Nzaikulu 9 - Le Nouveau Testament en Kikwango 1950

Wanjo ya tanu bulaka mpungi

¹ Wanjo ya tanu bulaka mpungi, buna mono monaka mbwetete kubwa va ntoto tuka zulu; yandi peswaka nsabi ya dibulu ya konda nsuka. Nzai. 8:10; 20:1

² Yandi kangulaka dibulu ya konda nsuka, midinga basikaka na dibulu bonso midinga ya foloni ya nene. Ntangu ye mupepe kwizaka tombe sambu na midinga ya dibulu. 2 Mose 19:18; Yoeli 2:10

³ Bampasu basikaka na midinga va ntoto, bau peswaka ngolo, bonso bankutu ya ntoto ikele na ngolo. 2 Mose 10:12

⁴ Yo tubwaka kwa bau na bau tabivisa matiti ya ntoto ve, keti kima ya mubisu keti banti, kansi bantu yina kaka ya konda kidimbu ya Nzambi va mbunzu ya bau.

⁵ Bau peswaka kufwa ve, kansi na bau tamoniswa mpasi ngonda tanu: mpasi ya bau vandaka bonso mpasi ya nkutu bu yo tatika muntu.

⁶ Mu bilumbu yina bantu tasosa lufwa, kansi bau tamona yo ve, bau tazola kufwa, kansi lufwa tatina bau. Yobi 3:21; Yel. 8:3; Nzai. 6:16

⁷ Nitu ya bampasu yina ikele bonso bakavalu ya yidikwa sambu na mvita; va ntu ya bau vandaka bima bonso bakoloa bonso ya wola, luse ya bau bonso luse ya bantu. Yoeli 2:4

⁸ Ye nsuki ya bau bonso nsuki ya bankento, ye meno ya bau bonso meno ya bankosi. Yoeli 1:6

⁹ Ye bau vandaka na nkaku ya ntulu bonso nkaku ya ntulu ya bisengu, makelele ya maveve ya bau vandaka bonso makelele ya makalu ya bakavalu mingi ya ikele kwenda ntinu ku mvita. Yel. 47:3; Yoeli 2:5

¹⁰ Ye bau vandaka na mikila ye ntatiku bonso ya bankutu ye mu mikila, ye bau vandaka ngolo kumonisa bantu mpasi ngonda tanu.

¹¹ Bau vandaka na ntinu ya bau, ikele wanjo ya dibulu ya konda nsuka, nkumbu ya yandi mu kiEbeleo ikele Abadoni, mu kiElene nkumbu ya yandi Apolioni. Yobi 28:22

¹² Ndola ya ntete imene kuluta, Tala, bandola zole yankaka ikele kulanda.

Wanjo ya sambanu bula mpungi

¹³ Wanjo ya sambanu bulaka mpungi, mono kuwaka ndinga tuka bampoka ya zikwa ya wola ya ikele nantwala ya Nzambi. 2 Mose 30:2, 10

¹⁴ Mosi tubaka kwa wanjo yina ya sambanu ya ikele na mpungi: Kangula banjo iya ya kangwa na nzadi ya nene ya Eufalata. Nzai. 7:1; 16:12

¹⁵ Banjo yina iya kangulwaka, bau ya yidikwaka sambu na lokula ye kilumbu ye ngonda ye mvu, na bau takufwa mosi ya tatu ya bantu. Nzai. 20:7; 8:7

¹⁶ Ye ntalu ya bibuka ya basoldat ya vandaka va bakavalu vandaka mafunda makumi zole mbala mafunda kumi. Mono kuwaka ntalu ya bau.

¹⁷ Mpilayai mono monaka bakavalu mu mona meso ye bau ya vandaka va yau vandaka na nkaku ya ntulu bonso tiya ye ndombe ye ntinta ya solofo; bantu ya ba kavalu vandaka bonso ba-ntu ya bankosi; tuka munoko ya bau basikaka tiya ye midinga ye solofo. Yobi 41:10; Yoeli 2:3

¹⁸ Na bampasi yina tatu, mosi ya tatu ya bantu kufwaka, na tiya ye midinga ye solofo ya basikaka na munoko ya bau.

¹⁹ Kadi ngolo ya bakavalu ikele mu munoko ya bau ye mu mikila ya bau, kadi mikila ya bau ikele bonso banioka, ye ikele na ba-ntu. Na ba-ntu ya bau ikele kumonisa bantu mpasi.

²⁰ Bantu ya bikaka ya kufwaka ve na bampasi, pindulaka mabanza mpe ve tuka bisalu ya maboko ya bau, bau konda ve kusambila bampeve mbi ye biteki ya wola ye ya palata ye ya mitaku ye ya matadi ye ya nti ya lenda kumona ve keti kuwa keti kutambula. Nk. 106:37; 115:4; 135:15; Dan. 5:4, 23; 1 Kol. 10:20; Nzai. 16:11, 21

²¹ Bau pindulaka mabanza ve tuka bisalu ya bau ya kufwa bantu, keti kindoki ya bau keti bizumba ya bau keti bwivi ya bau. Yes. 47:9, 12; Yeh. 43:9; Mika 5:12; Nzai. 17:2, 5; 18:16