Yoane 1 - Le Nouveau Testament en Kikwango 1950

Yesu Klisto ikele Nzambi kibeni

¹ Mu luyantiku Diambu vandaka, ye Diambu vandaka na Nzambi, ye Diambu vandaka Nzambi. Bing. 8:22; Yoa. 10:30; 1 Yoa. 1:1; 5:20; Nzai. 19:13; Lom. 9:5; Eb. 1:8

² Yo vandaka na Nzambi mu luyantiku.

³ Bima yonso imene kusalwa na yandi, ye konda yandi, kima mosi salwaka ve, ya imene kusalwa. Kolo. 1:17; Eb. 1:2-3

⁴ Mu yandi vandaka moyo, ye moyo yai vandaka mwini ya bantu. Yoa. 5:26; 1 Yoa. 5:11

⁵ Mwini ikele kukienzula mu tombe ye tombe bakaka yo ve. Yoa. 3:19

Nsi baka mwini yai ve

⁶ Vandaka muntu, ya fidiswa na Nzambi, nkumbu ya yandi Yoane. Mat. 3:1; 11:14; Mal. 1:4; Luk. 3:2

⁷ Yandi imene kwiza sambu na kitemo, na yandi lenda kutuba kitemo ya mwini, na bau yonso lenda kukwikila mu yandi.

⁸ Yandi vandaka mwini yai kibeni ve, kansi yandi kwizaka na yandi lenda kutuba kitemo ya mwini.

⁹ Mwini yai vandaka mwini ya kieleka, yo kienzulaka bantu yonso ya kwiza mu nsi. Yoa. 3:19; 8:12; 9:5; 12:35, 46

¹⁰ Yandi vandaka mu nsi ye nsi imene kusalwa na yandi, ye nsi zabaka yandi ve.

¹¹ Yandi kwizaka kwa ya yandi, kansi bau ya vandaka ya yandi bakaka yandi ye.

¹² Kansi yonso ya bakaka yandi, yandi pesaka bau ngolo kuvanda bana ya Nzambi, ikele bau ya kwikila mu nkumbu ya yandi. Ngal. 3:26; 1 Yoa. 3:1

¹³ Ikele bau ya butuka mu menga ve, keti mu luzolo ya nsuni ve, keti mu luzolo ya muntu ve, kansi mu Nzambi. Yoa. 3:5; 1 Pet. 1:23; Yak. 1:18

¹⁴ Diambu kitukaka nsuni, yo vandaka nakati ya beto, beto monaka nkembo ya yandi, bonso nkembo ya Mwana mosi kaka ya Tata, fuluka na nlemvo ye kieleka. Mat. 1:16, 18; Luk. 1:31; Mat. 17:2; Kolo. 1:19; 2:3, 9; Eb. 2:14

¹⁵ Yoane tubaka kitemo sambu na yandi, yandi bokaka, kutuba: Yandi yai ya mono tubaka, yandi ya kwiza nanima na mono imene kutulwa nantwala na mono, kadi yandi vandaka nantwala na mono. Mat. 3:1; Mal. 1:7; Yoa. 1:30

¹⁶ Kadi beto yonso bakaka mu kifulusilu ya yandi, ye nlemvo mu nlemvo.

¹⁷ Kadi nsiku peswaka na Mose; nlemvo ye kieleka kwizaka mu Yesu Klisto. 2 Mose 20:11

¹⁸ Muntu imene kumona Nzambi ve ta mbala mosi; Mwana mosi kaka ya vandaka na ntulu ya Tata, yandi imene kuzaisa yandi. Mat. 11:27; Luk. 10:22; Yoa. 6:46; 1 Tim. 6:16

Kitemo ya Yoane mbotika

¹⁹ Kitemo ya Yoane ikele yai, bu baYuda fidisaka banganga ye baLevi ya katuka na Yelusalemi, kuyuvula yandi: Nge ikele nani ? Yoa. 5:33

²⁰ Buna yandi ndimaka, yandi buyaka ve, kansi ndimaka: Mono ikele Klisto ve. Yoa. 3:28; Bis. 13:25

²¹ Ye bau yuvulaka yandi: Kansi nge ikele nani ? Nge ikele Elia ? Yandi tubaka: Mono ikele yandi ve. Nge ikele mbikudi yina ? Yandi vutulaka: Ve.

²² Buna bau tubaka kwa yandi: Nge ikele nani ? Na beto lenda kuvutula mvutu kwa bau ya fidisaka beto. Nki nge tuba sambu na nge kibeni ?

²³ Yandi tubaka: Mono ikele ndinga ya muntu ya ikele, kuboka mu nsi ya mpamba: Beno sungika nzila ya Mfumu; bonso mbikudi Yesaya tubaka: Yes. 40:3; Mal. 1:3; Luk. 3:4

²⁴ Ye bau ya fidiswa vandaka ya bafalisi.

²⁵ Bau yuvulaka, kutuba kwa yandi: Sambu na nki nge ikele kubotika, kana nge ikele Klisto ve, keti Elia ve, keti mbikudi yina ve ?

