Yoane 6 - Le Nouveau Testament en Kikwango 1950

Yesu dikila mafunda tanu ya babakala

¹ Landa mambu yai, Yesu sabukaka ku simu ya mbu ya Ngalili, ikele mbu ya Tibelia. Mat. 14:13; Mal. 6:30; Luk. 9:10

² Kibuka ya nene landaka yandi, sambu na bau monaka bidimbu ya yandi salaka kwa bambevo.

³ Yesu tombokaka va mongo, kuna yandi vandaka na banlonguki ya yandi.

⁴ Pake, fete ya baYuda vandaka mfinama. 4 Mose 23:5

⁵ Yesu sendulaka meso ya yandi, ye kumona kibuka ya nene kwiza kwa yandi, ye tubaka kwa Filipo: Wapi beto tasumba mampa; na bayai lenda kudia ?

⁶ Ye yandi tubaka yai sambu na kuyunsa yandi, kadi yandi kibeni zabaka mambu ya yandi zola kusala.

⁷ Filipo vutulaka kwa yandi: Mampa ya mbongo nkama zole ya denali ikele kulunga ve kwa bau, na muntu na muntu tabaka ndambu fioti.

⁸ Nlonguki ya yandi mosi, Andele, mpangi ya Simoni Petelo, tubaka kwa yandi:

⁹ Mwana ikele awa, yandi ikele na mampa tanu ya nkeni ya orge, ye bambizi zole ya masa, kansi yai ikele nki kwa bayai mingi ? 2 Nt. 4:43

¹⁰ Yesu tubaka: Vandisa bantu. Sika yina vandaka matiti mingi. Buna babakala vandaka mu ntalu kitezo mafunda tanu.

¹¹ Buna Yesu bakaka mampa ye yandi pesaka matondo, buna yandi pesaka kwa bau ya vandaka, mpilayai mpe mbizi ya masa na kitezo ya bau zolaka.

¹² Bu bau imene kuyukuta, yandi tubaka kwa banlonguki ya yandi: Beno kutikisa bitini ya madia ya bika, ye kima mosi vila ve.

¹³ Mpilayai bau kutikisaka yau ye fulusa bitunga kumi ye zole na bitini ya mampa tanu ya nkeni ya orge ya bikaka, bu bantu yonso imene kudia.

Bantu zola kuyadisa Yesu mu kintinu

¹⁴ Mpilayai bu bantu monaka bidimbu ya yandi salaka, bau tubaka: Kieleka, yai ikele mbikudi ya takwiza mu nsi. 5 Mose 18:15, 18; Luk. 7:16; 24:19; Yoa. 4:19; 7:40

¹⁵ Mpilayai, bu Yesu zabaka, bau takwiza kubaka yandi mu ngolo, kuyadisa yandi ntinu, buna yandi mosi kwendaka diaka va mongo. Mat. 14:22; Mal. 6:45

Yesu tambula va masa

¹⁶ Ye bu nkokila kubwaka, banlonguki ya yandi kulumukaka ku mbu, Mat. 14:22; Mal. 6:45

¹⁷ bau kotaka mu bota, ye bau sabukaka ku simu ya mbu ku Kapenaumi. Ye mpimpa kubwaka, ye Yesu imene kwiza ve kwa bau.

¹⁸ Mbu vandaka kutelema mingi kwa mupepe ya ngolo ya vevumukaka.

¹⁹ Mpilayai, bu bau luaka bota kilometre iya keti tanu, bau monaka Yesu kutambula va mbu, yandi finamaka ku bota, bau vandaka na boma.

²⁰ Kansi yandi tubaka kwa bau: Yai ikele mono, vanda na boma ve.

²¹ Buna bau zola kubaka yandi mu bota, bota kumaka nswalu ku simu ya bau kwendaka.

Yesu tuba nsamu ya mampa ya moyo

²² Kilumbu ya landa, bu bantu ya telemaka na simu ya mbu, monaka kuna vandaka bota yankaka ve, kansi mosi kaka, kansi Yesu kwendaka ve na banlonguki mu bota, kansi banlonguki ya yandi kwendaka bau mosi kaka.

²³ Babota yankaka katukaka na Tibelia, ye kwizaka mfinama ku sika ya bau kudiaka mampa, bu Mfumu imene kupesa matondo.

²⁴ Bu kibuka monaka, Yesu ikele kuna ve ye kanlonguki ya yandi mpe ve, bau kotaka mu babota, bau kwizaka ku Kapenaumi kusosa Yesu.

