve, kansi yandi fidisaka mono Yoa. 16:27

⁴³ Sambu na nki beno bakisa ve ndinga ya mono ? Yo ikele sambu na beno lenda ve kuwa mambu ya mono.

⁴⁴ Beno basikaka na tata ya beno diable, beno zola kusala luzolo ya tata ya beno. Yandi ikele mufwi tuka mu luyantiku, yandi telema mu kieleka ve, sambu na kieleka ikele mu yandi ve. Bu yandi tuba luvunu, yandi ikele kutuba sambu na yandi mosi, kadi yandi ikele nkwa luvunu, ye tata ya yo. 1 Yoa. 3:8

⁴⁵ Kansi sambu na mono tuba kieleka; beno kwikila mono ve.

⁴⁶ Buna nani mu beno bedisa mono mu masumu ? Kana mono tuba kieleka, sambu na nki beno kwikila mono ve ? 1 Yoa. 3:5

⁴⁷ Yandi ya ikele ya Nzambi ikele kuwa mambu ya Nzambi; sambu na yai beno ikele kuwa ve, sambu na beno ikele ya Nzambi ve. Yoa. 18:37; 1 Yoa. 4:6

⁴⁸ BaYuda vutulaka ye tubaka kwa yandi: Beto tuba mbote: Nge ikele muSamalia, ye nge ikele na mpeve mbi ? Yoa. 7:20; 10:20; Mat. 10:25

⁴⁹ Yesu vutulaka: Mono ikele na mpeve mbi ve, kansi mono zitisa Tata ya mono, ye beno saula mono.

⁵⁰ Mono sosa ve nkembo ya mono, mosi ikele kusosa yo, ye fundisa.

⁵¹ Kieleka, kieleka, mono tuba kwa beno: Kana muntu lunda ndinga ya mono, yandi tamona lufwa ve mvu ya mvu. Yoa. 5:24; 11:25

⁵² BaYuda tubaka kwa yandi: Ntangu yai beto zaba, nke ikele na mpeve mbi; Abalahami kufwaka ye bambikudi; ye nge tuba: Kana muntu lunda mambu ya mono, yandi tamona lufwa ve mvu ya mvu.

⁵³ Kansi nge luta Abalahami, tata ya beto ya kufwaka ? Ye bambikudi kufwaka mpe. Nge ikele dikitula nani ?

⁵⁴ Yesu vutulaka: Kana mono dikembisa, nkembo ya mono ikele mpamba. Tata ya mono ikele kukembisa mono, ye beno tuba: Yandi ikele Nzambi ya beno.

⁵⁵ Kansi beno zaba yandi ve, kansi mono zaba yandi. Kana mono tuba: Mono zaba yandi ve, mono tavanda nkwa luvunu mpilamosi beno, kansi mono zaba yandi, ye mono lunda mambu ya yandi.

⁵⁶ Abalahami tata ya beno, yangalalaka kumona kilumbu ya mono; yandi monaka yo, ye yangalalaka.

⁵⁷ Buna baYuda tubaka kwa yandi: Nge imene kulunga ve mvu makumi tanu, ye nge imene kumona Abalahami ?

⁵⁸ Yesu tubaka kwa bau: Kieleka, kieleka, mono tuba kwa beno, ntete na Abalahami butukaka, mono ikele.

⁵⁹ Buna bau bakaka matadi kulosa yandi. Kansi Yesu swamaka, yandi basikaka na tempelo. Yoa. 10:31