Yoane 10 - Le Nouveau Testament en Kikwango 1950

Mvungi ya mbote

¹ Kieleka, kieleka, mono tuba kwa beno, yandi ya kota ve mu mwelo ya lupangu ya mameme, kansi ya mata sika yankaka, yandi ikele muyifi ye ntani. Nk. 23; Eb. 13:20; 1 Pet. 5:4

² Kansi yandi ya kota mu mwelo ikele mvungi ya mameme.

³ Kwa yandi nkengi ya mwelo ikele kukangula, mameme kuwa ndinga ya yandi, yandi binga mameme na nkumbu ya bau, yandi basisa bau.

⁴ Bu yandi basisa mameme ya yandi yonso, yandi tambula nantwala na bau, mameme landa yandi, kadi bau zaba ndinga ya yandi.

⁵ Kansi bau talanda nzenza ve, bau tina tuka yandi, kadi bau zaba ve ndinga ya nzenza.

⁶ Yesu tubaka kingana yai kwa bau, kansi bau bakisaka ve, mambu yina ya yandi tubaka kwa bau.

⁷ Buna Yesu tuba kwa bau diaka: Kieleka, kieleka, mono tuba kwa beno, Mono ikele mwelo ya mameme.

⁸ Yonso ya kwizaka nantwala na mono ikele bamuyifi ye bantani, kansi mameme kuwaka ndinga ya bau ve.

⁹ Mono ikele mwelo: Kana muntu kota mu mono, yandi tavuluswa ye takota ye basika ye mona ya kudia.

¹⁰ Muyifi ikele kwiza sambu na mambu yankaka ve, kansi kuyiba ye kufwa ye kupasula. Mono kwiza na bau lenda kuvanda na moyo, ye bau vanda na yo ya luta mingi.

¹¹ Mono ikele mvungi ya mbote; mvungi ya mbote pesa moyo ya yandi sambu na mameme ya yandi. Nk. 23:1; Yes. 40:11; Yel. 23:1; Yeh. 34:2; 37:24; Zak. 11:1; Mika 5:4

¹² Konso ikele muntu ya kisalu; ye ikele mvungi ve, mameme ikele ya yandi ve, bu yandi mona mbizi ya makasi yandi ikele kubika mameme, ye tina; mbizi ya makasi simba bau ye mwangisa bau;

¹³ yandi tina, sambu na yandi ikele muntu ya kisalu; yandi ikele na mabanza ve sambu na mameme.

¹⁴ Mono ikele mvungi ya mbote, ye mono zaba mameme ya mono, ye mameme ya mono zaba mono,

¹⁵ bonso Tata zaba mono ye mono mpe zaba Tata, ye mono pesa moyo ya mono sambu na mameme. Yoa. 7:29

¹⁶ Mono ikele na mameme yankaka, bau ikele ya lupangu yai ve; mono fwiti kutwala bau mpe, bau takuwa ndinga ya mono ye bau tavanda kibuka mosi ye mvungi mosi. Yeh. 37:22; Mat. 28:19; Yoa. 11:52; Bis. 10:35

¹⁷ Sambu na yai Tata zola mono, sambu na mono pesa moyo ya mono ye mono tabaka yo diaka.

¹⁸ Muntu lenda ve kukatula yo na mono. Kansi mono mosi pesa yo. Mono ikele na ngolo kupesa yo, ye mono ikele na ngolo kubaka yo diaka. Nsikudukusu yai mono bakaka na Tata ya mono.

¹⁹ BaYuda vandaka na nkabunu sambu na mambu yai. Yoa. 7:43

²⁰ Mingi ya bau tubaka: Yandi ikele na mpeve mbi, yandi imene kulauka. Sambu na nki beno ikele kuwa yandi ? Yoa. 7:20; 8:48, 52

²¹ Bankaka tubaka: Mambu yai katuka ve ya mosi ya bakama mu mpeve mbi. Mpeve mbi lenda kukangula meso ya bampofo ? Yoa. 9:32

Yesu kundina yuvula ya Bayuda

²² Mu Yelusalemi vandaka fete ya dipesa.

²³ Yai vandaka nsungi ya madidi, Yesu tambulaka mu tempelo va mbalanda ya Solomo. Bis. 3:11

²⁴ Buna baYuda zungaka yandi, ye tubaka kwa yandi: Ntama ikwa nge sweka beto mambu yai ? Kana nge ikele Klisto, songa beto mbote.

²⁵ Yesu vutulaka kwa bau: Mono tubaka kwa beno, ye beno kwikilaka ve. Bisalu ya mono salaka mu nkumbu ya Tata ya mono, yau ikele kutuba kitemo sambu na mono. Yoa. 5:36

²⁶ Kansi beno kwikilaka ve, sambu na beno ikele mameme ya mono ve. Yoa. 8:47

²⁷ Mameme ya mono kuwa ndinga ya mono, ye mono zaba bau, ye bau landa mono. Yoa. 10:3

²⁸ Mono pesa bau moyo mvu ya mvu, bau tavila ve mvu ya mvu, ye muntu takatula bau mu diboko ya mono ve.

²⁹ Tata ya mono pesaka mono bau, yandi luta yonso nene, ye muntu lenda ve kubotola bau na diboko ya Tata.

³⁰ Mono ye Tata ikele mosi. Yoa. 17:11, 22

³¹ BaYuda nangulaka matadi diaka kulosa yandi yau.

³² Yesu vutulaka kwa bau: Bisalu mingi ya mbote ya mono imene kusonga beno ya Tata. Sambu na kisalu nki beno losa mono matadi ?

³³ BaYuda vutulaka kwa yandi: Sambu na kisalu ya mbote, beto losa nge matadi ve, kansi sambu na kutuba mbi, ye sambu na nge ikele muntu, ya dikitula Nzambi.

³⁴ Yesu vutulaka kwa bau: Yo ikele kusonama mu nsiku ya beno ve: Mono tubaka, beno ikele banzambi ?

³⁵ Kana yandi bingaka bau banzambi, kwa bau ya mambu ya Nzambi kwizaka—na masonukwa lenda kufwa ve—

³⁶ buna beno tuba sambu na yandi, ya Tata tulaka nlongo ye fidisaka mu nsi: Nge ikele kutuba mbi. Sambu na mono tubaka: Mono ikele Mwana ya Nzambi ?

³⁷ Kana mono sala bisalu ya Tata ya mono ve, kwikila mono ve.

³⁸ Kansi kana mono sala yau, kana beno kwikila mono ve, kwikila bisalu yai, na beno lenda kuzaba ye kubakisa na Tata ikele mu mono, ye mono mu Tata. Yoa. 14:10; 17:21

³⁹ Bau sosaka diaka kusimba yandi, kansi yandi katukaka mu maboko ya bau.

Yesu kwenda ku Yodani

⁴⁰ Yandi vutukaka diaka ye kwendaka ku simu ya Yodani, sika ya Yoane vandaka kubotika ntete, ye kuna yandi vandaka.

⁴¹ Ye mingi kwizaka kwa yandi, ye bau tubaka: Yoane salaka kidimbu ve, kansi mambu yonso ya tubaka Yoane sambu na muntu yai vandaka kieleka.

⁴² Ye mingi kwikilaka yandi kuna.