Yoane 18 - Le Nouveau Testament en Kikwango 1950

Yesu kwenda ku Getesemane

¹ Bu Yesu imene kutuba mambu yai, yandi kwenda na banlonguki ya yandi, sabuka masa ya fioti ya Kedeloni, kuna vandaka lupangu, yandi kotaka muna yandi kibeni ye banlonguki ya yandi; Mat. 26:30, 36; Mal. 14:26, 32; Luk. 22:39

² Yuda mpe ya yekulaka yandi zabaka sika yina, kadi Yesu kwendaka kuna mbala na mbala ye banlonguki ya yandi.

³ Mpilayai Yuda imene kubaka kibuka ya basoldat ye bapolisi ya katuka na bambuta banganga ye bafalisi bau kwizaka kuna na mwinda ye tiya, ye bima ya nwanina.

⁴ Buna Yesu zaba mambu yonso ya takwiza kwa yandi, yandi basikaka ye tubaka kwa bau: Beno sosa nani ?

⁵ Bau vutulaka kwa yandi: Yesu ya Nazaleti. Yesu tubaka kwa bau: Mono ikele yandi. Yuda mpe ya yekulaka yandi, telemaka sikamosi na bau.

⁶ Bu yandi imene kutuba kwa bau: Mono ikele yandi, bau vutukaka nanima ye kubwa va ntoto.

⁷ Buna yandi yuvulaka bau diaka: Beno sosa nani ? Bau tubaka: Yesu ya Nazaleti.

⁸ Yesu vutulaka: Mono imene kutuba kwa beno: Mono ikele yandi. Mpilayai kana beno sosa mono, bika bau yai kwenda.

⁹ Na mambu lenda kumaniswa ya yandi tubaka: Bau ya nge pesaka mono, mono vidisaka ta mosi ve.

¹⁰ Buna Simoni Petelo vandaka na mbele ya mvita, yandi basisaka yo, ye bulaka mpika ya nganga yanene ye zengaka dikutu kibakala ya yandi. Nkumbu ya mpika ikele Mako. Mat. 26:51; Mal. 14:47; Luk. 22:50

¹¹ Buna Yesu tubaka kwa Petelo: Vutula mbele mu mukaba. Kopo ya Tata pesaka mono, mono takunwa yo ve ? Mat. 26:42

Yesu natwa kwa Ana

¹² Buna kibuka ya basoldat ye mbuta nkuluntu ye bapolisi ya baYuda, simbaka Yesu, ye kangaka yandi, Mat. 26:61; Mal. 14:47; Luk. 22:50

¹³ bau twalaka yandi ntete kwa Ana kadi yandi vandaka bukilo kwa Kayafa, ya vandaka nganga yanene mvu yina.

¹⁴ Kansi Kayafa ikele yandi ya pesaka baYuda mayele, na yo ikele mbote na muntu mosi kufwa sambu na bantu.

Petelo buya Yesu

¹⁵ Simoni Petelo landaka Yesu ye nlonguki yankaka. Nlonguki yina yankaka zabakana kwa nganga yanene, yandi kotaka sikamosi na Yesu mu kianzala ya nganga yanene. Mat. 26:69, 75; Mal. 14:66, 72; Luk. 22:54, 62

¹⁶ Petelo telemaka nanganda ya mwelo. Buna nlonguki yina yankaka ya zabakana kwa nganga yanene, basikaka ye tuba kwa nkento nkengi ya mwelo, ye yandi kotisaka Petelo.

¹⁷ Buna sielo nkento, nkengi ya mwelo, tubaka kwa Petelo: Kansi nge mpe ikele ya nlonguki ya muntu yai ? Yandi tubaka: Ikele mono ve.

¹⁸ Bisielo ye bapolisi telema kuna, bau kwika tiya ya makala kadi madidi vandaka, ye bau yotila: Petelo mpe telemaka sikamosi na bau, ye yotila tiya mpe.

¹⁹ Buna nganga yanene yuvulaka Yesu sambu na banlonguki ya yandi ye malongi ya yandi. Mat. 26:27, 68; Mal. 14:53, 65; Luk. 22:66, 71

²⁰ Yesu vutulaka kwa yandi: Mono imene kutuba mu kinsweki ve kwa nsi, mono longaka mu nzo ya sambilu ye mu tempelo sika na baYuda yonso kutanaka. Mono tubaka mambu mosi ve mu kinsweki. Mat. 26:55

²¹ Sambu na nki nge yuvula mono ? Yuvula bau ya kuwaka mono, nki mono tubaka kwa bau. Tala, bau zaba mambu ya mono tubaka.

