Nzaikulu 3 - Le Nouveau Testament en Kikwango 1950

Nkanda kwa dibundu ya Salade

¹ Sonika kwa wanjo ya dibundu mu Salade: Mambu yai tubaka yandi ya ikele na bampeve nsambwadi ya Nzambi ye bambwetete nsambwadi: Mono zaba bisalu ya nge na nge ikele na nkumbu, na nge ikele na moyo, kansi nge ikele ya kufwa.

² Tomatala, ye siamisa mambu yina ya bika ya zola kufwa, kadi mono monaka ve bisalu ya nge mbote nantwala ya Nzambi ya mono. Yeh. 34:4, 16

³ Mpilayai bambuka; bonso nge imene kubaka ye kuwa. Keba yo ye pindula mabanza. Kana nge tomatala ve, mono takwiza bonso mwivi, ye nge tazaba ve lokula ya mono takwiza kwa nge. Mat. 24:42; 1 Tes. 5:2; 2 Pet. 3:10; Nzai. 16:15

⁴ Kansi nge ikele na bankumbu ndambu mu Salade ya imene kusumuna mvwatu ya bau ve, ye bau ta tambula na mono mu mvwatu ya mpembe, kadi bau ikele ya lunga.

⁵ Yandi ye nunga tavwatiswa mvwatu ya mpembe, mono takatula nkumbu ya yandi ve mu nkanda ya moyo, ye mono tandima nkumbu ya yandi nantwala ya Tata ya mono ye nantwala na banjo ya yandi. 2 Mose 32:32; Nk. 69:28; Mat. 10:32; Luk. 12:8; Fili. 4:3; Nzai. 13:8

⁶ Yandi ya ikele na makutu bika yandi kuwa mambu ya Mpeve tuba kwa mabundu.

Nkanda kwa dibundu ya Filadelefia

⁷ Sonika kwa wanjo ya dibundu mu Filadelefia: Mambu yai tubaka nkwa nlongo, nkwa kieleka, yandi ya ikele na nsabi ya Davidi, yandi ya ikele kukangula ye muntu takanga ve, ye kanga ye muntu takangula ve. Yes. 22:22; Nzai. 1:18

⁸ Mono zaba bisalu ya nge. Tala, mono imene kutula mwelo ya kangula nantwala na nge, ya muntu lenda ve kukanga, nge ikele na ngolo ndambu, ye kebaka mambu ya mono, ye buyaka nkumbu ya mono ve.

⁹ Tala, mono tapesa kwa bankaka ya nzo ya sambilu ya Satana, bau ya tuba bau ikele baYuda kansi bau ikele mpilayai ve, kansi bau ikele kukusa; mono tatula bau kwiza ye sambila na makulu ya nge, ye zaba na mono imene kuzola nge. Nzai. 2:9

¹⁰ Sambu na nge kebaka mambu ya mvibudulu ya mono, mono mpe takeba nge mu lokula ya mpukumunu ya ikele kwiza va nsi yamvimba, kupukumuna bau ya vanda va ntoto.

¹¹ Mono ikele kwiza nswalu. Simba ngolo mambu ya ikele na nge, na muntu baka ve koloa ya nge. Nzai. 22:7, 12

¹² Kwa yandi ya nunga mono takitula yandi dikunzi mu tempelo ya Nzambi ya mono, ye yandi tabasika muna diaka ve ye mono tasonika nkumbu ya Nzambi ya mono va yandi ye nkumbu ya mbanza ya Nzambi ya mono, Yelusalemi yampa ya ikele, kwiza tuka zulu tuka Nzambi ya mono, ye mono tasonika va yandi nkumbu ya mono ya yampa. Yes. 56:5; 62:2; Yeh. 48:35; Ngal. 4:26; Eb. 12:22; Nzai. 21:2, 10; 22:4

¹³ Yandi ya ikele na makutu, bika yandi kuwa mambu ya Mpeve tuba kwa mabundu.

Nkanda kwa dibundu ya Laodikia

¹⁴ Sonika kwa wanjo ya dibundu mu Laodikia: Mambu yai tubaka yandi ya ikele Amen, kitemo ya kwikama ye ya kieleka, luyantiku ya nsemono ya Nzambi: Bing. 8:22; Kolo. 1:15; Nzai. 1:5; 19:11

¹⁵ Mono zaba bisalu ya nge, nge ikele madidi ve keti tiya ve, mono zola kana nge ikele madidi keti tiya.

¹⁶ Buna sambu na nge ikele tiya fioti ye tiya ve ye madidi ve, mono taluka nge na munoko ya mono.

¹⁷ Sambu na nge tuba: Mono ikele mvwama, mono imene kubaka kimvwama ye ikele na nsatu ya kima ve, kansi nge zaba ve nge ikele muntu mbi ye ntantu ye nsukami ye meso kufwa ye konda lele, Luk. 18:9; 1 Kol. 4:8

¹⁸ mono luengisa nge kusumba kwa mono wola ya tezwa mu tiya, na nge lenda kwiza mvwama, ye mvwatu ya mpembe kuvwata, na nsoni ya kinkonga ya nge tamonika ve, ye mafuta ya meso na kusita meso ya nge, na nge lenda kumona. Nzai. 7:13; 6:15; 19:8

¹⁹ Bau yonso ya mono zola, mono semba ye pesa ndongi, sambu na yai tula ngolo ye pindula mabanza. Yobi 5:17; Bing. 3:11; Eb. 12:5

²⁰ Tala, mono ikele kutelema na mwelo ye kunkuta. Kana muntu kuwa ndinga ya mono ye kangula mwelo, mono takota kwa yandi ye kudia na yandi ye yandi na mono. Mat. 26:29; Luk. 12:36; Yoa. 14:21

²¹ Kwa yandi ya nunga, mono tapesa kuvanda sikamosi na mono va kiti ya nkembo ya mono, bonso mono nungaka mpe ye mono vandaka sikamosi na Tata ya mono va kiti ya nkembo ya yandi. Mat. 19:28; Luk. 22:29; 1 Kol. 6:2; 2 Tim. 2:12

²² Yandi ya ikele na makutu, bika yandi kuwa mambu ya Mpeve tuba kwa mabundu.