Yoane 12 - Le Nouveau Testament en Kikwango 1950

Yesu zitwa mu Betania

¹ Bilumbu sambanu, nantwala ya Pake, Yesu kwizaka ku Betania, sika ya Lazalo ya yandi fulukisaka tuka lufwa, Mat. 26:6; Mal. 14:3; Yoa. 11:43

² Kuna bau lambaka madia ya nkokila sambu na yandi, ye Malata sadilaka bau; kansi Lazalo ikele mosi mu bau ya vandaka na yandi na meza.

³ Buna Malia bakaka tezo mosi ya mafuta ya nsunga ya ntalu, yandi sitaka makulu ya Yesu ya kungunaka makulu ya Yesu na nsuki ya yandi; ye nzo fulukaka na nsunga ya mafuta ya nsunga.

⁴ Kansi Yudas Iskalioti mosi mu banlonguki ya yandi, ya tayekula yandi tubaka:

⁵ Sambu na nki mafuta yai beno tekaka yo ve na nkama tatu ya mbongo denali ye pesaka yo kwa bansukami ?

⁶ Yandi tubaka yo ve, sambu na yandi zolaka bansukami, kansi kaka sambu na yandi ikele muyifi, ye ngoto ya mbongo ikele na yandi, ye yandi ikele kubaka ya bau tula muna.

⁷ Buna Yesu tubaka: Bika yandi lunda yo sambu na kilumbu ya zika mono.

⁸ Kadi bansukami ikele na beno ntangu yonso, kansi mono ikele na beno ntangu yonso ve.

⁹ Mpilayai bantu mingi ya baYuda zabaka yandi ikele kuna. Bau kwizaka kutala kaka Yesu ve, kansi kutala mpe Lazalo ya yandi fulukisaka tuka bafwa. Yoa. 11:43

¹⁰ Kansi bambuta banganga tulaka lukanu na bau lenda kufwa Lazalo mpe;

¹¹ sambu na mambu ya yandi, mingi mu baYuda kwendaka ye kwikilaka Yesu.

Yesu kota mu Yelusalemi va mpunda

¹² Kilumbu ya landa, kibuka yanene ya imene kwiza ku fete, bu bau kuwaka Yesu ikele kwiza ku Yelusalemi, Mat. 21:4, 9; Mal. 11:7, 10; Luk. 19:35, 38

¹³ bakaka mavala ya maba, ye basikaka kukutana na yandi; ye bokaka: Osana, Lusakumunu ikele kwa yandi ya kwiza mu nkumbu ya Mfumu, Ntinu ya Isaeli. Nk. 118:25

¹⁴ Bu Yesu monaka mwana mpunda, yandi vandaka va yo, bonso yo sonama:

¹⁵ Tita ve; Mwana nkento ya Sioni; tala, Ntinu ya nge ikele kwiza ye vanda va mwana mpunda. Zak. 9:9; Yes. 62:11; Mat. 21:5

¹⁶ Banlonguki ya yandi zabaka mambu yai ntete ve, kansi bu Yesu imene kukembiswa, bau bambukaka mambu yai ya sonama sambu na yandi, ye na bau salaka mambu yai kwa yandi.

¹⁷ Kibuka ya vandaka na yandi, bu yandi bingaka Lazalo basika tuka ndiamu, ye fulukisaka yandi tuka bafwa, tubaka kitemo.

¹⁸ Sambu na mambu yai, kibuka kwizaka kutana na yandi, kadi bau kuwaka, yandi salaka kidimbu yai.

¹⁹ Buna bafalisi tubaka: Tala, beno lenda kusala kima ve; tala, nsi yonso ikele kulanda yandi.

Muntuya Elene zola kutala Yesu

²⁰ BaElene vandaka nakati na bau, ya imene kwiza kusamba na fete.

²¹ Buna bau kwizaka kwa Filipo ya katuka na Betesaida mu Ngalili, ye yuvulaka yandi, kutuba: Mfumu, beto zola kutala Yesu.

²² Filipo kwizaka ye tubaka kwa Andele, ye Andele kwizaka ye Filipo, ye tubaka kwa Yesu.

²³ Ye Yesu vutulaka kwa bau, kutuba: Lokula imene kwiza, na Mwana ya muntu takembiswa.

²⁴ Kieleka, kieleka, mono tuba kwa beno: Kana nkeni ya ble kubwa va ntoto ye kufwa ve, yo vanda yo mosi, kansi kana yo kufwa, yo buta mabundu mingi.

