Tito 3 - Le Nouveau Testament en Kikwango 1950

Kifu ya bankwa lukwikilu nantwala ya banyadi ye kwa bau ya konda lukwikilu

¹ Kubambukisa bau kulemvuka kwa bakuluntu ye bankwa ngolo, kulemvuka bau ye vanda ya yidikwa kwa bisalu yonso ya mbote, Lom. 13:1; 2 Tim. 3:17; 1 Pet. 2:13

² kutuba mbi ve sambu na muntu, kuvanda na makalele ve, kansi kuvanda bankwa nlembami, ye kusonga nlembami yonso kwa bantu yonso. Fili. 4:5; 2 Tim. 2:24

³ Kadi ntete beto mpe vandaka buzoba, ye kolama, ye kuswa, beto vandaka bampika ya luzolo ya mbi ye kiese ya mbi mutindu ye mutindu, beto vandaka na kimpala ye kimbeni, beto tulanaka kimbeni. 1 Kol. 6:11; Ef. 2:1; 5:8; Kolo. 3:7

⁴ Kansi bu nkenda ya Nzambi Mvulusi ya beto, ye zola ya yandi kwa bantu monikaka.

⁵ Yandi vulusaka beto ve sambu na bisalu ya lunungu ya beto salaka, kansi sambu na nkenda ya yandi, mu kusukula ya mbutulu yampa, ye mu kupeswa yampa ya Mpeve Yanlonga. Yoa. 3:5; Bis. 15:11; Lom. 3:24; 4:6; 9:11; 11:6; Ngal. 2:19; Ef. 2:8; 5:26; 2 Tim. 1:9

⁶ Yandi tiamunaka yandi va beto mu kimvwama, mu Yesu Klisto Mvulusi ya beto. Yes. 57:1

⁷ Buna sambu na beto nunguswa mu nlemvo ya yandi, beto tavanda mvingidi ya difwa ya moyo ya mvu ya mvu, bonso ikele vuvu.

Bau fwiti kutina ntembe ya mpamba

⁸ Mambu yai ikele ya kwikama, ye mono zola nge kusikidikisa mambu yai mbote, na bau ya imene kukwikila Nzambi tatula ngolo kusala bisalu ya mbote. Mambu yai ikele ya mbote ye ya lenda kusadisa kwa bantu. 1 Tim. 2:3; 4:9; 2 Tim. 2:11

⁹ Kansi nge tina biuvu ya buzoba, nsonokono ya batata, ye bamvita, ye kunwana sambu na nsiku, kadi yau lenda ve kusadisa, ye ikele mpamba. 1 Tim. 1:4; 4:7; 6:20; 2 Tim. 2:23; Tit. 1:14

¹⁰ Muntu ya tula makalele, bu nge imene kusemba yandi mbala mosi, keti mbala zole, buya yandi. Lom. 15:17

¹¹ Kadi nge zaba muntu ya mpilayai imene kuvila, ye imene kusala masumu, yandi kibeni ikele kudibedisa.

Mfidisilu ya mbote

¹² Bu mono imene kufidisa Alatema keti Tikiko kwa nge, buna tula ngolo nakwiza kwa mono ku Nikopoli; kadi mono imene kukana kuvanda kuna mu nsungi ya madidi.

¹³ Fidisa Zena, muzabi ya nsiku, ye Apolo, mu nzila ya bau nswalu; na bau takonda kima ve.

¹⁴ Bika bantu ya beto mpe kulonguka kusala bisalu ya mbote, sambu na kubaka bima ya lunga kwa bau, na bau takonda mabundu ve.

¹⁵ Bau yonso ya ikele na mono fidisa nge mbote. Pesa mbote kwa bau ya zola beto mu lukwikilu. Nlemvo vanda na beno yonso.