Yoane 5 - Le Nouveau Testament en Kikwango 1950

Bambevo mu Beteseda

¹ Landa mambu yai, fete ya baYuda vandaka, ye Yesu tombokaka ku Yelusalemi.

² Mu Yelusalemi na mwelo ya mameme, zinga ikele kubingwa mu kiEbele Beteseda. Muna vandaka mavula ya kaba ndambu tanu.

³ Mu yau lalaka kibuka ya bambevo ye bampofo ye ya batembidi ye ya tanda, bau vingila vundula ya masa.

⁴ Wanjo ya Mfumu vandaka na kifu ya kota mu zinga ye vundula masa, konsomuntu kota ntete bu masa vundulwa, yandi beluka na konso maladi ya vandaka na yandi.

⁵ Kuna vandaka muntu mosi, ya vandaka na maladi mvu makumi tatu ye nana.

⁶ Bu Yesu monaka yandi kulala, yandi zaba yandi imene kubela ntangu mingi, yandi tubaka kwa yandi: Nge zola kubeluka ?

⁷ Mbevo vutulaka kwa yandi: Mfumu, mono ikele na muntu ve bu masa vundulwa, kutula mono mu zinga, kansi bu mono ikele kwiza yankaka imene kukulumuka nantwala na mono.

⁸ Yesu tubaka kwa yandi: Telema, baka mbeto ya nge, tambula. Mat. 9:6

⁹ Nswalu, muntu yina belukaka yandi bakaka mbeto ya yandi, ye tambulaka. Ye kilumbu yina vandaka kilumbu ya luvundu. Yoa. 9:14

BaYuda zola kufwa Yesu

¹⁰ Mpilayai baYuda tubaka kwa yandi ya belukaka: Yai ikele kilumbu ya luvundu, nsiku pesa nzila ve sambu na nge kunata mbeto. 2 Mose 20:10; Yel. 17:21; Mat. 12:2

¹¹ Yandi vutulaka kwa bau: Yandi ya belulaka mono tubaka kwa mono: Baka mbeto ya nge tambula.

¹² Bau yuvulaka yandi: Nani muntu yina tubaka kwa nge: Baka mbeto ya nge, tambula ?

¹³ Kansi yandi ya belukaka, zabaka ve kana nani, kadi Yesu dikatulaka, sambu na kibuka mingi vandaka mu sika yina.

¹⁴ Nanima, Yesu monaka yandi mu tempelo ye tubaka kwa yandi: Tala, nge imene kubeluka sala masumu diaka ve, kana mambu ya luta ya ntete takubwila nge. Yoa. 8:11

¹⁵ Buna muntu yina kwendaka ye tubaka kwa baYuda yandi ikele Yesu ya belulaka mono.

¹⁶ Sambu na mambu yai, baYuda zomaka Yesu, sambu na yandi salaka mambu yai na kilumbu ya luvundu.

¹⁷ Kansi yandi vutulaka kwa bau: Tata ya mono sala ti ntangu yai; mono mpe sala.

Yesu ye Tata bau ikele mosi

¹⁸ Sambu na mambu yai, baYuda luta kusosa kufwa yandi, sambu na yandi kufwaka nsiku ya lumbu ya luvundu, ye yandi mpe bingaka Nzambi, Tata ya yandi, yandi ikele dikitula mpilamosi Nzambi.

¹⁹ Buna Yesu vutulaka ye tubaka kwa bau: Kieleka, kieleka, mono tuba kwa beno: Mwana lenda ve kusala mambu yandi mosi, kansi yina ya yandi monaka Tata kusala; kadi mambu yonso ya yandi salaka, yina Mwana mpe sala mutindu mosi. Yoa. 8:38

²⁰ Kadi Tata zola Mwana ya yandi ye ikele kusonga yandi mambu yonso ya yandi kibeni sala, ye yandi tasonga yandi mpe, bisalu ya luta yina, na beno tayituka. Yoa. 3:35

²¹ Kadi bonso Tata fulukisaka bafwa ye pesaka bau moyo, buna Mwana ikele kupesa moyo kwa konso ya yandi zola.

²² Kadi Tata kibeni ikele kufundisa muntu ve, kansi yandi imene kupesa mfundusu yonso kwa Mwana, Mat. 11:27; 28:18; Yoa. 17:2

²³ Na bantu yonso tazitisa Mwana, bonso bau zitisa Tata. Konsomuntu ya zitisa Mwana ve, ikele kuzitisa Tata ve, ya fidisaka yandi.

