Yoane 13 - Le Nouveau Testament en Kikwango 1950

Yesu sukula makulu ya banlonguki

¹ Ntete na fete ya Pake, Yesu zabaka, lokula ya yandi imene kwiza, na yandi takatulwa na nsi yai; ye kwenda kwa Tata, yandi zolaka bantu ya yandi ya ikele na nsi, yandi zolaka bau ti na nsuka. Mat. 26:7, 30; Mal. 14:16, 26; Luk. 22:14, 39

² Bu bau ikele kudia madia ya nkokila, diable imene kutula mu ntima ya Yuda Iskalioti mwana ya Simoni, kuyekula yandi.

³ Yesu zabaka na Tata imene kupesa bima yonso mu maboko ya yandi, ye yandi katukaka na Nzambi, ye ikele kwenda kwa Nzambi. Yoa. 3:35; 17:2; 1 Kol. 15:27

⁴ Yandi telemaka tuka madia ya nkokila, ye katulaka kazaku ya yandi, ye bakaka kitambala, ye kangaka yo va luketo.

⁵ Buna yandi tulaka masa mu dilonga, ye yantikaka kusukula makulu ya banlonguki, ye kukunguna yo na kitambala ya yandi kangaka va luketo.

⁶ Buna yandi kwizaka kwa Simoni Petelo, Petelo tubaka kwa yandi: Mfumu, nge sukula makulu ya mono ?

⁷ Yesu vutulaka ye tubaka kwa yandi: Ya mono sala nge zaba ntangu yai ve, kansi nge tazaba nanima.

⁸ Petelo tubaka kwa yandi: Nge tasukula makulu ya mono ta fioti ve. Yesu vutulaka kwa yandi: Kana mono sukula nge ve, nge ikele na mono kintwadi ve.

⁹ Simoni Petelo tubaka kwa yandi: Mfumu, makulu ya mono kaka ve, kansi maboko ya mono ye ntu ya mono mpe.

¹⁰ Yesu tubaka kwa yandi: Yandi ya imene kuyobila ikele na mambu ve na sukula, kansi kaka na makulu, kansi yandi ikele ya vedila yonso, ye beno ikele ya vedila, kansi beno yonso ve. Yoa. 15:3; Bis. 15:9

¹¹ Kadi yandi zabaka, nani tayekula yandi, sambu na yai yandi tubaka: Beno yonso ikele ya vedila ve.

¹² Bu yandi imene kusukula makulu ya bau ye vwata kazaku ya yandi, ye vanda diaka yandi tubaka kwa bau: Beno zaba mambu ya mono imene kusala kwa beno ?

¹³ Beno binga mono, Nlongi ye Mfumu. Beno ikele kutuba mbote, mpilamosi mono ikele. Mal. 9:5; 11:21; Luk. 12:41; 22:33, 38; Mat. 23:8, 10; 1 Kol. 8:6

¹⁴ Buna kana mono ya ikele Mfumu ye Nlongi, imene kusukula makulu ya beno, buna beno mpe sukulana makulu.

¹⁵ Kadi mono imene kupesa beno kifwani, na beno tasala, bonso mono imene kusala kwa beno. 1 Pet. 2:21

¹⁶ Kieleka, kieleka, mono tuba kwa beno: Mpika luta Mfumu ya yandi nene ve, ye ntumwa luta ve yandi ya fidisaka yandi. Mat. 10:24; Luk. 6:40; 22:27; Yoa. 15:20

¹⁷ Kana beno zaba mambu yai, kiese ikele na beno, kana beno sala yo.

