Yoane 19 - Le Nouveau Testament en Kikwango 1950

Yesu fundiswa kwa Pilatu

¹ Mpilayai Pilatu bakaka Yesu, ye bulaka yandi fimbu. Mat. 27:24; Mal. 15:15; Luk. 23:24

² Ye basoldat tungaka mpu ya nsende, ye tulaka yo va ntu ya yandi, bau vwatisaka yandi kazaku mbwaki;

³ bau kwizaka kwa yandi ye tubaka: Mbote, ntinu ya baYuda; bau bulaka yandi bambata.

⁴ Pilatu basikaka diaka ye tubaka kwa bau: Tala, mono imene kutwala yandi kwa beno, na beno lenda kuzaba, na mono mona mbi mu yandi ve. Yoa. 18:38

⁵ Buna Yesu basikaka ye imene kuvwatwa mpu ya nsende, ye kazaku mbwaki. Pilatu tubaka kwa bau: Tala, muntu!

⁶ Bu bambuta banganga ye bapolisi monaka yandi, bau bokaka ye kutuba: Koma yandi va kulunsi, koma yandi va kulunsi! Pilatu tubaka kwa bau: Baka yandi beno mosi, ye koma yandi va kulunsi, kadi mono mona mbi mu yandi ve. Mat. 27:23

⁷ BaYuda vutulaka kwa yandi: Beto ikele na nsiku; ye mu nsiku yai yandi lunga kufwa, sambu na yandi dikitula Mwana ya Nzambi. Mat. 26:63

⁸ Bu Pilatu kuwaka ndinga yai, yandi titaka mingi.

⁹ Yandi kotaka diaka mu nzo ya nyadi, ye tubaka kwa Yesu: Nge katuka wapi ? Kansi Yesu vutulaka mvutulu kwa yandi ve. Mat. 27:14; Mal. 15:5

¹⁰ Buna Pilatu tubaka kwa yandi: Nge tuba kwa mono ve ? Nge zaba ve mono ikele na ngolo kubika nge ? Ye mono ikele na ngolo kukoma nge va kulunsi.

¹¹ Yesu vutulaka kwa yandi: Nge ikele na ngolo ve na kusala kima kwa mono, kana yo peswa nge ve tuka zulu, kansi yandi ya yekula mono kwa nge ikele na masumu ya luta.

¹² Sambu na yai, Pilatu sosaka kubika yandi, kansi baYuda bokaka kutuba: Kana nge bika muntu yai, nge ikele nduku ya Kaisalia ve. Konso ikele dikitula ntinu, yandi ikele kubuya Kaisalia.

¹³ Bu Pilatu kuwaka mambu yai, yandi basisaka Yesu, ye vandaka na kiti ya mfundusu, na sika ya bingwa matadi ya yidika, kansi mu kiEbele: Ngabatha.

¹⁴ Yo vandaka kilumbu ya yidika ya Pake, yo vandaka lokula kumi ye zole, ye yandi tubaka kwa baYuda: Tala, ntinu ya beno!

¹⁵ Buna bau bokaka: Katula yandi, katula yandi, koma yandi va kulunsi! Pilatu tubaka kwa bau: Mono takoma ntinu ya beno va kulunsi ? Bambuta banganga vutulaka: Beto ikele na ntinu ve, kaka Kaisalia. Luk. 23:18

Bau kufwa Yesu va kulunsi

¹⁶ Buna yandi yekulaka yandi mu maboko ya bau, kukoma yandi va kulunsi. Buna bau bakaka Yesu, ye yandi basikaka. Mat. 27:31; Mal. 15:20; Luk. 23:26

¹⁷ Yandi dinatilaka kulunsi ya yandi ku sika ya bingwa sika ya mukuwa ya ntu, mu kiEbeleo yo bingwa Ngolongota;

¹⁸ kuna bau komaka yandi va kulunsi ye bantu zole yankaka, mosi na lueka, mosi na lueka, kansi Yesu nakati ye bau.

¹⁹ Pilatu sonikaka nsonokono ye tula yo va kulunsi, yo sonamaka: Yesu ya Nazaleti, Ntinu ya baYuda.

²⁰ BaYuda mingi tangaka nsonokono yai, kansi sika ya bau komaka Yesu vandaka mfinama ku mbanza; ye yo sonamaka mu kiEbeleo, ye kiLomo, ye kiElene.

²¹ Buna bambuta banganga ya baYuda tubaka kwa Pilatu: Sonika ve ntinu ya baYuda, kansi yandi tubaka: Mono ikele Ntinu ya baYuda.

²² Pilatu vutulaka: Yina ya mono imene kusonika, mono imene kusonika.

