Nzaikulu 21 - Le Nouveau Testament en Kikwango 1950

Yoane monaka zulu yampa ye ntoto yampa ye Yelusalemi yampa

¹ Mono monaka zulu yampa ye ntoto yampa. Kadi zulu ya ntete ye ntoto ya ntete imene kuvila, ye mbu ikele diaka ve. Yes. 65:17; 66:22; 2 Pet. 3:13

² Mono monaka mbanza yanlongo, Yelusalemi yampa, kulumuka tuka zulu tuka Nzambi, ya imene kuyidikwa bonso nkento ya makwela, ya vwata mvwatu ya kitoko sambu na bakala ya yandi. Eb. 12:22; Nzai. 8:12

Ndinga basika na kiti ya nkembo, yo samuna kiese ya bantu ya vuluswa

³ Mono kuwaka ndinga ya nene basika na kiti ya nkembo, kutuba: Tala, nzo ya lele ya Nzambi ikele nakati na bantu; ye yandi tavanda na bau, bau tavanda bantu ya yandi, ye Nzambi kibeni tavanda na bau ye vanda Nzambi ya bau. Yeh. 37:27; 2 Kol. 6:16; Eb. 8:2; 9:11

⁴ Yandi takunguna mansanga yonso na meso ya bau, lufwa tavanda diaka ve, ntantu tavanda diaka ve, ye kudila ye mpasi tavanda diaka ve, kadi yina ya ntete imene kuluta. Yes. 25:8; 35:10; 65:16; Nzai. 7:17

⁵ Yandi ya vanda va kiti ya nkembo tubaka: Tala, bima yonso mono ikele kusala yau yampa. Yandi tuba: Sonika, kadi mambu yai ikele ya kwikama ye ya kieleka. Yes. 43:19; 2 Kol. 5:17; Nzai. 4:2; 22:6

⁶ Yandi tubaka kwa mono: Imene kusalwa. Mono ikele Alafa ye Omega, luyantiku ye nsuka. Mono tapesa kwa yandi ya ikele na kiwini kunwa na nto ya masa ya moyo na kufuta ve. Yes. 44:6; 55:1; Yoa. 7:37; Nzai. 16:17; 19:9; 22:6, 17

⁷ Yandi ya nunga tayala bima yai, mono tavanda Nzambi ya yandi, ye yandi tavanda mwana ya mono. Yel. 31:33; Zak. 8:8

⁸ Kansi bau ya ikele na boma, ye ya konda lukwikilu, ye ya sala masumu, ye bafwi ya bantu, ye bankwa bizumba, ye bankwa kindoki, ye basambidi ya biteki, ye bankwa luvunu yonso, sika ya bau tavanda mu zanga ya lema, na tiya ye solofo, yai ikele lufwa ya zole. 1 Kol. 6:9; Ngal. 5:21; Ef. 5:6; Nzai. 20:10, 14; 22:15

Yelusalemi yampa, mutindu yo ikele

⁹ Mosi ya banjo yina nsambwadi ya vandaka na malongo nsambwadi ya fuluka na bampasi nsambwadi ya nsuka tubaka kwa mono, kutuba: Kwiza awa, mono tasonga nge nkento ya makwela, ikele nkento ya Mwana Dimeme. Nzai. 15:1, 6; 17:1; 19:7

¹⁰ Yandi nataka mono mu mpeve ku mongo ya nene ye ya nda, ye songaka mono mbanza ya nlongo, Yelusalemi, ya kulumuka tuka zulu ye tuka Nzambi. Yeh. 40:2; Mat. 27:53; Nzai. 3:12; 17:3

¹¹ Yo vandaka na nkembo ya Nzambi. Yo kienzimaka bonso ditadi ya luta ntalu, bonso ditadi ya yaspisi, ye bonso talatala ya moni-moni. Yes. 60:1; Yeh. 43:2; Nzai. 4:3; 15:8

¹² Yo vandaka na lupangu ya nene ya nda, ye ikele na mielo kumi ye zole, na mielo kumi ye zole yina banjo kumi ye zole telemaka, bankumbu sonamaka va mielo, ikele bankumbu ya makanda kumi ye zole ya bana ya Isaeli. Yeh. 48:31

¹³ Na lweka ya este vandaka mielo tatu, na lweka ya node mielo tatu, na lweka ya sude mielo tatu, na lweka ya weste mielo tatu.

