Yakobi 3 - Le Nouveau Testament en Kikwango 1950

Lukwikilu ya kieleka tayala ludimi

¹ Bampangi ya mono, mingi ya beno vanda banlongi ve, kadi beto zaba, beto tabaka mfundusu ya luta nene.

² Kadi, mu mambu mingi beto yonso ikele kuta sakuba. Kana muntu kuta sakuba ve mu ndinga, yandi ikele muntu ya lunga, ya lenda kuyala nitu ya yandi ya mvimba. Bing. 20:9; Yak. 1:26

³ Kana beto tula minyololo mu munoko ya bakavalu, na bau lenda kulemvuka beto, beto ikele kupindula nitu ya bau ya mvimba.

⁴ Tala, masua mpe ya ikele nene, ye ya ikele kutambiswa na mupepe ya ngolo, kansi yo ikele kupindulwa mpe na mpindukulu ya fioti, kwa konsosika ya muntu ya masua zola.

⁵ Mpilayai mpe ludimi ikele kiela ya fioti, kansi yo ikele kudikembila mu bima ya nene, tala, tiya ya fioti ya lenda kuyoka mfinda ya nene. Nk. 140:3; Bing. 12:18; 15:2

⁶ Ludimi mpe ikele tiya. Bonso nsi yamvimba ya masumu, nakati na biela ya beto ikele ludimi, yo ikele kusumuna nitu yamvimba, ye kwika luzingu yamvimba, yo ikele kukwikwa tiya kwa bilungi. Mat. 15:11, 18

⁷ Kadi, bambizi yonso ya makulu iya ye bandeke ya bima ya kudibenda na ntoto ye bambizi ya masa, lenda kulongwa kwa bantu.

⁸ Kansi muntu lenda kuyala ludimi ve, yo ikele kima ya mbi ya lenda kuvanda napi ve, yo ikele kufuluka na nsaya pesa lufwa.

⁹ Na yo beto ikele kusakumuna Mfumu ye Tata; ye na yo beto ikele kufinga bantu, ya salwaka mu kifwani ya Nzambi.

¹⁰ Na munoko mosi ikele kubasika nsakumunu ye mafingu. Bampangi ya mono, mambu yai fwiti kuvanda mpilayai ve.

¹¹ Nto ya masa ikele kubasisa masa ya mbote ye ya ndudi na munoko mosi ?

¹² Bampangi ya mono, nti ya figi lenda kubuta olive ? Keti nsinga ya vinia kubuta figi ? Mpilayai masa ya mungwa lenda ve kubasisa masa ya mbote.

¹³ Nani nakati na beno ikele nkwa ngangu ye nzailu ? Bika yandi kusonga mu moyo ya yandi ya mbote bisalu ya yandi, mu nlembami ye ngangu.

¹⁴ Kansi kana beno ikele na kimpala ya mbi, ye kuswana mu mintima ya beno, beno kudikembila ve, ye tuba luvunu ve kwa kieleka.

¹⁵ Ngangu yai kulumukaka ve tuka zulu, kansi ikele ya kintoto ye ya kinsuni, ye ya kimpeve mbi. 2 Kol. 2:6

¹⁶ Kadi, konso sika ya ikele na kimpala ye kuswana, kuna ikele makalele ye bisalu yonso ya mbi. 1 Kol. 3:3; Ngal. 5:19

¹⁷ Kansi ngangu ya kulumuka tuka zulu, ikele ntete ya vedila, nanima yenge, nlembami, bombidilwa nswalu, fuluka na nkenda ye mabundu ya mbote, yo ikele na diswaswana ve, ye na luvunu ve. Mat. 5:9; 1 Tim. 3:3

¹⁸ Mabundu ya lunungu ikele kukunwa mu yenge na bau ya sala yenge.