²⁵ Bu bau monaka yandi ku simu ya mbu, bau tubaka kwa yandi: Nlongi, nki ntangu nge kwizaka awa ?

²⁶ Yesu vutulaka kwa bau ye tubaka: Kieleka, kieleka mono tuba kwa beno: Beno sosa mono ve, sambu na beno monaka bidimbu, kansi sambu na beno kudiaka mampa, ye beno yukutaka.

²⁷ Sala ve sambu na madia ya vila, kansi sambu na madia ya vanda ku moyo mvu ya mvu, yina ya Mwana ya muntu tapesa beno, kadi Tata Nzambi tulaka kidimbu mu yandi. Yoa. 11:26; Mat. 3:17; 17:5; Yoa. 1:32; 5:37; 8:18

²⁸ Mpilayai bau tubaka kwa yandi: Nki beto fwiti kusala, na beto lenda kusala bisalu ya Nzambi ?

²⁹ Yesu vutulaka ye tubaka kwa bau: Yai ikele kisalu ya Nzambi: Na beno kwikila yandi ya yandi fidisaka. 1 Yoa. 3:23

³⁰ Buna bau tubaka kwa yandi: Nki kidimbu nge ikele kusonga, na beto lenda kumona ye kukwikila nge ? Nki nge sala ? Mat. 12:38; 16:1; 1 Kol. 1:22

³¹ Batata ya beto kudiaka mana mu nseke ya mpamba, bonso yo sonama: Yandi pesaka bau mampa ya kudia ya katuka na zulu. 1 Kol. 10:3

³² Buna Yesu tubaka kwa bau: Kieleka, kieleka, mono tuba kwa beno: Mose pesaka beno mampa ve ya katuka na zulu, kansi Tata ya mono pesa beno mampa ya kieleka ya katuka na zulu.

³³ Kadi mampa ya Nzambi ikele yo ya kulumukaka tuka zulu, ye pesaka moyo kwa bantu ya nsi.

³⁴ Buna bau tubaka kwa yandi: Mfumu, pesa beto mampa yai ntangu yonso.

³⁵ Buna Yesu tubaka kwa bau: Mono ikele mampa ya moyo. Konsomuntu ya kwiza kwa mono takufwa nzala ve ta mbala mosi; ye ya kwikila mono, tamona kiwini ve ta mbala mosi. Yes. 55:1; Mat. 11:28; Yoa. 4:14; 7:37

³⁶ Kansi mono tuba kwa beno, beno mpe, monaka mono, ye beno kwikila ve.

³⁷ Yonso ya Tata pesaka mono takwiza kwa mono, ye yandi ya kwiza kwa mono, mono takula yandi ta mbala mosi ve;

³⁸ kadi mono kulumukaka tuka zulu, sambu na kusala luzolo ya mono ve, kansi luzolo ya yandi ya fidisaka mono. Mat. 26:39; Yoa. 4:34; 5:30

³⁹ Yai ikele luzolo ya yandi ya fidisaka mono, na yina yonso ya yandi pesaka mono, mono lenda kuvidisa mosi ve, kansi fulukisa bau mu kilumbu ya nsuka. Yoa. 10:28; 17:12; 18:9

⁴⁰ Kadi yai ikele luzolo ya Tata, konsomuntu ya mona Mwana ye kwikila yandi, tavanda na moyo mvu ya mvu. Yoa. 3:15

⁴¹ Mpilayai baYuda baminaka yandi, sambu na yandi tubaka: Mono ikele mampa ya kulumukaka tuka zulu.

⁴² Bau tubaka: Kansi yai ikele Yesu ve, mwana ya Yosefi, tata ya yandi ye ngudi ya yandi beto zaba ? Buna nki yandi tuba ntangu yai: Mono kulumukaka tuka zulu ? Mat. 13:55; Luk. 4:22; Yoa. 7:27

⁴³ Yesu vutulaka ye tubaka kwa bau: Bamina nakati na beno kibeni ve.

⁴⁴ Muntu lenda ve kwiza kwa mono, kana Tata ya fidisaka mono imene kubenda yandi ve, ye mono tafulukisa yandi mu kilumbu ya nsuka.

⁴⁵ Yo ikele kusonama mu bambikudi: Bau yonso talonguka kwa Nzambi. Konsomuntu ya kuwa ye ya longuka kwa Tata, yandi ikele kwiza kwa mono. Yes. 54:13; Yel. 31:34; Yoa. 1:18; 1 Tes. 4:9; Eb. 1:8, 10

⁴⁶ Muntu ikele ve ya imene kumona Tata; kaka yandi ya katuka na Nzambi, yandi imene kumona Tata. Mat. 11:27; Luk. 10:22; Yoa. 1:18

⁴⁷ Kieleka, kieleka, mono tuba kwa beno: Yandi ya kwikila ikele na moyo mvu ya mvu. Yoa. 3:36

⁴⁸ Mono ikele mampa ya moyo.

