Nzaikulu 4 - Le Nouveau Testament en Kikwango 1950

Yoane tala zulu ye mona kiti ya ya nkembo ya Nzambi ye nkembo kuzieta yo

¹ Nanima na mambu yai mono talaka ye monaka mwelo kanguka mu zulu, ndinga ya ntete ya mono kuwaka vandaka bonso ndinga ya mpungi, ya tuba na mono, kutuba: Kwiza awa, ye mono tasonga nge mambu ya takwiza nantwala. Nzai. 1:10

² Nswalu mono vandaka mu Mpeve ye tala, kiti ya nkembo tulwaka mu zulu, ye mosi vandaka va kiti ya nkembo. Yes. 6:1; Yeh. 1:26

³ Yandi ya vandaka, monikaka bonso ditadi ya yaspisi ye ditadi ya saladio, ye nkiama vandaka kuzunga kiti ya nkembo, bonso ditadi ya emolode kutala. Nzai. 10:1; 12:11

⁴ Ye bakiti ya nkembo makumi zole ye iya zungaka kiti ya nkembo, mono monaka bambuta makumi zole ye iya vanda va bakiti yina ya nkembo, bau vwataka mvwatu ya mpembe ye koloa ya wola va ntu ya bau. Nzai. 3:4; 11:16

⁵ Tuka kiti ya nkembo basikaka banzazi ye bandinga ye bambandanu, ye nantwala na kiti ya nkembo lemaka minda nsambwadi ya tiya, yau ikele bampeve nsambwadi ya Nzambi. 2 Mose 19:16; 25:37; Yeh. 1:13; Zak. 4:2; Nzai. 5:6; 8:5; 11:19

⁶ Nantwala na kiti ya nkembo vandaka mbu bonso talatala bonso matadi ya moni-moni, nakati kiti ya nkembo, ye zunga kiti ya nkembo vandaka bambizi iya ya moyo ya fuluka na meso nantwala ye nanima. 2 Mose 24:16; Yeh. 1:5; Nzai. 15:2

⁷ Kisemwa ya ntete vandaka bonso nkosi, yazole bonso ngombe bakala, ya tatu vandaka na luse bonso ya muntu, ya iya bonso ngo ya zulu ya ikele kutilumuka. Yeh. 1:10

⁸ Bambizi iya ya moyo vandaka na maveve sambanu sambanu, bau fulukaka na meso nanganda ye nakati, bau vundisa ve na ntangu ye mpimpa, kutuba: Nlongo, nlongo, nlongo, Mfumu Nzambi, Nkwa Nlongo, ya vandaka ye ya ikele ye ya takwiza. 2 Mose 3:14; Yes. 6:2; Yeh. 1:18; Amosi. 3:13; Nzai. 1:8

⁹ Ye bu bambizi ya moyo tapesa nkembo ye nzitusu ye matondo kwa yandi ya vanda va kiti ya nkembo, kwa yandi ya ikele na moyo mvu ya mvu, Yes. 6:1; Nzai. 15:7

¹⁰ buna bambuta makumi zole ye iya tafukama nantwala na yandi ya vanda va kiti ya nkembo, ye bau tasambila yandi ya ikele na moyo mvu ya mvu, bau talosa bakoloa ya bau nantwala na kiti ya nkembo, kutuba:

¹¹ Nge Mfumu ya beto ye Nzambi ya beto ya lunga kubaka nkembo ye nzitusu ye ngolo, kadi nge semaka bima yonso, ye sambu na luzolo ya nge yo vandaka ye semwaka. Nzai. 5:12; 10:6