Yoane 7 - Le Nouveau Testament en Kikwango 1950

Yesu kwenda ku Yelusalemi

¹ Landa mambu yai, Yesu tambulaka mu Ngalili; kadi yandi zolaka kuzieta mu Yuda ve, sambu na baYuda, sosaka kufwa yandi.

² Fete ya baYuda, yo ikele fete ya mafwokula, vandaka mfinama.

³ Bampangi ya yandi tubaka kwa yandi: Katuka awa, ye kwenda ku Yuda, na banlonguki ya nge mpe lenda kumona bisalu ya nge sala.

⁴ Kadi muntu mosi ve sala kima mu kinsweki, ye yandi kibeni zola ve kumonika nantwala na bantu. Kana nge sala mpilayai, dimonisa kwa nsi.

⁵ Kadi bampangi ya yandi mpe kwikila mu yandi ve. Mal. 3:21

⁶ Buna Yesu tubaka kwa bau: Ntangu ya mono imene kwiza ve, kansi ntangu ya beno ikele kulunga ntangu yonso.

⁷ Nsi lenda kuvanda na beno makasi ve, kansi kwa mono yo ikele kuvanda na makasi, sambu na mono tuba kitemo ya yo na bisalu ya yo ikele mbi.

⁸ Beno kwenda ku fete, mono ikele kwenda ve ntangu yai ku fete yai, kadi ntangu ya mono imene kulunga ve.

⁹ Bu yandi imene kutuba mambu yai kwa bau, yandi kibeni vandaka mu Ngalili.

¹⁰ Kansi bu bampangi ya yandi imene kwenda ku fete, buna yandi kibeni kwendaka mpe, nantwala na bantu ve, kansi bonso mu kinsweki.

¹¹ Mpilayai, baYuda sosaka yandi na fete, ye tubaka: Yandi ikele wapi ?

¹² Ye bamina mingi vandaka nakati kibuka, sambu na yandi. Bankaka tubaka: Yandi ikele muntu ya mbote; bankaka tubaka: Ve, yandi ikele kuvengumisa bantu.

¹³ Muntu tubaka sambu na yandi nantwala na bantu ve, kadi bau titaka baYuda. Yoa. 9:22; 12:42; 19:38

Yesu longa mu tempelo

¹⁴ Nakati na bilumbu ya fete, Yesu kwendaka mu tempelo ye longaka.

¹⁵ Mpilayai baYuda yitukaka kutuba: Mpila nki muntu yai zaba masonukwa bu yandi imene kulonguka ve ?

¹⁶ Buna Yesu vutulaka kwa bau, ye tubaka: Malongi ya mono ikele ya mono ve, kansi ya yandi ya fidisaka mono. Yoa. 12:49

¹⁷ Kana muntu zola kusala luzolo ya yandi, yandi tazaba malongi, kana yo katuka na Nzambi, keti mono tuba mu mono kibeni.

¹⁸ Yandi ya tuba mu yandi kibeni, ikele kusosa nkembo ya yandi kibeni, kansi yandi ya sosa nkembo ya yandi ya fidisaka yandi, ikele kieleka, ye konda lunungu ikele mu yandi ve. Yoa. 5:41

¹⁹ Mose pesaka beno nsiku ve ? Kansi mosi mu beno ikele kusala nsiku ve. Sambu na nki beno sosa kufwa mono ? 2 Mose 20:11; Bis. 7:53; 10:39

²⁰ Kibuka vutulaka ye tubaka: Nge ikele na mpeve mbi. Nani sosa kufwa nge ? Yoa. 8:48, 52; 10:20

²¹ Yesu vutulaka kutuba kwa bau; Mono salaka mambu mosi kaka ye beno yonso yitukaka sambu na yo. 7:11-32

²² Mose pesaka beno nsiku ya nzengolo—yo katuka na Mose ve, kansi na batata—ye mu kilumbu ya luvundu beno ikele kuzenga muntu. 1 Mose 17:10; 3 Mose 12:3; Lom. 4:11

²³ Kana muntu baka nzengolo mu kilumbu ya luvundu, sambu na nsiku ya Mose takufwa ve, buna beno ikele na mono makasi, sambu na mono belulaka muntu mu kilumbu ya luvundu ?

²⁴ Fundisa ve, bonso beno mona, kansi fundisa mfundusu ya lunungu. Bing. 24:23

²⁵ Bantu yankaka ya Yelusalemi tubaka: Yai ikele yandi ve, ya bau zolaka kufwa ? Yoa. 5:18

²⁶ Kansi, tala, yandi ikele kutuba mu kikesa, ye bau ikele kutuba mambu kwa yandi ve. Bakuluntu zaba mu kieleka, yandi ikele Klisto ?