⁴⁹ Batata ya beno kudiaka mana mu nsi ya mpamba, ye bau kufwaka. Yoa. 6:31; Eb. 3:16

⁵⁰ Yai ikele mampa ya kulumukaka tuka zulu; na muntu lenda kudia yo ye kufwa ve.

⁵¹ Mono ikele mampa ya ikele na moyo ya kulumuka tuka zulu. Kana muntu kudia mampa yai, yandi tavanda na moyo mvu ya mvu; mampa ya mono pesa ikele nsuni ya mono, ya mono tapesa sambu na moyo ya nsi. Yoa. 3:13

⁵² Buna baYuda vandana na ntembe, sambu na mambu yai, kutuba: Nki mpila muntu yai lenda kupesa beto nsuni ya yandi sambu na kudia ?

⁵³ Buna Yesu tubaka kwa bau: Kieleka, kieleka, mono tuba kwa beno: Kana beno kudia nsuni ya Mwana ya muntu ve, ye kunwa menga ya yandi ve, beno ikele ve na moyo mu beno. Yoa. 1:12

⁵⁴ Yandi ya kudia nsuni ya mono ye kunwa menga ya mono, ikele na moyo mvu ya mvu, mono tafulukisa yandi kilumbu ya nsuka.

⁵⁵ Kadi nsuni ya mono ikele madia kieleka, ye menga ya mono ikele ya kunwa kieleka.

⁵⁶ Yandi ya kudia nsuni ya mono, ye kunwa menga ya mono, yandi ikele kuvanda mu mono ye mono mu yandi.

⁵⁷ Bonso Tata ya moyo fidisaka mono, ye mono ikele na moyo sambu na Tata, mpilayai, yandi ya kudia mono, yandi mpe tavanda na moyo sambu na mono.

⁵⁸ Yai ikele mampa ya kulumukaka tuka zulu, ikele ve mpilamosi ya batata kudiaka, ye kufwaka; yandi ya kudia mampa yai tavanda na moyo mvu ya mvu.

⁵⁹ Mambu yai yandi tubaka mu nzo ya sambilu, bu yandi longaka mu Kapenaumi.

Banlonguki yunswa

⁶⁰ Buna banlonguki mingi ya yandi, bu bau kuwaka yo, tubaka: Mambu yai ikele ya ngolo, nani lenda kuwa yo ?

⁶¹ Kansi Yesu zabaka mu yandi kibeni, banlonguki ya yandi baminaka sambu na yai, yandi tubaka kwa bau: Beno ikele kuta sakuba sambu na mambu yai ?

⁶² Buna nki kana beno tamona Mwana ya muntu tomboka ku sika ya yandi vandaka ntete ?

⁶³ Mpeve ikele kupesa moyo, nsuni ikele na mfunu ve. Mambu ya mono tubaka kwa beno ikele mpeve ye moyo. 2 Kol. 3:6

⁶⁴ Kansi bankaka mu beno ikele kukwikila ve. Kadi Yesu zabaka tuka luyantiku banani yina ya konda kukwikila ye nani tayekula yandi. Yoa. 5:25; 13:11

⁶⁵ Yandi tubaka: Sambu na mambu yai mono tubaka kwa beno: Na muntu lenda kwiza kwa mono ve, kana yo peswa yandi ya Tata ve.

Kitemo ya Petelo

⁶⁶ Sambu na mambu yina banlonguki ya yandi mingi vutukaka, ye tambulaka na yandi diaka ve.

⁶⁷ Buna Yesu tubaka kwa kumi ye zole: Beno mpe zola kukatuka ?

⁶⁸ Buna Simoni Petelo vutulaka: Mfumu, kwa nani beto takwenda ? Nge ikele na ndinga ya moyo ya mvu ya mvu. Bis. 11:27

⁶⁹ Beto imene kukwikila ye kuzaba, nge ikele Nkwa Nlongo ya Nzambi. Yoa. 11:27

⁷⁰ Yesu vutulaka kwa bau: Mono solaka kumi ye zole ve ? Ye mosi mu beno ikele diable. Luk. 6:13

⁷¹ Yandi tubaka mambu yai sambu na Yudas Iskalioti, mwana ya Simoni, kadi yandi tayekula yandi, ikele mosi mu kumi ye zole.