Yoane 20 - Le Nouveau Testament en Kikwango 1950

Bankento ye Petelo ye Yoane kwendaka ku ndiamu

¹ Kilumbu yantete ya lumingu Malia Mangadala kwizaka ku ndiamu na suka yonso, bu mpimpa ikele, yandi monaka ditadi imene kukatuka na ndiamu. Mat. 28:1; Mal. 16:1; Luk. 24:1

² Buna yandi kwendaka na ntinu, ye kwizaka kwa Simoni Petelo ye kwa nlonguki yankaka, yandi ya Yesu zola, ye tubaka kwa bau: Bau imene kukatula Mfumu na ndiamu, beto zaba ve sika ya bau tulaka yandi.

³ Buna Petelo basikaka ye nlonguki yankaka, ye bau kwenda ku ndiamu.

⁴ Bau zole kwendaka ntinu sikamosi, kansi nlongiku yankaka, yandi lutaka Petelo ntinu, yandi kumaka ku ndiamu ntete.

⁵ Bu yandi yinamaka ye kutala muna, yandi monaka lele ya lino va ntoto, kansi yandi kotaka muna ve.

⁶ Buna Simoni Petelo kwizaka kulanda yandi ye kotaka mu ndiamu, yandi talaka lele ya lino va ntoto,

⁷ ye kitambala ya vandaka va ntu ya yandi, yo vandaka sikamosi na lele ya lino ve, kansi ya kanga sika na yo mosi.

⁸ Buna nlonguki yankaka ya kwizaka ntete kotaka mu ndiamu mpe, ye yandi monaka ye kwikilaka.

⁹ Kadi bau imene kuzaba masonukwa ve, na yandi fwiti kufulukiswa diaka tuka bafwa.

¹⁰ Mpilayai banlonguki vutukaka diaka ku banzo ya bau.

Yesu monika kwa Malia Mangadala

¹¹ Kansi Malia telemaka nanganda ya ndiamu, kudila. Bu yandi dilaka, yandi yinamaka ye talaka mu ndiamu,

¹² yandi monaka banjo zole mu mvwatu mpembe kuvanda, mosi na ntu ye mosi na makulu, sika ya nitu ya Yesu lalaka.

¹³ Bau tubaka kwa yandi: Nkento, sambu na nki nge ikele kudila ? Yandi tubaka kwa bau: Sambu na bau imene kukatula Mfumu ya mono ye mono zaba ve sika bau tulaka yandi.

¹⁴ Bu yandi imene kutuba yai, yandi pinduka nanima ye mona Yesu kutelema, ye zaba ve na yai ikele Yesu.

¹⁵ Yesu tubaka kwa yandi: Nkento, sambu na nki nge ikele kudila ? Nge sosa nani ? Yandi banzaka, yandi ikele muyidiki ya dilanga, yandi tubaka kwa yandi: Mfumu, kana nge imene kukatula yandi, songa mono sika nge tulaka yandi, na mono takatula yandi.

¹⁶ Yesu tubaka kwa yandi: Malia. Yandi pindukaka, ye tubaka kwa yandi mu kiEbeleo: Labuni! yo ikele kubingwa, Nlongi!

¹⁷ Yesu tuba kwa yandi: Valakana mono ve; sambu na mono imene kutomboka ntete kwa Tata ve, kansi kwenda kwa bampangi ya mono ye tuba kwa bau: Mono tatomboka kwa Tata ya mono, ye Tata ya beno, ye Nzambi ya mono ye Nzambi ya beno.

¹⁸ Malia Mangadala kwizaka ye tubaka kwa banlonguki: —Mono imene kumona Mfumu, —ye na yandi tubaka mambu yai na yandi.

Yesu monika kwa banlonguki

¹⁹ Bu nkokila imene kubwa na kilumbu yina ya vandaka kilumbu yantete ya lumingu, bu mielo ikele ya kanga sika na banlonguki vandaka sambu na boma ya baYuda, buna Yesu kwizaka, ye telemaka nakati ya bau, ye tubaka kwa bau: Yenge kwa beno! Luk. 24:36; 1 Kol. 15:5

²⁰ Bu yandi imene kutuba yai, yandi songaka bau maboko ya yandi ye lubanzi ya yandi, buna banlonguki vandaka na kiese, bu bau monaka Mfumu.

²¹ Buna Yesu tubaka kwa bau diaka: Yenge kwa beno; bonso Tata fidisaka mono buna mono fidisa beno mpe. Yoa. 17:18

²² Bu yandi imene kutuba yai, yandi tulaka mupepe ya yandi va bau, yandi tubaka kwa bau: Beno baka Mpeve Yanlongo.

²³ Kwa konsonani ya beno vidisa masumu, yau imene kuvidiswa, ye kwa konsonani ya beno kanga yau, yau ikele ya kangwa. Mat. 16:19; 18:18

²⁴ Kansi Toma, mosi ya kumi ye zole, ya bingwa Didimo, vandaka na bau ve, bu Yesu kwizaka.

²⁵ Buna banlonguki yankaka tubaka kwa yandi: Beto monaka Mfumu. Kansi yandi tubaka kwa bau: Kana mono tamona ve mputa ya nsonso mu maboko ya yandi, ye tula musabi ya mono mu mputa ya nsonso ve, ye tula ve diboko ya mono mu lubanzi ya yandi, mono takwikila ve. Nk. 22:16

²⁶ Nanima na bilumbu nana banlonguki ya yandi vandaka mu nzo diaka, ye Toma vandaka na bau, Yesu kwizaka bu mielo ikele ya kanga, yandi telemaka nakati ya bau ye tubaka: Yenge kwa beno!

²⁷ Buna yandi tubaka kwa Toma: Tula musabi ya nge ye tala maboko ya mono, ye tula diboko ya nge mu lubanzi ya mono. Konda lukwikilu ve, kansi kwikila.

²⁸ Toma vutulaka ye tubaka kwa yandi: Mfumu ya mono ye Nzambi ya mono.

²⁹ Yesu tubaka kwa yandi: Sambu na nge imene kumona mono, nge kwikila. Kiese ikele na bau ya mono ve, kansi kwikilaka. Yoa. 4:48; 1 Pet. 1:8; Eb. 11:1

³⁰ Bidimbu yankaka mingi Yesu salaka nantwala na banlonguki ya yandi ya ikele kusonama mu nkanda yai ve.

³¹ Kansi yai ikele kusonama, na beno lenda kukwikila, Yesu ikele Klisto, Mwana ya Nzambi, na beno kwikila, beno tavanda na moyo mu nkumbu ya yandi. Yoa. 5:24; 1 Yoa. 5:13