²³ Basoldat bu bau imene kukoma Yesu va kulunsi, bau bakaka mvwatu ya yandi, ye kabaka yo mu ndambu iya, soldat na soldat ndambu, nanima mpe kazaku ya vanda ya tela ve, kansi yo vandaka ya tunga na zulu ti na nsi. Mat. 27:35; Mal. 15:24; Luk. 23:34

²⁴ Buna bau tubaka: Bika beto pasula yo ve, kansi beto bula yo njeke, na tala nani tabaka yo, na masonukwa lenda kumaniswa ya tubaka: Bau kabaka mvwatu ya mono nakati na bau, bau bula mvwatu ya mono njeke. Buna basoldat salaka mpilayai.

Kutuba ya Yesu va kulunsi

²⁵ Mfinama na kulunsi ya Yesu telemaka ngudi ya yandi ye mpangi ya ngudi ya yandi, Malia nkento ya Klopa, ye Malia Mangadala. Mat. 27:39; Mal. 15:29; Luk. 23:25

²⁶ Mpilayai bu Yesu monaka ngudi ya yandi ye nlonguki yina ya yandi zola, telema kuna, yandi tubaka kwa ngudi ya yandi: Nkento, tala mwana ya nge.

²⁷ Buna yandi tubaka kwa nlonguki yina: Tala ngudi ya nge. Tuka lokula yina, nlonguki twalaka yandi ku nzo ya yandi kibeni.

²⁸ Bu Yesu zabaka mambu yonso imene kulunga, na masonukwa lenda kumaniswa, yandi tubaka: Mono ikele kiwini.

²⁹ Kuna vandaka kopo fuluka na vinia ya ndudi, buna bau fulusaka eponge na vinia ya ndudi, ye tulaka yo va nti ya hisope, bau tulaka yo mfinama ku munoko ya yandi.

³⁰ Bu Yesu imene kubaka vinia ya ndudi, yandi tubaka: Mambu imene; ye yandi kutula ntu, ye pesaka mpeve ya yandi.

Bau kotisa dionga mu lweka ya Yesu

³¹ Buna baYuda, sambu na yo vandaka kilumbu ya yidika, ye bantu lenda ve kubika va kulunsi mu kilumbu ya luvundu, kadi kilumbu ya luvundu yina vandaka kilumbu yanene. Bau lombaka Pilatu, kubuka makulu ya bau ye kukatula bau. Mal. 15:42

³² Buna basoldat kwizaka ye bukaka makulu ya yantete ye yina yankaka ya bau komaka va kulunsi sika mosi na yandi;

³³ kansi bu bau kwizaka kwa Yesu ye monaka na yandi imene kufwa, bau bukaka makulu ya yandi ve,

³⁴ kansi soldat mosi ya vandaka na dionga bulaka yandi mu lubanzi, nswalu menga ye masa basikaka.

³⁵ Yandi ya monaka yo, tubaka kitemo ye kitemo ya yandi ikele kieleka, ye yandi zaba na yandi tuba kieleka, na beno mpe lenda kukwikila. Yoa. 21:24

³⁶ Kansi mambu yina kubwaka na masonukwa lenda kumaniswa: Mukuwa ya yandi mosi tabukana ve. 2 Mose 12:46; 4 Mose 9:12; Nk. 34:20

³⁷ Diaka masonukwa yankaka tuba: Bau tatala yandi ya bau bulaka dionga. Zak. 12:10

Bau zika Yesu

³⁸ Landa mambu yai, Yosefi ya Alimataya, ya vandaka nlonguki ya Yesu, kansi mu kinsweki sambu na yandi titaka baYuda, yuvulaka Pilatu, kana yandi lenda kukatula nitu ya Yesu. Pilatu pesaka nzila. Mpilayai yandi kwizaka katula nitu ya yandi. Mat. 27:57; Mal. 15:42; Luk. 23:50

³⁹ Buna Nikodemo kwizaka mpe, yandi ya kwizaka ntete kwa Yesu mu mpimpa, kutwala mile ye aloe, yo vandaka kizitu ya kilo makumi tanu. Yoa. 3:1

⁴⁰ Buna bau bakaka nitu ya Yesu, ye zingilaka yo na lele ya lino sikamosi na bima ya nsunga ya mbote, bonso ikele kifu ya baYuda kuzika.

⁴¹ Mu sika yina ya bau komaka yandi va kulunsi, vandaka lupangu, ye mu lupangu vandaka ndiamu yampa, muna bau imene kutulwa muntu ve.

⁴² Muna bau tulaka Yesu, sambu na kilumbu ya yidika ya baYuda, kadi ndiamu vandaka mfinama.