Nzaikulu 7 - Le Nouveau Testament en Kikwango 1950

Bantu ya Isaeli tulwa bidimbu

¹ Nanima na mambu yai mono monaka banjo iya telema na fuma iya ya ntoto, bau simbaka mupepe iya ya ntoto, na mupepe tavevumuka va ntoto ve, keti va mbu keti va nti. Dan. 7:2; Zak. 6:5; Nzai. 20:8

² Mono monaka wanjo yankaka tomboka tuka sika ya ntangu basika, yandi ikele na kidimbu ya Nzambi ya ikele na moyo; yandi bokaka na ndinga ya nene kwa banjo iya ya peswa ngolo kubivisa ntoto ye mbu,

³ kutuba: Bivisa ntoto ve, keti mbu keti banti, ti beto tatula bidimbu va mbunzu ya basielo ya Nzambi ya beto. Yeh. 9:4; Nzai. 6:6; 9:4

⁴ Mono kuwaka ntalu ya bau ya tulwaka kidimbu: Mafunda nkama mosi ye makumi iya ye iya, ya tulwaka kidimbu tuka makanda yonso ya bana ya Isaeli.

⁵ Ya kikanda ya Yuda ya tulwaka kidimbu mafunda kumi ye zole, ya kikanda ya Lubeni mafunda kumi ye zole, ya kikanda ya Gadi mafunda kumi ye zole,

⁶ ya kikanda ya Aseli mafunda kumi ye zole, ya kikanda ya Nafatali mafunda kumi ye zole, ya kikanda ya Manase mafunda kumi ye zole,

⁷ ya kikanda ya Simeoni mafunda kumi ye zole, ya kikanda ya Levi mafunda kumi ye zole, ya kikanda ya Isakali mafunda kumi ye zole,

⁸ ya kikanda ya Zabuluni mafunda kumi ye zole, ya kikanda ya Yosefi mafunda kumi ye zole, ya kikanda ya Benjamini mafunda kumi ye zole ya tulwaka kidimbu.

Yoane monaka kibuka ya bantu ya lenda kutangwa ve nantwala na kiti ya nkembo ya Nzambi

⁹ Nanima na mambu yai, mono monaka ye tala, kibuka ya nene ya muntu lenda kutanga ve. Bau katuka na nsi yonso ya bantu ye makanda yonso ya bantu ye bandinga yonso. Bau telema nantwala na kiti ya nkembo ye nantwala na Mwana Dimeme, ye vwata mvwatu ya mpembe ye mandala mu maboko ya bau. Dan. 6:19; Yoa. 12:13; Nzai. 5:9

¹⁰ Bau bokaka na ndinga nene, kutuba: Mpulusu kwa Nzambi ya beto ya vanda va kiti ya nkembo ye kwa Mwana Dimeme. Yes. 6:1; Nzai. 5:13; 12:10; 19:1

¹¹ Banjo yonso telemaka kuzunga kiti ya nkembo ye zunga bambuta ye bambizi iya ya moyo, bau fukamaka nantwala ya kiti ya nkembo va luse ya bau, ye sambilaka Nzambi, Nzai. 5:11; 11:16

¹² kutuba: Amen! Nsakumunu ye nkembo ye ngangu ye matondo ye nzitusu ye luyalu ye ngolo vanda kwa Nzambi ya beto ti mvu ya mvu. Amen! Nzai. 5:12; 4:9

¹³ Mosi ya bambuta vutulaka kutuba kwa mono: Bau yai ya vwata mvwatu ya mpembe ikele banani, ye bau katuka wapi ?

¹⁴ Mono tubaka kwa yandi: Mfumu ya mono, nge zaba. Yandi tuba kwa mono: Bau yai ikele bau ya katuka na mpasi ya nene ye bau sukulaka mvwatu ya bau ye salaka yau mpembe mu menga ya Mwana Dimeme. Mat. 24:21; 1 Kol. 6:11; Eb. 9:14; 1 Yoa. 1:7; Nzai. 1:5

¹⁵ Sambu na yai bau ikele nantwala ya kiti ya nkembo ya Nzambi, ye bau sadila yandi na ntangu ye mpimpa mu tempelo ya yandi; ye yandi ya vanda va kiti ya nkembo tatudila nzo ya lele ya yandi va zulu ya bau. Nzai. 2:3; 11:19; 14:15; 21:3

¹⁶ Bau tamona nzala diaka ve keti kiwini, mpe ntangu ye mbangazi tasala bau mpasi ve. Nk. 121:6; Yes. 49:10

¹⁷ Kadi Mwana Dimeme ya ikele nakati kiti ya nkembo tavanda mvungi ya bau ye tatwala bau ku banto ya masa ya moyo; Nzambi takunguna mansanga yonso na meso ya bau. Nk. 23:1; Yes. 25:8; 40:10; Nzai. 21:4