²⁶ Yoane vutulaka kwa bau, kutuba: Mono ikele kubotika mu masa, nakati na beno ikele kutelema mosi ya beno konda kuzaba, Mat. 3:11; Mal. 1:7; Luk. 3:16; Bis. 13:25

²⁷ yandi ikele kwiza nanima na mono, mono lunga ve kukangula nsinga ya nsampatu ya yandi.

²⁸ Mambu yai salwaka mu Betania simu ya Yodani, sika Yoane botikaka.

²⁹ Kilumbu ya landa, Yoane monaka Yesu kwiza kwa yandi, yandi tubaka: Tala, Mwana Dimeme ya Nzambi ya ikele kukatula masumu ya nsi. 1 Pet. 1:19

³⁰ Yandi ikele yai ya mono tubaka, muntu ikele kwiza nanima na mono, yandi tulwaka nantwala na mono, kadi yandi vandaka nantwala na mono.

³¹ Mono zabaka yandi ve: Kansi na yandi lenda kuzabisa kwa Isaeli, sambu na mambu yai mono kwizaka kubotika mu masa.

³² Yoane tubaka kitemo kutuba: Mono monaka Mpeve kulumuka tuka zulu bonso yembe, yo vandaka va yandi. Mat. 3:16; Mal. 1:10; Luk. 3:22

³³ Mono zabaka yandi ve, kansi yandi ya fidisaka mono kubotikaka mu masa, yandi tubaka kwa mono: Va konsonani ya nge tamona, Mpeve kulumuka ye vanda va yandi, yandi yina ikele kubotika mu Mpeve Yanlongo.

³⁴ Mono imene kumona ye kutuba kitemo na yai ikele Mwana ya Nzambi.

Andele ye Petelo landa Yesu, bantu yankaka kwikila yandi

³⁵ Diaka kilumbu ya landa, Yoane vandaka kutelema ye banlonguki ya yandi zole;

³⁶ yandi talaka Yesu bu yandi tambulaka, yandi tubaka: Tala, Mwana Dimeme ya Nzambi.

³⁷ Banlonguki yina zole kuwaka, bu yandi tubaka, ye bau landaka Yesu.

³⁸ Buna Yesu pindukaka, yandi monaka bau kulanda yandi, yandi yuvulaka bau: Nki beno sosa ? Bau tubaka kwa yandi: Labi— tendula yai ikele Nlongi—, nge vanda wapi ?

³⁹ Yandi tubaka kwa bau: Kwiza ye beno tamona. Sambu na yai bau kwendaka, ye monaka sika yandi vanda, ye bau vandaka na yandi kilumbu yina, yo vandaka mpilamosi lokula iya.

⁴⁰ Mosi mu bau zole ya kuwaka ndinga ya Yoane ye landaka Yesu, yandi vandaka Andele, mpangi ya Simoni Petelo.

⁴¹ Yandi sosaka ntete mpangi ya yandi, Simoni, yandi tubaka kwa yandi: Beto imene kumona Mesia, tendula yai ikele Klisto.

⁴² Yandi twalaka yandi kwa Yesu. Yesu talaka yandi, ye tubaka: Nge ikele Simoni mwana ya Yona; nge tabingwa Kefa, tendula yai ikele ditadi. Mat. 16:17

Yesu binga Filipo

⁴³ Kilumbu ya landa, Yesu zolaka kwenda ku Ngalili, yandi monaka Filipo. Yesu tubaka kwa yandi: Landa mono.

⁴⁴ Filipo katukaka mu Betesaida, mbanza ya Andele, ye Petelo.

⁴⁵ Filipo monaka Natanaeli, yandi tubaka kwa yandi: Beto imene kumona yandi ya sonikaka Mose mu nsiku, ye bambikudi ya Nzambi, Yesu ya Nazaleti mwana ya Yosefi. 1 Mose 3:15; 22:18; 49:5; 5 Mose 18:18; Yes. 7:14; 9:6; 40:11; 53:1; Yel. 23:5; Yeh. 34:23

⁴⁶ Natanaeli tubaka kwa yandi: Kima ya mbote lenda kubasika mu Nazaleti ? Filipo tubaka kwa yandi: Kwiza, kutala.

⁴⁷ Yesu talaka Natanaeli ikele kwiza kwa yandi; ye tubaka sambu na yandi: Tala, muntu ya Isaeli kieleka, yandi ikele na luvunu ve. Nk. 32:2

⁴⁸ Natanaeli tubaka kwa yandi: Nge zabaka mono ndambu wapi ? Yesu vutulaka, ye tubaka kwa yandi: Ntete Filipo bingaka nge, bu nge vandaka nansi ya nti ya figi, mono monaka nge.

⁴⁹ Natanaeli vutulaka kwa yandi: Nlongi, nge ikele Mwana ya Nzambi, Nge ikele Ntinu ya Isaeli Yoa. 6:69; Mat. 14:35; 16:16; Mal. 8:29

⁵⁰ Yesu vutulaka ye tubaka kwa yandi: Sambu na mono tubaka kwa nge: Mono monaka nge nansi ya nti ya figi, nge ikele kukwikila ? Nge tamona ya luta yai nene.

⁵¹ Yandi tubaka kwa yandi: Kieleka, kieleka, mono kutuba kwa beno: Beno tamona zulu kanguka ye banjo ya Nzambi tomboka ye kulumuka va Mwana ya muntu.