Nzaikulu 5 - Le Nouveau Testament en Kikwango 1950

Yoane monaka nkanda ya ikele na bidimbu nsambwadi

¹ Mu diboko kibakala ya yandi ya vandaka va kiti ya nkembo, mono monaka nkanda ya sonukwa nakati ye nanganda, ye kangwa na bidimbu nsambwadi. Yes. 29:11; Yel. 2:9

² Mono monaka wanjo ya ngolo samuna mu ndinga ya nene: Nani lunga kukangula nkanda ye kukangula bidimbu ya yo ?

³ Muntu vandaka ve mu zulu keti va ntoto keti mu nsi ya ntoto ya lendaka kukangula nkanda keti kutala yo.

⁴ Mono dilaka mingi sambu na muntu monikaka ve ya lunga kukangula nkanda keti kutala yo.

⁵ Mosi ya bambuta tubaka kwa mono: Dila ve. Tala, nkosi ya kikanda ya Yuda, ye mwanzi ya Davidi imene kununga lenda kukangula nkanda ye bidimbu nsambwadi ya yo. 1 Mose 49:9; Yes. 11:1, 10; Nzai. 4:4

Mwana dimeme baka nkanda ye kangula yo

⁶ Mono monaka nakati ya kiti ya nkembo ye ya bambizi iya ya moyo ye nakati ya bambuta Mwana Dimene telemaka, bonso bau imene kufwa yandi, ya vandaka na bampoka nsambwadi ye meso nsambwadi; ya ikele bampeve nsambwadi ya Nzambi ya fidiswaka mu ntoto yonso. Yes. 53:7; Zak. 4:10; Yoa. 1:29, 36; Nzai. 7:17

⁷ Yandi kwizaka ye bakaka nkanda na diboko kibakala ya yandi ya vandaka va kiti ya nkembo.

⁸ Bu yandi bakaka nkanda, bambizi iya ya moyo ye bambuta makumi zole ye iya fukamaka nantwala ya Mwana Dimene, bau mosi mosi vandaka na nsambi ye malonga ya wola ya fulukaka na bima ya mfwitila mwisi, ya ikele lombilu ya banlongo. Nk. 141:2; Nzai. 4:8; 14:2

⁹ Bau yimbaka nkunga yampa, kutuba: Nge lunga kubaka nkanda ye kukangula bidimbu ya yo, sambu na bau imene kufwa nge ye nge sumbaka kwa Nzambi na menga ya nge, bantu ya makanda yonso ye bandinga ye bantu ye makanda yonso, Nk. 144:9; 1 Kol. 6:20; 1 Pet. 1:18; Nzai. 4:11; 14:2

¹⁰ nge salaka bau kuvanda kwa Nzambi ya beto kimfumu ye banganga, ye bau tayala va ntoto. 2 Mose 19:5; Yes. 61:6; Dan. 7:22, 27; 1 Pet. 1:5, 9

¹¹ Mono monaka ye mono kuwaka ndinga ya banjo mingi zunga kiti ya nkembo ye bambizi ya moyo ye bambuta, ye ntalu ya bau vandaka mafunda kumi mbala mafunda kumi ya mafunda ya mafunda. Dan. 7:10; Nzai. 9:16

¹² Bau tubaka na ndinga ya nene: Mwana Dimene ya kufwaka lunga kubaka ngolo ye kimvwama ye ngangu ye luyalu ye nzitusu ye nkembo ye lusakumunu. Yes. 53:7; Nzai. 4:11

¹³ Mono kuwaka mpe bisemwa yonso ya vandaka mu zulu ye va ntoto ye mu nsi ya ntoto ye va mbu ye bima yonso ya ikele mu yau, tubaka: Kwa yandi ya vanda va kiti ya nkembo ye kwa Mwana Dimeme vanda nsakumunu ye nzitusu ye nkembo ye luyalu mvu ya mvu. Yes. 6:1; Fili. 2:10; Nzai. 4:2; 5:3; 7:10

¹⁴ Bambizi iya ya moyo tubaka: Amen! bambuta fukamaka ye sambilaka.