Yakobi 5 - Le Nouveau Testament en Kikwango 1950

Bamvwama sembwa

¹ Kwiza ntangu yai, beno bankwa kimvwama, dila ye boka sambu na ntantu ya beno ikele kwiza kwa beno.

² Kimvwama ya beno imene kubiviswa, ye banyama imene kudia mvwatu ya beno. Mat. 6:19

³ Wola ye palata ya beno imene kubakama matadi; ye matadi ya yau tavanda kitemo kwa beno, ye kudia nsuni ya beno bonso tiya. Beno imene kudilundila kimvwama ya beno kwa bilumbu ya nsuka.

⁴ Tala kifutu ya beno yiminaka basadi ya salaka mu bilanga ya beno ikele kuboka, ye mbokolo ya bantu ya yonzikaka imene kukota mu makutu ya Mfumu Sabaoti. 1 Mose 4:10; 3 Mose 19:13; 4 Mose 24:14; Nk. 18:6; Yes. 5:9; Yel. 22:13; Malaki 3:5

⁵ Beno imene kuvanda na bima ya ntoto, beno imene kuvanda na kiese ya beno, beno imene kufulusa mintima ya beno, bonso mu kilumbu ya bau kufwa bima. Luk. 12:19; 16:19

⁶ Beno bedisaka ye kufwaka nkwa lunungu; ye yandi ikele kubuya beno ve. Yes. 57:1

Vibidila ye tina kudia ndefi

⁷ Bampangi, vibidila ti kwiza ya Mfumu. Tala, mfumu ya dilanga ikele kuvingila mabundu ya ntalu ya ntoto, ye ikele kuvibidila yau, ti yau kubaka mvula ya ntete ye ya nima.

⁸ Beno mpe vibidila, yidika mintima ya beno, kadi kwiza ya Mfumu ikele mfinama. 1 Tes. 4:15; 2 Tes. 2:1

⁹ Bampangi, beno baminana ve, ye beno tafundiswa ve; tala, mfundisi ikele kutelema nantwala na mwelo.

¹⁰ Bampangi, baka bambikudi, ya tubaka mu nkumbu ya Mfumu, bonso kifwani mu mpasi ye mu mvibudulu.

¹¹ Tala, beto binga bau ya vibidilaka, bankwa lusakumunu. Beno imene kuwa sambu na mvibudulu ya Yobi, ye beno imene kumona nsuka ya Mfumu, kadi Mfumu ikele kufuluka na nkenda ye nlemvo. Yobi 1:21; 42:10; Nk. 103:8

¹² Bampangi ya mono, na zulu na mambu yai yonso, beno kudia ndefi ve, ya zulu ve, ya ntoto ve, keti na ndefi yankaka; kansi bika e ya beno kuvanda e kaka, ye ve ya beno kuvanda ve kaka, na beno takubwa mu mfundusu ve.

Kulombila bambevo kwa Nzambi

¹³ Muntu nakati na beno ikele maladi ? Bika yandi lomba. Muntu ikele na kiese ? Bika yandi kuyimba nkunga. Ef. 5:19

¹⁴ Muntu nakati na beno ikele kubela ? Bika yandi binga bambuta ya dibundu, ye bika bau lomba sambu na yandi, bu bau sita yandi mafuta mu nkumbu ya Mfumu. Mal. 6:13

¹⁵ Lombilu ya lukwikilu tavulusa yandi ya kubela, ye Mfumu tatelemisa yandi; kana yandi imene kusala masumu, yandi tavidiswa yau.

¹⁶ Mpilayai, beno tuba masumu ya beno muntu kwa mpangi ya yandi, ye beno lombilana Nzambi, na beno lenda kubeluka. Mbombodolo ya nkwa lunungu lenda kusala mingi mu kisalu ya yo.

¹⁷ Elia vandaka muntu mutindu mosi na beto, yandi lombaka ngolo, na mvula tanoka ve; ye mvula nokaka ve va ntoto mvu tatu ye ngonda sambanu. 1 Nt. 17:1; Luk. 4:25

¹⁸ Yandi lombaka diaka, ye zulu pesaka mvula, ye ntoto butaka mabundu ya yau. 1 Nt. 18:1, 41

¹⁹ Bampangi ya mono, kana muntu nakati na beno imene kuvila tuka kieleka, ye muntu pindudisa yandi; Mat. 8:15

²⁰ Bika yandi zaba, konso muntu ya pindudisa nkwa masumu tuka kuvila ya nzila ya yandi, yandi tavulusa mwela tuka lufwa, ye tafuka masumu mingi. Bing. 10:12