Yakobi 1 - Le Nouveau Testament en Kikwango 1950

Luyantiku

¹ Yakobi, sielo ya Nzambi ye ya Mfumu Yesu Klisto, fidisa yenge kwa makanda kumi ye zole ya mwanganaka.

Bombidila sambu bau vanda ngolo

² Bampangi ya mono, beno tanga yo yonso kiese, bu beno zungwa na mpukumunu ya mpila mu mpila. Mat. 5:11; Eb. 12:11; 1 Pet. 1:6

³ Beno zaba, kuyunsa ya lukwikilu ya beno ikele kubasisa mvibudulu. Lom. 5:3

⁴ Kansi bika mvibudulu kuvanda kisalu ya lunga, na beno lenda kuvanda ya fwana ye ya lunga, ye konda kima ve.

Ye lomba mu ngangu

⁵ Buna, kana muntu nakati na beno konda ngangu, bika yandi lomba kwa Nzambi, ya tupesa kwa bantu yonso mu luzolo, ye semba ve, buna yandi tapeswa yo. Mat. 7:7; Bing. 2:3; Yak. 5:13

⁶ Kansi bika yandi lomba mu lukwikilu, ye vanda ntembe ve, kadi muntu ya ikele ntembe, ikele bonso mayo ya mbu, ya ikele kutambula, sika ya mupepe fidisa yo. Mat. 9:28; 21:21; Mal. 11:24

⁷ Kansi bika muntu yai banza ve, yandi tabaka kima na Mfumu.

⁸ Muntu ya ikele na ntima zole ikele ntembe mu banzila ya yandi yonso.

Kiese ya bansukami, kansi ntantu ya bamvwama

⁹ Kansi bika mpangi ya nsukami yangalala bu bau tombola yandi.

¹⁰ Kansi nkwa kimvwama bu bau kulumusa yandi, kadi yandi takufwa bonso bintuntu ya matiti. Nk. 103:15; Yes. 40:6; 2 Kol. 12:9; 1 Pet. 1:24

¹¹ Kadi ntangu ikele kutomboka na mbangazi ya yo, ye yumisa matiti, ye bintuntu ya yau ikele kubwa, ye kitoko ya yau ikele kuvila, mpilayai nkwa kimvwama tavila mu kutambula ya yandi. Yes. 40:7

Konso mambu ikele kubasikaka mu mpukumunu

¹² Kiese ikele na muntu ya vibidila mu mpukumunu, kadi bu yandi imene kupukumunwa ya lunga, yandi tabaka koloa ya moyo ya Mfumu silaka kwa bau ya zola yandi. Mat. 10:22; 2 Tim. 4:8; 1 Pet. 3:14

¹³ Bika muntu tuba ve, bu yandi pukumunwa: Mono pukumunwa na Nzambi, kadi Nzambi lenda ve kupukumunwa na mambu ya mbi, ye yandi kibeni ikele kupukumuna muntu ve. 1 Kol. 10:13

¹⁴ Kansi muntu na muntu ikele kupukumunwa, bu yandi ikele kunatwa na zola ya mbi ya yandi kibeni.

¹⁵ Bu zola ya mbi imene kuyimita, yo buta masumu; bu masumu imene kukula, yau buta lufwa. Lom. 6:23

¹⁶ Bampangi ya mono ya zolwa, beno kuswa ve. Ngal. 6:7; 1 Kol. 6:9; 15:33

¹⁷ Matabisi yonso ya mbote ye ya lunga ikele kukatuka na zulu, yau ikele kulumuka tuka Tata ya mwini ya lenda kupinduka ve, ikele kini ya kupinduka ta fioti ve.

¹⁸ Mu luzolo ya yandi, yandi butaka beto, mu kieleka, na beto lenda kuvanda bonso mabundu ya ntetenakati na bima ya yandi semaka. Yel. 1:13; 1 Kol. 4:15; 1 Pet. 1:23, 25

Dibundu fwiti kusala luzolo ya Nzambi

¹⁹ Beno zaba yai, bampangi ya mono ya zolwa. Kansi bika bantu yonso kuvanda nswalu kuwa, kansi malembe kutuba, ye malembe kubaka makasi. Yak. 3:1

²⁰ Kadi makasi ya muntu ikele kusadisa lunungu ya Nzambi ve.

²¹ Mpilayai, beno katula nsumukunu yonso, ye mambu ya fuluka na mbi, mu nlembami baka ndinga ya kunwaka mu beno ya lenda kuvulusa miela ya beno. Luk. 8:11, 15; Kolo. 3:8; 1 Pet. 2:1

²² Kansi, vanda basadi ya mambu, ye bawi kaka ve ya kudikusa. Mat. 7:21, 24; Lom. 2:13; 1 Yoa. 3:7

²³ Kana muntu ikele muwi ya mambu ye musadi ya yau ve, yandi ikele bonso muntu ya tala luse ya yandi mu talatala. Mat. 7:26

²⁴ Kadi yandi ditala, ye kwenda ye nswalu yandi vila, yandi ikele muntu mutindu nki.

²⁵ Konso muntu ya tala mu nsiku ya lunga, yo ikele nsiku ya kimpwanza, ye yandi vibidila, ye ikele muwi ve ya vila, kansi musadi ya sala, yandi tasakumunwa mu kisalu ya yandi.

²⁶ Kana muntu banza, na yandi ikele nsambidi ya Nzambi, ye ikele kuyala ludimi ya yandi ve, kansi ikele kukusa ntima ya yandi, nsambilu ya Nzambi ya muntu yai ikele mpamba. 1 Pet. 3:10

²⁷ Nsambilu ya kieleka, ye ya kondwa kusumuka nantwala ya Nzambi Tata ya beto ikele yai: Sadisa bau ya konda tata, ye bafwola mu mpasi ya bau, ye dikeba kukondwa ya matona mu nsi.