²⁷ Kansi beto zaba muntu yai sika yandi katukaka, kansi bu Klisto kwiza, muntu mosi tazaba ve sika na yandi katuka. Mat. 13:55

²⁸ Buna Yesu bokaka mu tempelo, kulonga ye kutuba: Beno zaba mono, ye beno zaba sika ya mono katuka, mono kwizaka mu mono kibeni ve; kansi ya fidisaka mono ikele kieleka; ya beno zaba ve. Yoa. 8:14

²⁹ Mono zaba yandi, sambu na mono katuka kwa yandi; ye yandi fidisaka mono. Mat. 11:27; Yoa. 10:15

³⁰ Buna bau sosaka kusimba yandi, kansi muntu tulaka diboko va yandi ve, sambu na lokula ya yandi imene kwiza ve. Mal. 11:18; Luk. 20:19; Yoa. 8:20

³¹ Kansi mingi ya kibuka kwikilaka mu yandi, ye tubaka: Bu Klisto takwiza, yandi tasala bidimbu ya luta mingi na muntu yai imene kusala ? Yoa. 8:30

³² Bafalisi kuwaka kibuka baminaka mambu yai sambu na yandi; bambuta banganga ye bafalisi fidisaka bapolisi kusimba yandi.

³³ Mpilayai Yesu tubaka kwa bau: Ntangu fioti mono ikele na beno, buna mono takwenda kwa yandi ya fidisaka mono. Yoa. 12:35; 16:16

³⁴ Beno tasosa mono, ye beno tamona mono ve, sika ya mono ikele, beno lenda kukuma kuna ve. Yoa. 8:21; 12:35; 13:33

³⁵ Mpilayai baYuda tubanaka: Wapi ndambu yandi takwenda, na beto lenda kumona yandi ve ? Yandi takwenda kwa bau ya mwangana nakati ya baElene ye longa baElene ?

³⁶ Nki ndinga yai ya yandi tubaka ? Beno tasosa mono, kansi beno tamona mono ve, ye sika na mono ikele, beno lenda kukuma kuna ve.

Yesu tuba sambu na ngolo ya Mpeve Yanlongo

³⁷ Mu kilumbu ya nsuka, kilumbu ya nene ya fete, Yesu telemaka, ye bokaka: kutuba: Kana muntu ikele na kiwini bika yandi kwiza kwa mono ye kunwa. 3 Mose 23:36; Yes. 55:1; Nzai. 22:17

³⁸ Yandi ya kwikila mu mono, bonso masonukwa tuba: Tuka mu yandi tabasika banzadi ya masa ya moyo.

³⁹ Kansi yandi tubaka mambu yina sambu na Mpeve, na bau ya kwikilaka mu yandi, tabaka, kadi Mpeve imene kwiza ntete ve; sambu na Yesu imene kukembiswa ve. Yoeli 2:28; Bis. 2:17

Bau tulana ntembe sambu na Yesu.

⁴⁰ Buna bankaka mu bibuka bu bau kuwaka mambu yai, bau tubaka: Kieleka, yandi ikele mbikudi. Yoa. 6:14

⁴¹ Bankaka tubaka: Yai ikele Klisto; kansi bankaka tubaka: Klisto takatuka mu Ngalili ? Yoa. 1:45

⁴² Masonukwa tubaka ve ? Klisto takwiza mu nkuna ya Davidi ye tuka Betelemi bwala ya Davidi vandaka ? Nk. 132:11; Mika 5:2; Yes. 11:1; Mat. 2:5; Luk. 2:4

⁴³ Mpilayai kibuka kabanaka sambu na yandi. Yoa. 9:16; 10:19

⁴⁴ Bankaka zolaka kusimba yandi, kansi muntu tulaka maboko va yandi ve.

⁴⁵ Buna bapolisi kwizaka kwa bambuta banganga, ye kwa bafalisi, bau tubaka kwa bau: Sambu na nki beno twala yandi ve ?

⁴⁶ Bapolisi vutulaka: Ta mbala mosi ve muntu tubaka bonso muntu yai.

⁴⁷ Buna bafalisi vutulaka kwa bau: Kansi beno mpe imene kuvengumunwa ?

⁴⁸ Mosi mu bakuluntu keti bafalisi imene kukwikila yandi ? Yoa. 12:42; 1 Kol. 1:20; 2:8

⁴⁹ Kansi kibuka yai ya konda kuzaba nsiku ikele na ndola.

⁵⁰ Nikodemo mosi ya bau, ikele yandi ya kwizaka ntete kwa yandi, yandi tubaka kwa bau: Yoa. 3:1

⁵¹ Nsiku ya beto ikele kufundisa muntu, bu beto imene kuwa yandi ve, ye zaba ve mambu ya yandi salaka ?

⁵² Bau vutulaka ye tubaka kwa yandi: Nge mpe katuka na Ngalili ? Sosa ye tala, mu Ngalili mbikudi telema ve.

⁵³ Muntu na muntu kwendaka ku nzo ya yandi.