Tito 2 - Le Nouveau Testament en Kikwango 1950

Kubedisa kwa bantu ya mutindu ye mutindu

¹ Kansi nge, tuba mambu ya lunga malongi ya kieleka.

² Babakala ya nuna fwiti kukolwa ve na malafu; kuvanda na luzitu, kuvanda na mabanza ya mbote, kuvanda ngolo mu lukwikilu, ye mu zola, ye mu mvibudulu.

³ Mpilayai mpe, bankento ya nuna fwiti kuvanda na nkadulu ya lunga, kutuba kitemo ya luvunu ve, keti kuvanda bampika ya malafu ve, kansi kuvanda balongi ya mambu mbote; 1 Tim. 2:9; 3:11; 5:13; 1 Pet. 3:3

⁴ na bau lenda kulonga bankento ya nleke kuzola babakala ya bau ye bana ya bau;

⁵ ye kuvanda na mabanza ya mbote, ye kuvanda ya nlongo, ye basadi ya mbote mu nzo ya bau, ye kuvanda na nkenda, ye kulemvuka babakala ya bau, mpilayai ndinga ya Nzambi tubwa mbi ve. 1 Kol. 14:34; Ef. 5:22; Kolo. 3:18; 1 Tim. 2:9; 1 Pet. 2:1

⁶ Batoko ya babakala mpe, longa bau, kuvanda na mabanza ya mbote.

⁷ Mu mambu yonso disonga kifwani ya bisalu ya mbote; mu malongi ya nge songa mambu ya vedila ye luzitu, 1 Tim. 4:12; 1 Pet. 5:3

⁸ ye ndinga ya kieleka ya lenda ve kubediswa, mpilayai yandi ya zola kusala mbi tamona nsoni, sambu na yandi tamona kima ve ya mbi kutuba sambu na beto. 1 Tim. 5:14; 1 Pet. 2:12, 15; 3:16

⁹ Songa bampika kulemvuka kwa bamfumu ya bau, ye kuyangidisa bau mu mambu yonso, ye kuvutula ndinga ve. Ef. 5:5; Kolo. 3:22; 1 Tim. 6:1; 1 Pet. 2:18

¹⁰ Bau kuyiba ve, kansi kusonga kwikama yonso ya mbote, na bau lenda kuyidika malongi ya Nzambi, Mvulusi ya beto, mu mambu yonso.

Nlemvo ya Nzambi ikele kubasisa kifu ya nlongo

¹¹ Kadi nlemvo ya Nzambi imene kumonika kupesa mpulusu kwa bantu yonso,

¹² yo ikele kulonga beto kubuya mambu ya konda vumi ya Nzambi, ye luzolo ya mbi ya nsi, na beto tavanda na moyo ya mbote, ye ya lunungu, ye ya vumi ya Nzambi, mu ntangu yai, Ef. 1:4; Kolo. 1:22; 1 Yoa. 2:16

¹³ bu beto vingila vuvu ya kiese, ye kumonika ya nkembo ya Nzambi ya nene, ye Mvulusi ya beto Klisto Yesu. 1 Kol. 1:7; Fili. 3:20

¹⁴ Yandi ya dipesaka sambu na beto, na yandi lenda kuvulusa beto tuka na mambu ya mbi yonso, ye kuyidika beto kuvanda bantu ya yandi kibeni, ya vibidila mu bisalu ya mbote. 2 Mose 19:6; Ngal. 1:4; 2:20; Ef. 2:10; 5:2; 1 Tim. 2:6; Eb. 9:14

¹⁵ Tuba mambu yai, ye longa ye semba, mu nsikudukusu yonso. Bika muntu saula nge ve. 1 Tim. 4:11