Yoane 17 - Le Nouveau Testament en Kikwango 1950

Yesu lomba

¹ Mambu yai Yesu tubaka ye sendulaka meso ya yandi ku zulu ye tubaka: Tata, lokula imene kwiza, kembisa Mwana ya nge, na Mwana lenda kembisa nge. Yoa. 12:23

² Bonso nge imene kupesa yandi ngolo va zulu ya bansuni yonso, na yandi lenda kupesa moyo mvu ya mvu, kwa bau yonso ya nge pesaka yandi. Yoa. 6:39; Mat. 11:27; 28:18

³ Yai ikele moyo ya mvu ya mvu, na bau tazaba nge Nzambi mosi kaka ya kieleka; ye yandi ya nge fidisaka Yesu Klisto.

⁴ Mono kembisaka nge va ntoto, mono imene kumanisa kisalu ya nge pesaka mono, kusala. Yoa. 5:36; 4:34

⁵ Ntangu yai, Tata, kembisa mono sikamosi na nge kibeni, na nkembo ya mono vandaka na yo sikamosi na nge, ntete nsi vandaka.

⁶ Mono monikisaka nkumbu ya nge kwa bantu ya nge pesaka mono ya katuka na nsi. Bau vandaka ya nge, ye nge pesaka bau kwa mono, ye bau imene kulunda mambu ya nge.

⁷ Ntangu yai bau zaba, mambu yonso ya nge pesaka mono yau katuka na nge.

⁸ Sambu na mambu ya nge pesaka kwa mono, mono pesaka kwa bau; ye bau bakaka yau ye zabaka kieleka, na mono katuka na nge ye bau kwikilaka, na nge fidisaka mono. Yoa. 17:25; 16:30

⁹ Mono lomba sambu na bau; mono lomba ve sambu na nsi, kansi sambu na bau ya nge pesaka mono, kadi bau ikele ya nge. Yoa. 14:16

¹⁰ Yonso ya mono ikele ya nge, ye ya nge ikele ya mono, ye mono kembiswa mu bau. Yoa. 16:15

¹¹ Mono ikele diaka mu nsi ve, kansi bayai ikele mu nsi, ye mono kwiza kwa nge. Tata ya nlongo, keba bau mu nkumbu ya nge, ya nge pesaka mono, na bau lenda kuvanda mosi bonso beto. Yoa. 17:22

¹² Bu mono vandaka na bau mu nsi, mono imene kukebaka bau mu nkumbu ya nge ya nge pesaka mono, mono kebaka bau, mosi imene kuvila ve, kansi mwana ya mbungulu kaka, na masonukwa lenda kumaniswa. Nk. 109:8; Yoa. 18:9; 13:18

¹³ Ntangu yai mono kwiza kwa nge, mono tubaka mambu yai mu nsi, na bau lenda kuvanda na kiese ya mono ya lunga mu bau. Yoa. 15:11

¹⁴ Mono pesaka bau mambu ya nge; kansi nsi ikele na bau makasi, sambu na bau ikele ya nsi ve, bonso mono ikele ya nsi ve. Yoa. 15:18

¹⁵ Mono lomba ve na nge takatula bau na nsi, kansi na nge talunda bau na nkwa mbi. Mat. 6:13

¹⁶ Bau ikele ya nsi ve, bonso mono ikele ya nsi ve.

¹⁷ Tula bau nlongo mu kieleka. Mambu ya nge ikele kieleka.

¹⁸ Bonso nge fidisaka mono mu nsi, mpilayai mono fidisa bau mu nsi.

¹⁹ Sambu na mambu ya bau, mono ditula nlongo, na bau mpe lenda kutulwa nlongo mu kieleka. Eb. 2:11

²⁰ Mono lomba sambu na bau kaka ve, kansi sambu na bau mpe ya takwikila mu mono sambu na mambu ya bau;

²¹ mpilayina bau yonso tavanda mosi, bonso nge Tata mu mono ye mono mu nge, na bau mpe vanda mu beto, na nsi lenda kukwikila na nge fidisaka mono. Yoa. 10:38; 14:11

²² Ye nkembo ya nge pesaka mono, mono imene kupesa bau, na bau lenda kuvanda mosi bonso beto ikele mosi. Yoa. 17:11

²³ Mono mu bau, nge mu mono, na bau talungiswa mu mosi, na nsi lenda kuzaba, nge fidisaka mono, ye nge zola bau, bonso nge zola mono. 1 Yoa. 1:3; 3:24

²⁴ Tata, mono zola na bau yai mpe ya nge pesaka mono, tavanda sika na mono ikele, na bau lenda kumona nkembo ya mono ya nge pesaka mono; kadi nge zola mono ntete na nsi imene kutulwa lufulu ve. Yoa. 16:26; 14:3

²⁵ Tata ya lunungu, nsi zaba nge ve, kansi mono zaba nge; ye bayai zaba na nge fidisaka mono. Yoa. 16:3; 17:8

²⁶ Mono imene kuzabisa bau nkumbu ya nge, ye mono tazabisa yo. Na zola ya nge ya nge zolaka mono lenda kuvanda mu bau ye mono mu bau. Yoa. 15:9