¹⁸ Mono tuba sambu na beno yonso ve. Mono zaba bau ya mono imene kusolaka, kansi na masonukwa lenda kumaniswa. Yandi ya kudia mampa sikamosi na mono, imene kutelemisila mono kinkoso ya dikulu ya yandi. Nk. 41:9; Bis. 1:16

¹⁹ Tuka ntangu yai mono tuba kwa beno, ntete na yo imene kwiza ve, buna bu yo kwiza, beno lenda kukwikila na mono ikele yandi. Yoa. 14:20

²⁰ Kieleka, kieleka, mono tuba kwa beno: Yandi ya baka, konsonani ya mono fidisa, ikele kubaka mono. Yandi ya baka mono, baka yandi ya fidisaka mono. Mat. 10:40; Luk. 9:48; 10:16

Yesu songa Yuda tayekula yandi

²¹ Bu Yesu imene kutuba mambu yai, yandi mona ntantu mu mpeve, ye tuba kitemo, kutuba: Kieleka, kieleka, mono tuba kwa beno: Na mosi mu beno tayekula mono. Mat. 26:21; Mal. 14:18; Luk. 22:21

²² Banlonguki talana, bau vandaka na ntembe, kana yandi tuba sambu na nani.

²³ Kansi mosi ya banlonguki yina ya yandi ya vandaka na mesa, ye yekemenaka va ntulu ya Yesu, Yesu zolaka yandi.

²⁴ Simoni Petelo labisaka kwa yandi, ye tubaka kwa yandi: Tuba kwa beto yandi tuba sambu na nani!

²⁵ Yandi ya yekemenaka va ntulu ya Yesu tubaka kwa yandi: Mfumu, yandi ikele nani ?

²⁶ Yesu vutulaka: Ikele yandi ya mono tapesa ndambu ya mampa bu mono imene kutula yo mu soupe, yandi pesaka yo kwa Yuda Iskalioti, mwana ya Simoni.

²⁷ Bu yandi imene kubaka ndambu ya mampa yina, Satana kotaka mu yandi. Buna Yesu tubaka kwa yandi: Sala nswalu mambu ya nge tonda kusala.

²⁸ Buna muntu mosi na meza zabaka ve sambu na nki yandi tubaka yai kwa yandi.

²⁹ Kansi bankaka banzaka, sambu na Yuda vandaka na ngoto ya mbongo, kana Yesu tubaka kwa yandi: Sumba ya beto ikele na yo nsatu sambu na fete, keti yandi tapesa bima kwa bansukami. Yoa. 12:6

³⁰ Bu yandi imene kubaka ndambu ya mampa, yandi basikaka nswalu, ye mpimpa vandaka.

Yesu longa banlonguki

³¹ Bu yandi imene kubasika, Yesu tubaka: Ntangu yai Mwana ya muntu ikele kukembiswa, ye Nzambi ikele kukembiswa mu yandi.

³² Ye Nzambi takembisa yandi mu yandi kibeni, ye takembisa yandi nswalu.

³³ Beno bana fioti, ntangu fioti mono tavanda na beno; beno tasosa mono, bonso mono tubaka kwa baYuda: Sika mono kwenda beno lenda kwiza ve, mpilayai mono tuba kwa beno ntangu yai. Yoa. 7:33; 8:21

³⁴ Nsikudukusu yampa mono pesa beno, na beno zolana, bonso mono zolaka beno, beno mpe zolana 3 Mose 19:18; Mat. 22:39; Yoa. 15:12, 17; Lom. 13:8; Ngal. 6:2; 1 Pet. 1:22; 1 Yoa. 3:11; 4:21

³⁵ Mu yai bantu yonso tazaba, beno ikele banlonguki ya mono, kana beno zolana. Yesu tuba na Petelo buya ya yandi

³⁶ Simoni Petelo tubaka kwa yandi: Mfumu, wapi nge kwenda ? Yesu vutulaka kwa yandi: Sika ya mono kwenda, nge lenda kulanda mono ntangu yai ve, kansi nge talanda mono nanima. Mat. 26:33, 35; Mal. 14:29, 31; Luk. 22:33, 34

³⁷ Petelo tubaka kwa yandi: Mfumu, sambu na nki mono lenda kulanda nge ntangu yai ve ? Mono tapesa moyo ya mono sambu na nge.

³⁸ Yesu vutulaka: Nge tapesa moyo ya nge sambu na mono ? Kieleka, kieleka, mono tuba kwa nge: Nsusu tadila ve, ntete na nge imene kubuya mono mbala tatu. Mat. 26:74; Mal. 14:30; Luk. 22:34