²⁵ Yandi ya zola moyo ya yandi tavidisa yo; konsomuntu ya zola moyo ya yandi ve, mu nsi yai, talunda yo ku moyo ya mvu ya mvu. Mat. 10:39; 16:25; Mal. 8:35; Luk. 9:24; 17:33

²⁶ Kana muntu sadila mono, bika yandi landa mono. Ye sika ya mono ikele, kuna mpe tavanda sielo ya mono. Kana muntu sadila mono, Tata tazitisa yandi. 1 Tes. 4:17

²⁷ Ntangu yai mwela ya mono ikele na ntantu, ye nki mono tatuba ? Tata vulusa mono na lokula yai. Kansi sambu na mambu yai

²⁸ Tata, kembisa nkumbu ya nge. Buna ndinga katukaka na zulu: Mono imene kukembisa yo, ye mono takembisa yo diaka. Yoa. 17:4

²⁹ Buna kibuka ya telemaka sika yina ye kuwaka yo, tubaka: Yai ikele mbandanu. Yankaka tubaka: Wanjo imene kutuba kwa yandi.

³⁰ Yesu vutulaka ye tubaka: Ndinga yai kwizaka ve sambu na mono, kansi sambu na beno.

³¹ Ntangu yai ikele mfundusu ya nsi yai; ntangu yai nkuluntu ya nsi yai takatulwa. Yoa. 16:11

³² Ye mono, kana mono nangulwa tuka ntoto, tabenda bantu yonso kwa mono. Yoa. 3:14; 8:28

³³ Yandi tubaka yai kusonga nki mutindu ya lufwa yandi takufwa.

³⁴ Kibuka vutulaka kwa yandi: Beto kuwaka mu nsiku na Klisto ikele kuvanda mvu ya mvu. Buna mpila nki nge tuba: Mwana ya muntu fwiti kunangulwa kaka ? Mwana yai ya muntu ikele nani ? 2 Sam. 7:13; Nk. 89:29; 110:4; Yes. 9:6; Yeh. 37:25; Dan. 2:44; 7:13

³⁵ Buna Yesu tubaka kwa bau: Mwini ikele nakati na beno ntangu fioti, tambula bu beno ikele na mwini, na tombe lenda kubwila beno ve. Ye yandi ya tambula mu tombe, zaba ve sika yandi ikele kwenda. Yoa. 1:9; 7:33

Bayuda buya lukwikilu

³⁶ Bu beno ikele na mwini, kukwikila mwini na beno lenda kwiza bana ya mwini. Mambu yai Yesu tubaka, ye yandi kwendaka kuswama sambu na bau.

³⁷ Kansi yandi salaka bidimbu mingi nantwala na bau, kansi bau kwikilaka yandi ve,

³⁸ na mambu ya Yesaya, mbikudi, lenda kumaniswa, bu yandi tubaka: Mfumu, nani kwikila nsangu ya beto ? Kwa nani diboko ya Mfumu imene kumonika ? Lom. 10:16; Yes. 53:1

³⁹ Sambu na mambu yai, bau lenda kukwikila ve, kadi Yesaya tubaka diaka:

⁴⁰ Yandi kufwaka meso ya bau, ye yandi tulaka bau ntima ngolo, na bau lenda ve kutala na meso ya bau, ye bakisa mu ntima ya bau ve, ye pindula mabanza ya bau ve, na mono kubelula bau. Yes. 6:9; 29:10

⁴¹ Mambu yai Yesaya tubaka, sambu na yandi monaka nkembo ya yandi ye tubaka sambu na yandi.

⁴² Kansi mingi nakati na bakuluntu kwikilaka yandi, kansi sambu na bafalisi, bau tubaka kitemo ya yandi ve, sambu na bau takatulwa ve, mu nzo ya sambilu.

⁴³ Sambu na bau luta kuzola nkembo ya bantu, kansi nkembo ya Nzambi ve.

⁴⁴ Yesu bokaka ye tubaka: Yandi ya kwikila mono, ikele kwikila mono ve, kansi yandi ya fidisaka mono.

⁴⁵ Yandi ya tala mono, tala yandi ya fidisaka mono.

⁴⁶ Mono imene kwiza mwini ya nsi, ye yandi ya kwikila mono, tavanda mu tombe ve. Yoa. 13:19

⁴⁷ Kana muntu kuwa mambu ya mono ye lunda yo ve, mono fundisa yandi ve, kadi mono kwizaka ve kufundisa nzi, kansi kuvulusa nsi.

⁴⁸ Yandi ya buya mono ye baka mambu ya mono ve, ikele na mosi ya fundisa yandi; mambu ya mono tubaka yo tafundisa yandi kilumbu ya nsuka.

⁴⁹ Kadi mono tubaka mu mono mosi ve, kansi Tata ya fidisaka mono, yandi imene kupesa mono nsikudukusu, nki mono fwiti kutuba ye nki mono fwiti kusamuna. Yoa. 14:10

⁵⁰ Mono zaba, na nsikudukusu ya yandi ikele moyo mvu ya mvu, sambu na yai mambu yonso ya mono tuba, mono tuba yo bonso Tata imene kusonga mono.