Yoane 11 - Le Nouveau Testament en Kikwango 1950

Yesu fulukisa Lazalo

¹ Vandaka muntu ya belaka, Lazalo ya Betania, bwala ya Malia ye mpangi nkento ya yandi Malata. 10:38

² Malia yina ya sitaka Mfumu mafuta ya ntalu ye kunguna makulu ya yandi na nsuki ya yandi. Mpangi ya yandi Lazalo belaka. Mat. 26:6; Mal. 14:3; Luk. 10:28; Yoa. 12:3

³ Mpilayai bampangi bankento fidisaka kwa yandi kutuba: Mfumu, tala yandi ya nge zola ikele kubela.

⁴ Kansi bu Yesu kuwaka yo, yandi tubaka: Ikele maladi ya lufwa ve, kansi sambu na nkembo kwa Nzambi, na Mwana ya Nzambi lenda kukembiswa mu yo.

⁵ Yesu zolaka Malata ye mpangi nkento ya yandi, ye Lazalo.

⁶ Mpilayai, bu yandi kuwaka, na yandi ikele kubela, yandi vingilaka bilumbu zole na sika yandi vandaka.

⁷ Landa mambu yai, yandi tubaka kwa banlonguki: Bika beto vutuka ku Yuda diaka.

⁸ Banlonguki tubaka kwa yandi: Nlongi, ntangu yai baYuda sosa kufwa nge na matadi, nge kwenda kuna diaka ? Yoa. 10:31

⁹ Yesu vutulaka: Kadi kilumbu mosi ikele na lokula kumi ye zole ve ? Kana muntu tambula na ntangu yandi ikele kuta sabuka ve, kadi yandi mona mwini ya nsi yai.

¹⁰ Kansi kana muntu tambula mu mpimpa yandi kuta sakuba, kadi mwini ikele mu yandi ve.

¹¹ Mambu yai yandi tubaka, nanima na yai yandi tubaka kwa bau: Nduku ya beto Lazalo ikele kulala tulu, kansi mono kwenda, na mono lenda kusikimisa yandi na tulu.

¹² Buna banlonguki tubaka kwa yandi: Mfumu, kana yandi lala tulu, yandi takwiza mbote.

¹³ Yesu tubaka sambu na lufwa ya yandi, kansi bau banzaka, yandi tubaka kaka sambu na tulu ya lala.

¹⁴ Mpilayai, Yesu tendula ye tuba kwa bau: Lazalo imene kufwa.

¹⁵ Ye mono ikele na kiese, sambu na beno, na mono vandaka kuna ve, na beno lenda kukwikila; kansi bika beto kwenda kwa yandi.

¹⁶ Buna Toma ya bingwa Didimo, tubaka kwa banlonguki yankaka: Beto mpe kwenda na beto lenda kufwa sikamosi na yandi.

¹⁷ Mpilayai bu Yesu kwizaka, yandi kutaka yandi imene kuvanda mu ndiamu bilumbu iya.

¹⁸ Betania vandaka mfinama ku Yelusalemi, yo vandaka kilometre tatu.

¹⁹ Mingi ya baYuda kwizaka kwa Malata ye Malia kubomba bau sambu na mpangi ya bau.

²⁰ Mpilayai Malata bu yandi kuwaka, Yesu imene kwiza, yandi kwendaka kukutana na yandi. Kansi Malia bikaka mu nzo.

²¹ Buna Malata tubaka kwa Yesu: Mfumu, kana nge vandaka awa, mpangi ya mono imene kufwa ve.

²² Kansi ntangu yai mpe mono zaba, konsokima ya nge talomba kwa Nzambi, Nzambi tapesa nge.

²³ Yesu tubaka kwa yandi: Mpangi ya nge tafulukiswa diaka.

²⁴ Malata tubaka kwa yandi: Mono zaba, na yandi tafulukiswa diaka mu mfulukulu ya kilumbu ya nsuka. Luk. 14:14; Yoa. 5:29

²⁵ Yesu tubaka kwa yandi: Mono ikele mfulukulu ye moyo. Yandi ya kwikila mono, kana yandi kufwa yandi tavanda na moyo mvu ya mvu. Yoa. 8:51

²⁶ Konsonani ya ikele na moyo ye kwikila mu mono, takufwa ve mvu ya mvu. Nge kwikila yai ? Yoa. 6:40, 54

²⁷ Yandi tubaka kwa yandi: E, Mfumu mono imene kukwikila na nge ikele Klisto, Mwana ya Nzambi, yandi ya takwiza mu nsi. Mat. 16:16; Yoa. 4:42; 6:69

²⁸ Bu yandi tubaka mpilayai, yandi kwendaka ye bingaka mpangi nkento ya yandi Malia mu kinsweki kutuba: Nlongi ikele awa ye binga nge.

²⁹ Bu yandi kuwaka yo, yandi telemaka nswalu ye kwendaka kwa yandi.

³⁰ Yesu imene kwiza ntete na bwala ve, kansi yandi vandaka na sika ya Malata kutanaka na yandi.

