Yakobi 2 - Le Nouveau Testament en Kikwango 1950

Muntu fwiti kuzola bamvwama ye kusaula ve bansukami

¹ Bampangi ya mono, beno vanda na lukwikilu ya Mfumu ya beto Yesu Klisto, yandi ikele Mfumu ya nkembo, ye banza ve na muntu luta muntu yankaka mbote.

² Kansi kana bakala kota mu nzo ya lukutukunu ya beno, ya ikele na mpete ya wola va musapi ya yandi, ye mvwatu ya kitoko, ye kana nsukami mpe kota na mvwatu ya mbote ve,

³ ye beno zola yandi ya vwata mvwatu ya kitoko, ye tuba: Nge vanda awa mu sika ya mbote, kansi beno tuba kwa nsukami: Nge telema awa, keti vanda na kiti ya makulu ya mono.

⁴ Buna beno ikele kubanza ve na muntu ikele kuluta muntu yankaka mbote ? Ye beno ikele kukituka bamfundisi ve na mabanza ya mbi ?

⁵ Bampangi ya mono ya zolwa, beno kuwa. Nzambi solaka ve bansukami ya nsi yai ? Yandi vandisaka bau mu kimvwama mu lukwikilu, ye bamvingidi ya difwa ya kimfumu, ya yandi silaka kwa bau ya zola yandi. Luk. 6:20; 1 Kol. 1:26; 2:9

⁶ Kansi beno imene kusaula nsukami. Bamvwama ikele kumonisa beno mpasi ve ? Ye bau ikele kubenda beno nantwala na bakiti ya mfundusu ve ?

⁷ Bau ikele kutuba mbi ve nkumbu ya luzitu, ya beno bingwaka ?

⁸ Kansi kana beno lungisa nsiku ya kimfumu bonso ikele ma masonukwa: Zola bamfinangani ya nge, bonso nge kibeni, beno imene kusala mbote.

⁹ Kansi kana beno banza muntu luta muntu yakaka mbote, beno ikele kusala masumu, nsiku ikele kufundisa beno bonso bafwi ya nsiku. 3 Mose 19:15; 5 Mose 1:17; 16:19

¹⁰ Kadi konsonani ya lunda nsiku yamvimba, kansi imene kuta sakuba mu mosi yandi imene kunata nkanu na yau yonso. 5 Mose 27:26

¹¹ Kadi yandi ya tubaka: Sala bizumba ve, yandi tubaka mpe: Kufwa muntu ve. Mpilayai, kana nge sala bizumba ve, kansi nge kufwa muntu, buna nge ikele mufwi ya nsiku. 2 Mose 20:13

¹² Beno tuba ye sala bonso bantu ya funduswa na nsiku ya kimpwanza.

¹³ Kadi mfundusu ikele na nkenda ve kwa bau ya ikele kuwila nkenda ve, nkenda ikele kuluta mfundusu ngolo. Mat. 6:15; 18:32; Luk. 6:38

Diswaswana ikele mu lukwikilu ya moyo ye lukwikilu ya kufwa

¹⁴ Bampangi ya mono, yo sadisa na nki, kana muntu tuba, yandi ikele na lukwikilu, kansi yandi ikele na bisalu ve ? Lukwikilu yai lenda kuvulusa yandi ? Mat. 7:27

¹⁵ Kana mpangi bakala keti mpangi nkento ikele kinkonga keti konda madia ya lumbu na lumbu.

¹⁶ Ye mosi ya beno tuba kwa bau: Kwenda na yenge, yotila tiya, ye yukuta, kansi beno pesa bau ve bima ya nitu ikele na nsatu na yau, buna yai ikele kusadisa mpila nki ? 1 Yoa. 3:12

¹⁷ Buna lukwikilu ikele ya kufwa mu yo kibeni, kana yo konda bisalu.

¹⁸ Kansi muntu tatuba: Nge ikele na lukwikilu ye mono ikele na bisalu. Songa mono lukwikilu ya nge ya konda bisalu, buna mono tasonga nge lukwikilu ya mono mu bisalu ya mono.

¹⁹ Nge ikele kukwikila, na Nzambi ikele mosi kaka, nge ikele kusala mbote; bampeve mbi mpe ikele kukwikila ye kuzakama. Mal. 1:24

²⁰ Kansi nge muntu ya konda mfunu, mbote nge zaba yai ? Lukwikilu ya konda bisalu ikele ya kufwa.

²¹ Abalahami tata ya beto nungiswaka sambu na bisalu ve ? bu yandi tulaka mwana ya yandi Isaki va zikwa. 1 Mose 22:1; Eb. 11:17

²² Nge zaba, na lukwikilu salaka kintuadi sikamosi na bisalu ya yandi, ye mu bisalu lukwikilu lungiswaka.

²³ Masonukwa maniswaka ya tubaka: Abalahami kwikilaka Nzambi, ye yo tangwaka lunungu kwa yandi, ye yandi bingwaka nduku ya Nzambi. 1 Mose 15:6; 2 Lus. 20:7; Yes. 41:8

²⁴ Beno zaba, na muntu ikele nunguswa sambu na bisalu, kansi sambu na lukwikilu kaka ve.

²⁵ Mpilayai mpe Lahabi, nkwa bizumba, nunguswaka sambu na bisalu ve ? bu yandi bakaka balangididi ye fidisaka bau mu nzila yankaka. Yos. 2:1

²⁶ Kadi, bonso nitu ya konda mpeve ikele ya kufwa, buna lukwikilu ya konda bisalu ikele ya kufwa mpe.