Nzaikulu 6 - Le Nouveau Testament en Kikwango 1950

Mwana Dimene kangula bidimbu nsambwadi

¹ Mono monaka bu Mwana Dimeme kangulaka mosi ya bidimbu nsambwadi, mono kuwaka mosi ya bambizi iya ya moyo kutuba mu ndinga bonso ndinga ya mbandanu: Kwiza!

² Mono monaka, tala, kavalu ya mpembe ye yandi ya vandaka va yandi vandaka na buta, yandi peswaka koloa, ye yandi kwendaka kunwana ye kununga. Zak. 1:8; 6:1; Nzai. 19:11

³ Ye bu yandi kungulaka kidimbu ya zole, mono kuwaka mbizi ya zole ya moyo kutuba: Kwiza!

⁴ Kavalu yankaka basikaka, ikele kavalu ya mbwaki, kwa yandi ya vandaka va yandi peswaka ngolo kukatula yenge na ntoto, na bau takufwana; yandi peswaka mbele ya nene ya mvita.

⁵ Bu yandi kangulaka kidimbu ya tatu, mono kuwaka mbizi ya tatu ya moyo kutuba: Kwiza! Mono monaka ye tala, kavalu ya ndombe, yandi ya vandaka va yandi vandaka na balanza mu diboko ya yandi. Yeh. 4:16; 5:1

⁶ Mono kuwaka bonso ndinga nakati bambizi iya ya moyo kutuba: Kitezo mosi ya nkeni froment ikele kitini mosi ya mbongo denali, kitezo tatu ya nkeni ya orge ikele kitini mosi ya mbongo denali, ya bivisa ve mafuta ya vinia, Nzai. 9:4

⁷ Bu yandi kangulaka kidimbu ya iya, mono kuwaka ndinga ya mbizi ya iya ya moyo kutuba: Kwiza! Nzai. 4:7

⁸ Ye mono monaka ye tala, kavalu ya mona mpembe, ye yandi ya vandaka va yandi, nkumbu ya yandi lufwa, ye nsi ya bafwa landaka yandi. Bau peswaka ngolo mu ndambu mosi ya iya ya ntoto, kufwa na mbele ya mvita ye na malema ye na lufwa ye na bambizi ya makasi ya ntoto. Bing. 5:5; Yel. 15:2; Yeh. 14:21; Nzai. 20:14

⁹ Bu yandi kangulaka kidimbu ya tanu, mono monaka nansi ya zikwa, miela ya bantu ya bau kufwaka sambu na mambu ya Nzambi ye sambu na kitemo ya bau longaka. Nzai. 20:4

¹⁰ Bau bokaka na ndinga ya nene kutuba: Mfumu yanlongo ye ya kieleka, ntama ikwa nge vingila kufundisa ye kuvutula ndinda sambu na menga ya beto va bau ya vanda va ntoto ? Nk. 79:5, 10

¹¹ Bau peswaka mosi mosi mvwatu ya mpembe, yo tubwaka kwa bau na bau tavundisa diaka ndambu, ti ntalu lunga ya basielo sikamosi na bau ye bampangi ya bau takufwa bonso bau kufwaka. Nzai. 3:5; 7:9, 14; 11:7; 13:7

¹² Mono monaka bu yandi kangulaka kidimbu ya sambanu, kuna vandaka ndikunu ya nene ya ntoto, ntangu kitukaka ndombe bonso ngoto ya mika, ye ngonda yamvimba kitukaka bonso menga. Yes. 50:3; Yeh. 32:7; Yoeli 3:15; Nzai. 16:18

¹³ Ye bambwetete ya zulu kubwaka va ntoto bonso nti ya figi ikele kubwisa mabundu ya yo ya mubisi, bu yo nikiswa na mupepe ya ngolo. Mat. 24:29

¹⁴ Zulu katulwaka bonso nkanda bu yo ikele kukangwa, ye miongo yonso ye basanga yonso katulwaka na sika ya yau. Yes. 34:4

¹⁵ Bantinu ya ntoto ye bantu ya nene ye bankuluntu ya basoldat ye bamvwama ye bantu ya ngolo ye bampika yonso ye bampwanza yonso diswekaka mu mabulu ya ntoto ye mu matadi ya miongo. Yes. 24:21; 2:10, 19, 21; Mat. 24:30

¹⁶ Bau tubaka kwa miongo ye matadi: Kubwila beto, kusweka beto na luse ya yandi ya vanda va kiti ya nkembo ye na makasi ya Mwana Dimeme. Yes. 6:1; Hos. 10:8; Luk. 23:30; Nzai. 4:2, 9; 5:1, 13; 9:6

¹⁷ Kadi kilumbu ya nene ya makasi ya yandi imene kwiza, nani lenda kutelema ? Yoeli 3:14; Sef. 2:3; Nah 1:6; Malaki 3:2