Yoane 16 - Le Nouveau Testament en Kikwango 1950

Yesu samuna nzomono

¹ Mambu yai mono tubaka kwa beno, na beno takuta sakuba ve.

² Bau tabasisa beno mu banzo ya sambilu, ye lokula ikele kwiza, konsonani ya kufwa beno, yandi tabanza, na yandi ikele kusadila Nzambi kisalu ya yandi.

³ Kansi mambu yai bau tasala, sambu na bau zaba Tata keti mono ve.

⁴ Kansi mambu yai mono tubaka kwa beno, sambu na bu lokula imene kwiza beno bambuka yina ya mono imene kutuba kwa beno. Mambu yai mono tubaka kwa beno tuka luyantiku ve, sambu na mono vandaka na beno.

Kisaluya Mpeve Yanlongo

⁵ Kansi ntangu yai mono ikele kwenda kwa yandi ya fidisaka mono, ye mosi mu beno yuvula mono ve: Nge ikele kwenda wapi ?

⁶ Kansi sambu na mono tubaka kwa beno mambu yai, ntantu imene kufulusa ntima ya beno.

⁷ Kansi mono tuba kwa beno kieleka, yo ikele mbote kwa beno kana mono kwenda, kadi kana mono kwenda ve, Nsadisi takwiza kwa beno ve; kansi kana mono kwenda, mono tafidisa yandi kwa beno.

⁸ Kana yandi kwiza yandi tasonga nsi sambu na mambu ya masumu, ye ya lunungu ye ya mfundusu:

⁹ mu mambu ya masumu, sambu na bau kwikilaka mono ve;

¹⁰ mu mambu ya lunungu, sambu na mono ikele kwenda kwa Tata ye beno tamona mono diaka ve;

¹¹ mu mambu ya mfundusu, sambu na nkuluntu ya nsi yai imene kufundiswa. Yoa. 12:31

¹² Mono ikele na mambu mingi, kutuba kwa beno; kansi beno lenda kunata yau ve ntangu yai. 1 Kol. 3:1

¹³ Kansi bu yandi Mpeve ya kieleka imene kwiza, yandi tatwadisa beno mu kieleka yonso; kadi yandi tatuba ya yandi kibeni ve, kansi mambu yonso ya yandi takuwa, yandi tatuba, ye yandi tasonga beno mambu ya ikele kwiza. Yoa. 14:26; 15:26; 1 Yoa. 2:27

¹⁴ Yandi takembisa mono, kadi yandi tabaka ya mono ye tasonga yau kwa beno.

¹⁵ Mambu yonso ya Tata ikele ya mono, sambu na yina mono tuba, yandi baka ya mono ye tasonga yau kwa beno. Yoa. 17:10

Ntantu ye kiese ya banlonguki

¹⁶ Ntangu fioti ye beno tamona mono diaka ve, ye diaka ntangu fioti, ye beno tamona mono. Yoa. 7:33; 13:33; 14:19

¹⁷ Buna bankaka mu banlonguki ya yandi tubanaka: Nki mambu yai ya yandi tuba kwa beto ? Ntangu fioti ye beno tamona mono ve, ye diaka ntangu fioti ye beno tamona mono; ye: sambu na mono ikele kwenda kwa Tata.

¹⁸ Buna bau tubaka: Nki mambu yandi tubaka: Ntangu fioti ? Beto zaba ve ya yandi tubaka.

¹⁹ Yesu zabaka, bau zola kuyuvula yandi, ye yandi tubaka kwa bau: Beno yuvulana, sambu na mambu yai ya mono tubaka: Ntangu fioti ye beno ikele kumona mono ve, ye diaka ntangu fioti ye beno tamona mono ?

²⁰ Kieleka, kieleka, mono tuba kwa beno, beno tadila ye vanda na nionga, kansi nsi tayangalala, ye beno tavanda na ntantu, kansi ntantu ya beno takituka kiese. Nk. 30:11

²¹ Bu nkento ikele na nsongo, yandi ikele na ntantu, sambu na lokula ya yandi imene kwiza, kansi bu yandi imene kubuta mwana, yandi bambuka ve mpasi ya yandi sambu na kiese, na muntu imene kubutuka mu nsi.

²² Ntangu yai beno mpe ikele na ntantu; kansi mono tamona beno diaka, ye ntima ya beno tayangalala, ye kiese ya beno muntu zaba kukatula ve. Yes. 66:14

²³ Kilumbu yina beno tayuvula mono kiuvu ve. Kieleka, kieleka, mono tuba kwa beno: Kana beno talomba konsokima ya Tata yandi tapesa yo mu nkumbu ya mono. Yoa. 14:13; 15:16

²⁴ Ti ntangu yai beno imene kulomba kima ve mu nkumbu ya mono. Lomba, ye beno tabaka, na kiese ya beno lenda kulunga. Yoa. 15:11

Nkatukulu ya Yesu

²⁵ Mambu yai mono tubaka kwa beno mu bingana, kansi ntangu takwiza bu mono tatuba kwa beno mu bingana diaka ve, kansi mono tatuba kwa beno mambu ya Tata.

²⁶ Na kilumbu yina beno talomba mu nkumbu ya mono, ye mono tuba kwa beno ve na mono talomba Tata sambu na beno;

²⁷ kadi Tata kibeni zola beno, sambu na beno imene kuzola mono, ye beno kwikilaka na mono katukaka na Tata. Yoa. 17:8

²⁸ Mono katukaka na Tata, ye kwiza mu nsi, diaka mono tabika nsi ye kwenda kwa Tata.

²⁹ Banlonguki ya yandi tuba: Tala, ntangu yai nge imene kutuba mbote, nge tuba ve mu bingana.

³⁰ Ntangu yai beto zaba, nge zaba mambu yonso, ye nge ikele na nsatu ve kuyuvulwa mambu kwa muntu, mpilayai beto kwikila na nge katuka na Nzambi. Yoa. 17:25

³¹ Yesu vutulaka bau: Ntangu yai beno imene kukwikila ?

³² Tala, lokula takwiza, ye yo imene kwiza, na beno tamwangana, muntu na muntu ku sika ya yandi, ye beno tabika mono mosi; kansi mono ikele mono mosi ve, sambu na Tata ikele sikamosi na mono. Mal. 14:27; Yoa. 8:16

³³ Mambu yai mono imene kutuba kwa beno, na mu mono, beno lenda kuvanda na yenge. Mu nsi beno tavanda na mpasi, kansi vanda na kikesa. Mono imene kuluta nsi ngolo.