³¹ BaYuda ya vandaka na yandi mu nzo ye bomba yandi, bu bau monaka Malia telema nswalu ye basika, bau landaka yandi, kubanza yandi kwenda na ndiamu kudila kuna.

³² Bu Malia kwizaka ku sika ya vandaka Yesu, ye monaka yandi, yandi fukamaka na makulu ya yandi, ye tubaka kwa yandi: Mfumu, kana nge vandaka awa, mpangi ya mono imene kufwa ve.

³³ Bu Yesu monaka yandi kudila, ye baYuda kudila mpe ya kwizaka na yandi, yandi vumunaka kuvanda na ntantu mu mpeve,

³⁴ yandi tubaka: Wapi beno tulaka yandi ? Bau tubaka kwa yandi: Mfumu, kwiza, kutala.

³⁵ Yesu dilaka.

³⁶ Buna baYuda tubaka: Tala, mutindu ya yandi zolaka yandi.

³⁷ Bankaka mu bau tubaka: Muntu yai ya kangulaka meso ya mpofo, lendaka ve kusadisa, na muntu yai kufwaka ve ?

³⁸ Mpilayai Yesu vumunaka diaka mu yandi kibeni, ye kwizaka ku ndiamu. Yo vandaka dibulu nakati mu ditadi, ye ditadi vandaka va zulu ya yo.

³⁹ Yesu tubaka: Beno katula ditadi: Malata, mpangi nkento ya yandi ya kufwaka, tubaka kwa yandi: Mfumu, ntangu yai nitu ya yandi ikele na nsudi, kadi tuka lufwa ya yandi ikele bilumbu iya.

⁴⁰ Yesu tubaka kwa yandi: Mono imene kutuba kwa nge ve: Kana nge kwikila nge tamona nkembo ya Nzambi ?

⁴¹ Mpilayai bau katulaka ditadi. Yesu sendulaka meso ya yandi ye tuba: Tata, mono pesa nge matondo, na nge kuwa mono.

⁴² Ye mono, zaba nge ikele kuwa mono ntangu yonso, kansi sambu na kibuka ya telema ye zunga mono, mono tuba yo, na bau lenda kukwikila nge imene kufidisa mono.

⁴³ Bu yandi imene kutuba mpilayai, yandi bokaka mu ndinga ya ngolo: Lazalo, basika!

⁴⁴ ifandi ya kufwaka basikaka, na zingila na nlele ya ndiamu va maboko ye makulu; ye luse ya yandi na zingila na kitambala. Yesu tubaka kwa bau: Kangula yandi, bika yandi kwenda.

⁴⁵ Mpilayai baYuda mingi ya kwizaka na Malia, ye monaka ya Yesu salaka, bau kwikilaka yandi.

⁴⁶ Kansi bankaka mu bau kwendaka kwa bafalisi, bau tubaka kwa bau mambu ya Yesu imene kusala.

Bafalisi tula vuvu kufwa Yesu

⁴⁷ Buna bambuta banganga ye bafalisi kutikisaka bamfundisi, ye tubaka: Nki beto sala ? Kadi muntu yai ikele kusala bidimbu mingi.

⁴⁸ Kana beto bika yandi mpamba, bantu yonso takwikila yandi, buna baLoma takwiza kubaka sika ya beto ye kikanda ya beto.

⁴⁹ Kansi mosi mu bau, nkumbu ya yandi Kayafa, yandi vandaka nganga ya nene mu mvu yina, yandi tubaka kwa bau: Beno zaba kima ve,

⁵⁰ beno banza ve, yo ikele mbote kwa beno, kana muntu mosi kufwa sambu na bantu, ye kanda yamlimba ya bantu kufwa ve. Yoa. 18:14

⁵¹ Mambu yai yandi tubaka ve sambu na yandi kibeni, kansi sambu na yandi vandaka nganga ya nene mvu yina, yandi bikulaka Yesu takufwa sambu na kanda ya bantu.

⁵² Ye sambu na kanda yai kaka ve, kansi na yandi lenda kukutikisa sikamosi bana ya Nzambi ya mwanganaka. Yoa. 10:16

⁵³ Tuka kilumbu yina bau tulaka lukanu na bau lenda kufwa yandi.

⁵⁴ Sambu na yai, Yesu tambulaka diaka ve nantwala na baYuda, kansi yandi katukaka kuna, ye kwendaka ku ntoto mfinama ku nseke ya mpamba, ku mbanza bingwa, Efalaimi; kuna yandi vandaka na banlonguki.

⁵⁵ Pake ya baYuda vandaka mfinama bantu mingi katukaka na ntoto ya bau, ye kwendaka ku Yelusalemi nantwala ya Pake, kudivedisa.

⁵⁶ Buna bau sosaka Yesu, ye bau tubana bu bau telema mu tempelo: Nki beno banza ? Na yandi takwiza ku fete ?

⁵⁷ Bambuta banganga ye bafalisi pesaka nsikudukusu, kana muntu zaba sika yandi ikele, yandi songa yo na bau lenda kusimba yandi.