Yoane 21 - Le Nouveau Testament en Kikwango 1950

Yesu monika kwa banlonguki diaka

¹ Landa mambu yai, Yesu monikaka diaka kwa banlonguki na mbu ya Tibelia. Yandi monikaka mpilayai:

² Kuna kutikisaka Simoni Petelo ye Toma ya bau binga Didimo, ye Natanaeli ya Kana mu Ngalili, ye bana ya Zebedai, ye banlonguki ya yandi zole yankaka.

³ Simoni Petelo tubaka kwa bau: Mono imene kwenda kutamba bambizi ya masa. Bau tubaka kwa yandi: Beto mpe kwenda na nge. Bau kwendaka, ye kotaka mu bota; ye mpimpa yina bau simbaka kima ve.

⁴ Bu kumakia, Yesu telemaka va simu, kansi banlonguki zabaka ve yo ikele Yesu. Yoa. 20:14

⁵ Buna Yesu tubaka kwa bau: Bana, beno ikele na bima ya kudia ? Bau vutulaka kwa yandi: Ve.

⁶ Yandi tubaka kwa bau: Losa konde va lueka ya kibakala ya bota, ye beno tamona. Buna bau losaka ye ntangu yai bau lendaka ve kubenda yo sambu na bambizi mingi.

⁷ Buna nlonguki yina ya Yesu zola tubaka kwa Petelo: Yai ikele Mfumu: Mpilayai bu Simoni Petelo kuwaka yo ikele Mfumu, yandi kangaka mvwatu ya yandi sambu na yandi imene katula yo, sambu na kisalu, yandi dilosaka mu mbu. Yoa. 13:23; 19:26; 20:2

⁸ Banlonguki yankaka kwizaka mu bota ya fioti, kadi bau vandaka ntama ve tuka simu, kitezo ya metre nkama, bau bendaka konde ya fuluka na bambizi.

⁹ Bu bau imene kutomboka ku mukidi, bau monaka tiya ya makala; ye bambizi vandaka va yau ye mampa.

¹⁰ Yesu tubaka kwa bau: Kwiza na ndambu ya bambizi ya beno imene kusimba ntangu yai.

¹¹ Buna Simoni Petelo tombokaka ye bendaka konde ku mukidi, yo fulukaka na bambizi yanene, nkama mosi ye makumi tanu ye tatu. Bambizi mingi vandaka kansi konde pasukaka ve.

¹² Yesu tubaka kwa bau: Kwiza kudia. Kansi banlonguki vandaka ve na kikesa kuyuvula yandi: Nge ikele nani ? Bau zabaka yai ikele Mfumu.

¹³ Yesu kwizaka, bakaka mampa, ye pesaka bau, ye mbizi mpe.

¹⁴ Yai ikele mbala ya tatu ya Yesu monikaka kwa banlonguki nanima na yandi imene kufulukiswa tuka bafwa.

Yesu tuba ndinga kwa Petelo

¹⁵ Bu bau manisa kudia, Yesu tuba kwa Simoni Petelo: Simoni, mwana ya Yona, Nge zola mono na luta bau yai ? Yandi tubaka kwa yandi: E, Mfumu, nge zaba, na mono zola nge. Yandi tubaka kwa yandi: Dikila bana mameme ya mono.

¹⁶ Yandi tubaka diaka kwa yandi mbala ya zole: Simoni, mwana ya Yona, Nge zola mono ? Yandi tubaka kwa yandi: E, Mfumu, nge zaba na mono zola nge. Yandi tubaka kwa yandi: Vanda mvungi ya mameme ya mono.

¹⁷ Yandi tubaka kwa yandi diaka mbala ya tatu: Simoni, mwana ya Yona, Nge zola mono ? Petelo vandaka na ntantu, sambu na yandi tubaka kwa yandi mbala ya tatu: Nge zola mono ? Yandi tubaka kwa Yandi: Mfumu, nge zaba mambu yonso; nge zaba na mono zola nge. Yesu tubaka kwa yandi: Dikila mameme ya mono.

¹⁸ Kieleka, kieleka mono tuba kwa nge bu nge vandaka toko, nge kangaka mukaba ya nge, ye tambulaka na sika ya nge zola, kansi bu nge tanuna, nge tanangula maboko ya nge, yankaka takanga nge mukaba ye nata nge na sika ya nge zola ve. 2 Pet. 1:14

¹⁹ Yandi tubaka yai kusonga nki mutindu ya lufwa ya yandi takembila Nzambi. Ye bu yandi imene kutuba yai, yandi tubaka kwa yandi: Landa mono!

²⁰ Petelo pindukaka, ye monaka nlonguki yina ya Yesu zola kulanda, ikele yandi ya yekemaka va ntulu ya yandi bu bau kudiaka madia, ye tubaka: Mfumu ikele nani ya tayekula nge ?

²¹ Bu Petelo monaka yandi, yandi tubaka kwa Yesu: Mfumu, buna muntu yai tasala nki ?

²² Yesu tubaka kwa yandi: Kana mono zola yandi vingila ti mono kwiza, yai ikele nki kwa nge ? Nge landa mono.

²³ Mpilayai mambu yai mwanganaka nakati na bampangi: Na nlonguki yai takufwa ve. Kansi Yesu tubaka kwa yandi ve: Nge takufwa ve; kansi, Kana mono zola yandi vingila ti mono kwiza, yai ikele nki kwa nge ?

Mambu ya Yoane sonikaka ikele ya kieleka.

²⁴ Yai ikele nlonguki ya tubaka kitemo sambu na yai ye sonikaka mambu yai, ye beto zaba, kitemo ya yandi ikele kieleka.

²⁵ Mambu yankaka mingi mpe ikele ya Yesu salaka, kana yau yonso sonama, mono banza nsi yamvimba lenda kumona sika ve kutula mikanda ya tasonukwa.