¹⁴ Ye lupangu ya mbanza ikele na lufulu kumi ye zole, ye va yau sonikwa bankumbu kumi ye zole ya bantumwa kumi ye zole ya Mwana Dimeme. Ef. 2:20; Eb. 11:10

¹⁵ Yandi ya tubaka kwa mono vandaka na tezo ya wola kuteza mbanza ye mielo ya yo ye lupangu ya yo. Yeh. 40:3, 38; Nzai. 11:1

¹⁶ Lweka iya ya mbanza vandaka kitezo mosi, nda ya yo ikele kitezo mosi na nene ya yo. Yandi tezaka mbanza na tezo, yo vandaka kilometela funda zole ye kama iya. Kitezo ya nene ye nda ya yo, ye ntela ya yo ikele kitezo mosi. Yeh. 41:21; 43:16; 45:2; 48:16, 20

¹⁷ Yandi tezaka lupangu ya yo, yo ikele bonso metela makumi nsambwadi ye tanu, yo ikele bonso kitezo ya muntu, ye yo ikele kitezo ya wanjo mpe.

¹⁸ Lupangu yina vandaka ya matadi ya yaspisi, mbanza vandaka ya wola ya vedila bonso talatala ya mpembe. Zak. 2:5

¹⁹ Balufulu ya lupangu ya mbanza tulwaka matadi ya mutindu yonso ya ntalu; lufulu ya ntete ikele ya yaspisi, ya zole ya safili, ya tatu ya kalasedoni, ya iya ya emelode, Yes. 54:11

²⁰ ya tanu ya saladoni, ya sambanu ya konalini, ya nsambwadi ya kilisolita, ya nana ya belili, ya uvwa ya topasi, ya kumi ya kilisopisi, ya kumi ye mosi ya hiasinta, ya kumi ye zole ya ametista.

²¹ Ye mielo kumi ye zole ikele ya matadi nzimbu kumi ye zole, mwelo mosimosi ikele nzimbu mosimosi. Balabala ya mbanza ikele ya wola ya vedila bonso talatala ya mpembe. Nzai. 21:12; 22:2

²² Mono monaka tempelo muna ve, kadi Mfumu Nzambi, Nkwa Ngolo, ye Mwana Dimeme ikele tempelo ya yo.

²³ Mbanza ikele na nsatu ve ya ntangu keti ya ngonda kukienzula yo, kadi nkembo ya Nzambi ikele kukienzula yo, mwini ya yo ikele Mwana Dimeme. Yes. 60:19; Nzai. 22:5

²⁴ Makanda ya bantu tatambula nakati mwini ya yo, bantinu ya ntoto takotisa mu yo nkembo ya bau. Nk. 72:10; Yes. 2:3; 60:3

²⁵ Mielo ya yo takangwa ta fioti ve mu ntangu, kadi mpimpa tavanda kuna ve. Yes. 60:11; Zak. 14:7; Nzai. 22:5

²⁶ Bau tatwala nkembo ye nzitusu ya makanda ya bantu muna. Yes. 60:5; 66:12

²⁷ Konsokima ya sumuka takota muna ta fioti ve, keti muntu ya sala masumu keti luvunu lenda kukota muna ve, kansi bau kaka ya sonama mu nkanda ya moyo ya Mwana Dimeme. Yes. 35:8; 52:1; Yeh. 44:9; Nzai. 13:8; 20:12; 2:15