²² Bu yandi imene kutuba mambu yai, mosi mu bapolisi ya telemaka mfinama bulaka Yesu mbata, kutuba; nge vutula kwa nganga yanene mpilayai ?

²³ Yesu vutulaka kwa yandi: Kana mono imene kutuba mambu mbi, tuba kitemo ya mbi yina, kansi kana mono tubaka mbote, sambu na nki nge bula mono ?

Yesu nantwala ya Kayafa

²⁴ Ana fidisaka yandi ya kangwa kwa Kayafa, nganga yanene.

²⁵ Simoni Petelo telemaka ye yotilaka tiya. Buna bau tubaka kwa yandi: Kadi nge mpe ikele nlonguki ya yandi ? Yandi buyaka ye tubaka: Ikele mono ve.

²⁶ Buna mosi ya bampika ya nganga yanene, ikele mpangi ya yandi ya Petelo zengaka dikutu, yandi tubaka: Mono monaka nge mu lupangu sikamosi na yandi ve ?

²⁷ Petelo buyaka, diaka, nswalu nsusu dilaka.

Yesu nantwala ya Pilatu

²⁸ Buna bau katula Yesu nantwala na Kayafa ye twalaka yandi ku nzo ya nyadi. Yo vandaka suka yonso, bau mosi kotaka ve mu nzo ya nyadi, na bau tasumukwa ve, na bau lenda kudia Pake.

²⁹ Buna Pilatu basikaka kwa bau, ye tubaka: Beno funda muntu yai na mambu nki ?

³⁰ Bau vutulaka ye tubaka kwa yandi: Kana muntu yai salaka mbi ve, beto twalaka yandi kwa nge ve.

³¹ Buna Pilatu tubaka kwa bau: Beno mosi baka yandi, ye fundisa yandi bonso nsiku ya beno. Buna baYuda tubaka kwa yandi: Nsiku pesa nzila ve na beto kufwa muntu.

³² Na mambu ya Yesu tubaka lenda kumaniswa: Bu yandi songaka mutindu nki lufwa ya yandi takufwa.

³³ Buna Pilatu kotaka diaka mu nzo ya nyadi ye bingaka Yesu ye tubaka kwa yandi: Nge ikele ntinu ya baYuda ? Mat. 27:11; Mal. 15:2; Luk. 23:3

³⁴ Yesu vutulaka: Nge ikele kutuba mambu yai nge kibeni, keti bankaka tuba kwa nge sambu na mono ?

³⁵ Pilatu vutulaka: Mono ikele muYuda ? Bantu ya nge ye bambuta banganga pesaka nge kwa mono. Nki nge salaka ?

³⁶ Yesu vutulaka: Kintinu ya mono ikele ya nsi yai ve. Kana kintinu ya mono vandaka ya nsi yai, basielo ya mono tanwana, na mono tayekulwa ve kwa baYuda; kansi ntangu yai kintinu ya mono ikele ya awa ve.

³⁷ Buna Pilatu tubaka kwa yandi: Buna nge ikele ntinu ? Yesu vutulaka: Nge tuba na mono ikele ntinu. Sambu na yai mono butukaka, ye sambu na yai mono kwizaka mu nsi, na mono tatuba kitemo sambu na kieleka. Konso muntu ya ikele nkwa kieleka, ikele kuwa ndinga ya mono. Yoa. 8:40, 47

³⁸ Pilatu tubaka kwa yandi: Nki ikele kieleka ? Bu yandi imene kutuba yai, yandi basikaka diaka kwa baYuda, ye tubaka kwa bau: Mono mona mbi mu yandi ve. Mat. 27:15; Mal. 15:6; Luk. 23:18; Yoa. 19:4

³⁹ Kansi beno ikele na kifu na mono tabikila beno mosi mu Pake; beno zola na mono bikila beno Ntinu ya baYuda ?

⁴⁰ Bau bokaka diaka kutuba: Muntu yai ve, kansi Balaba. Balaba vandaka ntani.