²⁴ Kieleka, kieleka, mono tuba kwa beno: Konsomuntu ikele kuwa ndinga ya mono, ye kwikila yandi ya fidisaka mono, ikele na moyo mvu ya mvu, ye kuma mu mfundusu ve, kansi yandi imene kukatuka na lufwa, ye kwiza ku moyo. Luk. 23:43; Yoa. 3:18; 6:40, 47; Ef. 2:6

²⁵ Kieleka, kieleka, mono tuba kwa beno: Lokula ikele kwiza, yo ikele tangu yai, bu bafwa takuwa ndinga ya Mwana ya Nzambi, ye bau ya kuwa tavanda na moyo. Lom. 6:4; Ngal. 2:20; Ef. 2:1, 5; 5:15

²⁶ Kadi bonso Tata ikele na moyo mu yandi kibeni, mpilayai yandi pesaka kwa Mwana kuvanda na moyo mu yandi kibeni mpe.

²⁷ Yandi pesaka yandi ngolo kuzenga mfundusu, sambu na yandi ikele Mwana ya muntu.

²⁸ Yituka ve, sambu na mambu yai, kadi lokula takwiza na bau yonso ya ikele na bandiamu takuwa ndinga ya yandi, Dan. 12:2; 1 Kol. 15:52; 1 Tes. 4:16

²⁹ bau tabasika, ya salaka mbote ku mfulukulu ya moyo; ya salaka mbi, takwiza ku mfulukulu ya mfundusu. Mat. 25:46

³⁰ Mono lenda kusala kima mosi ve, mu mono kibeni; bonso mono kuwa, mono fundisa, ye mfundusu ya mono ikele ya lunungu, sambu na mono sosa luzolo ya mono mosi ve, kansi luzolo ya yandi ya fidisaka mono. Yoa. 6:38

³¹ Kana mono tuba kitemo sambu na mono kibeni, kitemo ya mono ikele kieleka ve.

³² Yankaka ikele kutuba kitemo sambu na mono; mono zaba, kitemo yai ya yandi ikele kutuba sambu na mono ikele kieleka. Yes. 42:1; Mat. 17:5; Yoa. 8:14, 18

³³ Beno fidisaka kwa Yoane ye yandi tubaka kitemo kieleka. Yoa. 1:19

³⁴ Kansi kitemo ya mono baka ikele ya muntu ve, kansi mono tuba mambu yai, na beno lenda kuvuluswa.

³⁵ Yandi vandaka mwinda ya lema ye kienzula: ye beno zolaka ntangu fioti kuyangalala mu mwini ya yandi.

³⁶ Kansi kitemo ya mono ikele, na yo luta yina ya Yoane, kadi bisalu ya Tata pesaka mono kumanisa yau, bisalu yai ya mono sala, kutuba kitemo sambu na mono, na Tata imene kufidisa mono. Yoa. 10:25; 14:11

³⁷ Ye Tata ya fidisaka mono, yandi tubaka kitemo sambuna mono, beno imene kuwa ndinga ya yandi ta ntangu mosi ve, keti mona nitu ya yandi. Mat. 3:17; 17:5; Yoa. 6:27; 12:28; 2 Pet. 1:17; 2 Mose 33:20; 5 Mose 4:12; 1 Tim. 6:16; 1 Yoa. 4:12

³⁸ Ye mambu ya yandi ikele kuvanda mu beno ve, kadi yandi ya yandi fidisaka, beno kwikilaka yandi ve.

³⁹ Sosa mu masonukwa, sambu na beno banza, mu yau beno ikele na moyo mvu ya mvu, yai ikele yau ya tuba kitemo sambu na mono. Luk. 16:29; Bis. 17:11; Yes. 8:20; 34:16; 5 Mose 18:15; Yel. 23:5; Dan. 9:24; Yoa. 1:45

⁴⁰ Ye beno zola kwiza kwa mono ve, na beno lenda kuvanda na moyo.

⁴¹ Mono ikele kubaka nkembo tuka bantu ve.

⁴² Kansi mono zaba beno, na beno ikele na zola ya Nzambi ve mu beno.

⁴³ Mono kwizaka mu nkumbu ya Tata ya mono, kansi beno baka mono ve; kana yankaka takwiza mu nkumbu ya yandi mosi, beno tabaka yandi.

⁴⁴ Mpila nki beno lenda kukwikila, bu beno sosana nkembo, kansi beno sosa ve nkembo ya katuka na Nzambi kibeni kaka ?

⁴⁵ Banza ve na mono tafundisa beno kwa Tata. Mosi ikele tafundisa beno, ikele Mose, mu yandi beno ikele kutula vuvu.

⁴⁶ Kadi kana beno kwikila Mose, beno lenda kukwikila mono mpe, kadi yandi sonikaka sambu na mono. 1 Mose 3:15; 22:18; 49:10; 5 Mose 18:15, 18

⁴⁷ Kansi kana beno kwikila ve masonukwa ya yandi, buna mpila nki beno takwikila bandinga ya mono ?