Tito 1 - Le Nouveau Testament en Kikwango 1950

Paulu fidisa Tito mbote

¹ Paulu, mpika ya Nzambi, ye ntumwa ya Yesu Klisto, bonso lukwikilu ya basolwa ya Nzambi, ye nzailu ya kieleka, ya ikele bonso vumi ya Nzambi,

² mu vuvu ya moyo ya mvu ya mvu, ya Nzambi, ya lenda ve kukusa, silaka ntete nsi yantikaka. 4 Mose 23:19; 2 Tim. 2:13

³ Kansi mu ntangu ya yandi, yandi zabisaka mambu ya yandi mu nsamunu ya peswaka kwa mono bonso nsikudukusu ya Nzambi, Mvulusi ya beto. Ef. 1:9; 3:9; Kolo. 1:26; 1 Tes. 2:4; 1 Tim. 1:1

⁴ Mono tinda mbote kwa Tito, mwana ya mono ya kieleka, mu lukwikilu ya ntuadi: Nlemvo ye yenge tuka Nzambi Tata ye Klisto Yesu, Mvulusi ya beto. 1 Tim. 1:1, 2; 2 Tim. 1:2; 2 Yoa. 3

Kifu ya bambuta ya bantu

⁵ Sambu na mambu yai, mono bikaka nge mu Klete, na nge lenda kuyidika mambu ya bikaka, ye kutula bambuta mu bambanza yonso, bonso mono sikidikisaka nge,

⁶ kana muntu ikele na mbi ve, bakala ya nkento mosi, ye ikele na bana ya kwikila ya konda kufundwa na makalele keti kulemvuka ve. 1 Tim. 3:2

⁷ Kadi nkengi fwiti kukonda mbi, bonso nlundi ya bima ya Nzambi, ya dizola ve, ya baka makasi nswalu ve, ya zola malafu ve, ya nwana ve, ya zola ndandu ya nsoni ve, 3 Mose 10:9; 1 Tim. 3:2; 1 Pet. 5:2

⁸ kansi ya sadisa banzenza, ya zola mambu ya mbote, ya konda kusakana, ya lunungu, ya nlongo, ye ya lenda kudiyala,

⁹ ya simba ngolo mambu ya kwikama, ya ikele bonso mu malongi, na yandi lenda kulonga mu malongi ya kieleka, ye kupindula bantu ya ntembe. 1 Tim. 1:10; 6:3; 2 Tim. 1:13; 4:3; Tit. 2:1

Bonso fwiti kusalwa kwa balongi ya luvunu

¹⁰ Kadi bantu mingi ikele ya konda kulemvuka, bantu ya bitubatuba, ye bantu ya luvunu, nakati na bau bazengwa luta.

¹¹ Munoko ya bau fwiti kukangwa, bau ikele bavidisi ya banzo yamvimba, bau ikele kulonga mambu ya lunga ve, sambu na kubaka ndandu ya nsoni. Mat. 23:23; 1 Tim. 6:5; 2 Tim. 2:6

¹² Mosi ya bau, mbikudi ya bau kibeni, tubaka: Bantu ya Klete ikele bantu ya luvunu ntangu yonso, bambizi ya mbi, bantu ya bumolo, ya fulusa divumu ya bau.

¹³ Kitemo yai ikele ya kieleka. Sambu na yai, semba bau ngolo, na bau lenda kuvanda ngolo mu lukwikilu,

¹⁴ kuwa ve bingana ya mpamba ya baYuda, ye bansikudukusu ya bantu ya tula nima kwa kieleka.

¹⁵ Kwa bantu ya vedila, mambu yonso ikele ya vedila, kansi kwa bau ya sumuka, ye ya konda lukwikilu, kima ikele ya vedila ve, kansi mabanza ye kansansa ya bau ikele ya sumuka.

¹⁶ Bau tuba bau zaba Nzambi; kansi na bisalu ya bau, bau ikele kubuya yandi, bau ikele mbi ye kolama, bau lenda ve kusala mambu ya mbote, tafioti. 2 Tim. 3:5; Yud. 4